Aks 2:47 - Di Jamiekan Nyuu Testiment

⁴⁷ Dem kip aan a priez Gad an aal di piipl iina Jeruusilem did api wid dem an taak gud bout dem. Evridie di Laad Jiizas siev muor an muor piipl an mek dem jain di choch.

Aks 2:47 ပူးပေါင်းရင်းမြစ်များ

Luuk 19:48

Bot dem kudn fain no wie fi du it, kaaz evribadi did a lisn evri wod we Jiizas se.

Luuk 2:52

Jiizas gruo op big. Im did brait an av nof sens. Gad did api wid wa im a du an di piipl dem did api tu.

Aks 11:21

Di Laad Gad did de wid dem an im gi dem powa fi priich an wan uol iip a piipl biliiv an ton tu di Laad.

Aks 11:24

Baanabas a did wan gud man. Di Uoli Spirit did tek kanchuol a im laif an im did biliiv nof nof. Siek-a im, uol iip muor piipl ton tu di Laad an get siev.

Aks 13:48

Wen di piipl we a no Juu ier dis, dem api so til. Dem gi tangks an priez fi Gad mesij. An aal a di wan dem we Gad did pik fi liv fi eva, biliiv di mesij an get siev.

Aks 14:1

Di siem ting we did apm tu Paal an Baanabas iina Antiyak apm iina Aikoniyom. Di tuu a dem go iina di Juu dem choch an taak tu piipl we a Juu an piipl we a no Juu. Wa dem se did so powaful dat nof nof piipl we a Juu an piipl we a no Juu biliiv iina Jiizas.

Aks 14:21

Dem priich di gud nyuuz iina Dorbi an uol iip a piipl biliiv iina Jiizas. Den dem go baka Lischra, Aikoniyom, an Antiyak

Aks 16:5

So di choch piipl dem get chrangga an chrangga iina wa dem biliiv an evridie muor an muor piipl jain dem gruup.

Aks 17:12

So nof a dem biliiv, aal nof a di Griik uman dem we kom fram rich fambili an di impuotant man dem tu.

Aks 2:39

Wa Gad pramis a fi unu an unu pikni dem an fi aal uu liv faar faar fram ya-so — a fi evribadi we Gad a-go kaal fi bi im pikni.”

Aks 2:41

Di wan dem we biliiv Piita mesij get baptaiz, an da die de, di Laad mek bout chrii touzn muor piipl jain di choch.

Aks 4:21

Di liida dem chretn Piita an Jan agen, den dem let dem go. Dem kudn mek op dem main ou fi ponish Piita an Jan, kaaz aal a di piipl dem did a gi Gad priez fi wa did apm.

Aks 4:33

Di apasl dem kip aan tel piipl iina wan powaful wie bout ou Jiizas kom bak alaiv, an ou Gad shuo dem nof nof lov, iivn duo dem no dizorv it.

Aks 4:4

Bot nof a di piipl dem we did ier di apasl dem mesij biliiv it. Di gruup a man dem we biliiv iina Jiizas nou a did bout faiv touzn.

Aks 6:1

Iina dem die de, di gruup a piipl we biliiv iina Jiizas did a gruo muo an muo. Di uman dem we a Juu an we taak di Griik langwij uufa ozban dem did ded, staat mombl anda di kwaiyat gens di uman dem we a Juu we onggl taak di Juu langwij an uufa ozban dem did ded tu. Dem did a mombl se dem neva did a get fi dem shier a di moni an fuud we dem did fi get a die taim.

Aks 6:7

Gad mesij bout Jiizas pred muo an muo, an muo an muo piipl biliiv iina Jiizas an wan uol iip a di priis dem biliiv di Gud Nyuuz tu.

Aks 9:31

Den di choch dem we did iina Judiya, Gyalalii, an Samieriya get a briek fram di sofarieshan we dem did a go chuu fi a wail. Di choch gruo muor an muor kaaz dem di a du we de Laad waahn dem fi du an di Uoli Spirit did a wok wid dem.

Aks 9:35

Evribadi we liv iina Lida an Sheran ton tu di Laad wen dem si wa apm tu im.

Ruoman 14:18

Enibadi we liv an sorv Krais Jiizas da wie de, wi kaaz Gad fi api wid dem an piipl wi rispek dem fi wa dem du.

Ruoman 8:30

An di piipl we Gad maak, im kaal fi bi im piipl. An di piipl we im kaal, Gad put tingz rait bitwiin im an dem. An di piipl we Gad put tingz rait wid, Gad wi mek dem muor an muor laik im.

Ruoman 9:27

An dis a wa Aizaiya did se bout Izrel: “Iivn duo di Izrel piipl nof laik di san we de a sii-said, a onggl likl bit a dem a-go get siev.

1 Korintiyan 1:18

Kaaz di mesij bout ou Jiizas ded pan di kraas fi wi, komiin laik fuulinish tu di wan dem we no biliiv an we a-go go a el. Bot tu wi, di wan dem we siev, it shuo ou Gad powaful.