Aks 2:42 - Di Jamiekan Nyuu Testiment

⁴² Di piipl dem we biliiv Piita mesij spen di uol a dem taim a lorn fram di apasl dem, shier wa dem av wid wan aneda, iit tugeda an prie tu Gad tugeda.

Aks 2:42 ပူးပေါင်းရင်းမြစ်များ

Luuk 24:30

Im sidong a di tiebl wid dem. Jiizas tek bred, gi tangks, brok it an gi dem.

Luuk 24:35

Den dem tel dem wa apm pan di ruod tu Emiyos, an ou a wen Jiizas a brok di bred gi dem, dem pik op se a im.

Aks 1:14

Di uol a dem did eva a miit tugeda fi prie: dem, di uman dem, Mieri, Jiizas mada, an Jiizas breda dem.

Aks 11:23

Wen im riich an si ou Gad did gud tu dem iivn duo dem neva dizorv it, im did wel api an elp push aal a dem fi gwaan chos iina di Laad wid aal a dem aat.

Aks 14:22

a elp di piipl dem we biliiv iina Jiizas fi get chrang iina wa dem biliiv. Dem tel dem fi eng aan pan di chuut we dem biliiv bout Jiizas. Dem tel dem se, “Wi afi go chuu nof sofarieshan fi get iina Gad kindom.”

Aks 2:46

Evridie dem miit op iina di yaad we Gad ous de. Dem go a wan aneda ous an iit fuud tugeda an dem aat did wel api. Dem did api fi shier wid wan aneda.

Aks 20:11

Den Paal go bak opstiez, an afta im brok bred an iit, im taak wid dem fi wan lang taim so til die lait. Afta dat im lef.

Aks 20:7

Pan di fos die a di wiik wen wi gyada op fi brok bred, Paal staat taak tu di piipl. An kaaz im did plan fi lef di neks die, Paal priich til migl nait.

Aks 4:23

Afta dem get let go Piita an Jan go bak tu di ada piipl we biliiv iina Jiizas an go tel dem evriting we di liida fi di priis dem an di elda dem se tu dem.

Aks 4:31

Afta dem don prie, di ous we dem did a miit get shiek op. Di Uoli Spirit tek kanchuol a dem an mek dem priich Gad wod an no fried a notn.

Aks 6:4

an fi wi wok wi bi fi prie an pred Gad mesij bout Jiizas.”

Ruoman 12:12

Wail unu wiet fi di sitn dem we Gad pramis fi gi unu, unu mos api kaaz unu nuo se unu a-go get it. Wen chobl tek unu, unu no fi gi op bot unu mos gwaan uol chrang an unu fi prie aal di taim, neva tap.

1 Korintiyan 10:21

Yu kyaahn a jringk fram di Laad kop an a jringk fram diiman kop tu. An yu kyaahn a nyam a di Laad tiebl an den go nyam a di diiman tiebl.

1 Korintiyan 11:2

Mi afi big unu op kaaz unu a du gud. Unu eva memba di sitn dem we mi did tiich unu an unu aalwiez a fala dem. Unu fala dem jos laik ou mi did se.

1 Korintiyan 14:6

Nou breda an sista, ef mi kom tu unu an a taak iina tongz ou mi fi elp unu ef unu kyaahn andastan wa mi a se? Ou mi fi elp unu ef mi naa kom tel unu bout sopm we Gad shuo mi ar mek mi andastan wen mi a riid im Wod? Ou mi fi elp unu ef a no wan mesij fram Gad mi a kom tel unu ar a no tiich mi a tiich unu sopm fram Gad wod?

Gyalieshan 1:6

Mi fraitn fi si ou unu kwik fi ton we fram Gad we pik unu an we sen Jiizas fi bi gud an kain tu unu. Unu ton we fram di chuu mesij an staat fala som ada mesij.

Ifiijan 2:20

Unu komiin laik wan bildin. Jos laik ou bildin mek pan foundieshan, a siem so unu av wan foundieshan. Fi unu foundieshan a di apasl an prafit dem. An Krais Jiizas a di rakstuon we uol di bildin tugeda.

Ifiijan 6:18

An evritaim unu a prie, mek di Uoli Spirit liid unu. An no mata wa, no tap aks Gad fi elp unu an aal a im piipl iina evriting. Nou dat unu nuo aal a dem sitn ya, wach out an kip unu yai dem waid uopm aal di taim.

Filipiyan 1:5

Mi api fi unu, kaaz fram di fos die unu biliiv unu staat elp mi pred di Gud Nyuuz, an aal nou unu stil a elp mi.

Koloshan 1:23

A so it go, ef unu riili uol aan chrang an gwaan chos iina im, an ef unu no tap luk faawod tu di gud sitn dem unu ier bout wen unu ier di Gud Nyuuz. Piipl pred da Gud Nyuuz de aal uova di worl. An mi, Paal, mi ton Gad sorvant, so mi kyan pred di Gud Nyuuz tu.

Koloshan 4:2

No tap prie. Unu fi wach out an get unu main redi fi akshan an gi Gad tangks wen unu a prie.

2 Timoti 3:14

Bot yu si yu Timoti, gwaan uol aan tait tait pan wa yu lorn an wa yu biliiv iina kaaz yu nuo a uu tiich yu.

Iibruu 10:25

Mek wi gwaan miit tugeda an kip choch — no tap, laik we som piipl a du. Insted-a dat mek wi kom tugeda an taak so wi wan aneda aat kyan get chrangga; wos laka ou di Laad suun kom bak, mek wi du dem sitn de muo an muo nou.

Iibruu 10:39

Bot wi a no non a dem piipl de we ton bak an en op get laas, mash op an dem sitn de. Nuo sa! Wi a wan a dem piipl de we chos iina Gad an so im a siev wi suol.

1 Jan 1:3

Wa wi did si an ier a dat wi a tel unu tu. Wi a tel unu so dat unu kyan muuv kluos wid wi, an wi a muuv kluos wid di Faada an wid im Bwai Pikni Jiizas Krais.

1 Jan 1:7

Bot ef wi liv iina di lait siem laik Gad, wi a liv iina piis wid wan aneda. Da wie de Gad wash we aal a wi sin dem wid im Bwai Pikni blod.

1 Jan 2:19

Dem piipl de lef fram mongks unu, bot dem a neva did riili paat a unu at aal. Ef dem a did paat a unu dem wuda tan wid unu. Bot wen dem lef, dat shuo se dem a neva paat a unu choch at aal at aal.

Juud 1:20

Bot unu piipl we mi lov, gwaan mek unuself chrang iina wa unu biliiv, an mek di Uoli Spirit liid unu wen unu prie.