Filipiyan 2:2 - Di Jamiekan Nyuu Testiment

² So mi beg unu mek mi aat wel api: lov unu wan aneda iina di siem wie an kom tugeda an biliiv di siem sitn. Aal a unu fi waahn di siem sitn an unu fi wok tugeda fi di siem riizn.

Filipiyan 2:2 ပူးပေါင်းရင်းမြစ်များ

Jan 3:29

Yu si, di braid a fi di braidgruum. Di braidgruum brejrin we saat out di sitn dem fi'im wedn an we tan op an lisn out fi'im, im glad-bag bos wen taim im ier di braidgruum vais. Rait ya nou, a siem wie so mi fiil wel wel api bout wa a gwaan.

Aks 1:14

Di uol a dem did eva a miit tugeda fi prie: dem, di uman dem, Mieri, Jiizas mada, an Jiizas breda dem.

Aks 2:1

Wen Pentikas die kom, aal a di piipl we biliiv iina Jiizas did gyada op iina di siem plies.

Aks 2:46

Evridie dem miit op iina di yaad we Gad ous de. Dem go a wan aneda ous an iit fuud tugeda an dem aat did wel api. Dem did api fi shier wid wan aneda.

Aks 5:12

Di apasl dem mek nof sain an mirikl apm mongks di piipl dem. An di uol a dem mek op dem main fi miit op tugeda pan Salaman Puoch.

Ruoman 12:16

Liv gud wid unu wan aneda. No get ful-a unuself an fiil laik se unu kyaahn du sortn wok ar taak tu sortn an sortn piipl. Insted-a dat ombl unuself.

1 Korintiyan 1:10

Nou iina wi Laad Jiizas Krais niem, mi a beg unu breda an sista fi tap aagyu wid unu wan aneda an plit op plit op di choch iina gruup. Unu niid fi kom tugeda an mek shuor se aal a unu tingk di siem wie an aal a unu mek op unu main fi du di siem sitn.

2 Korintiyan 13:11

Breda an sista, aal mi av fi se fi don da leta ya a dat mi uop se unu wi api. Chienj unu wiez an liv ou unu sopuoz fi liv. Mi a beg unu lisn an fala aal we mi tel unu. Kom tugeda an biliiv di siem ting an liv iina piis wid unu wan aneda. An Gad we lov wi an we gi wi piis wi tan wid unu aalwiez.

2 Korintiyan 2:3

A so mek mi rait da leta de — mi neva waahn di sed piipl we fi mek mi api, fi mek mi sad. So mi rait unu so unu kuda chienj we niid fi chienj, an da wie de wen mi kom luk fi unu, mi wuda api. Kaaz mi nuo fi shuor se ef mi api unu api tu.

2 Korintiyan 7:7

An wi neva api jos chuu im kom, bot kaaz im tel wi ou unu did tek kier a im an elp im fi du di wok we im did av fi du. Im tel wi bout ou unu did wel waahn si mi so dat unu kuda mek mi nuo se unu lov mi, an dat unu did wel sari bout wa apm tu mi. Im tel mi bout ou unu eva av mi bak. An wen mi ier dem sitn de, it mek mi iivn muor api.

Filipiyan 1:4

Evritaim mi prie fi unu, sitn bobl op iina mi aat an mek mi wel api.

Filipiyan 2:16

Unu fi tel di piipl dem Gad mesij — Gad mesij bout ou dem kyan get di laif we mek dem liv fi eva an eva. Unu fi du dat, so dat wen Krais Jiizas kom baka ort, mi wi kyan buos bout unu se mi neehn ron ar wok so aad mongks unu fi notn.

Filipiyan 2:20

Kaaz mi no av nobadi els laik im we riili kier bout unu an ou unu du.

Filipiyan 4:2

Mi a beg Yuodiya an mi a beg Sinteki, fi di Laad siek, liv gud wid unu wan aneda.

Koloshan 2:5

Kaaz iivn duo mi mait no riili de wich paat unu de, mi spirit de de wid unu siem wie. An mi api fi si se aal a unu tugeda, a tan op chrang an a chos iina Krais Jiizas.

2 Tesaluoniyan 2:13

Bot breda an sista, wi afi gi Gad tangks fi unu aal di wail. Di Laad lov unu an so im pik unu an kaal unu fi get siev fram iivn bifuo im mek di worl. Di Spirit kliin unu op fi Gad, an unu biliiv iina di chuut tu, so unu get siev.

2 Timoti 1:4

Mi memba ou yu did baal an it mek mi waahn fi si yu. Kaaz mi nuo se ef mi si yu mi wuda api.

Failiiman 1:20

Mi breda mi wish se yu wuda du mi da fieva ya an mek mi api, sins mi an yu biliiv iina di siem Gad.

2 Jan 1:4

Mi wel api kaaz mi fain out se som a yu pikni dem a liv azkaadn tu di chuut jos laik ou Faada Gad se wi fi liv.

3 Jan 1:4

Notn no mek mi api so laik wen mi ier se mi pikni dem a liv ou di Laad se dem fi liv — azkaadn tu di chuut.