Aks 13:43 - Di Jamiekan Nyuu Testiment

⁴³ Afta di Juu dem choch uova, nof a di Juu dem an di piipl dem we did ton Juu fala Paal an Baanabas. Paal an Baanabas did a taak tu dem an a tel dem no fi tap chos Gad fi shuo dem lov iivn duo dem neva dizorv it.

Aks 13:43 ပူးပေါင်းရင်းမြစ်များ

Matyu 23:15

“Mi se di Laa tiicha an Farisii piipl dem chobl fu'unu! Unu ipokrit unu! Unu kraas uova lan an sii fi chrai chienj wan sumadi fi go fu'unu wie, an wen da wan sumadi de staat worship Gad fu'unu wie, unu mek dem fit fi go el tuu taim muo dan unu!

Aks 11:23

Wen im riich an si ou Gad did gud tu dem iivn duo dem neva dizorv it, im did wel api an elp push aal a dem fi gwaan chos iina di Laad wid aal a dem aat.

Aks 13:50

Bot di Juu dem rail op di uman dem we rich an we worship Gad, an di big impuotant man dem iina di toun. Dem du som torbl sitn gens Paal an Baanabas an mek dem sofa an ron dem outa dem toun.

Aks 14:22

a elp di piipl dem we biliiv iina Jiizas fi get chrang iina wa dem biliiv. Dem tel dem fi eng aan pan di chuut we dem biliiv bout Jiizas. Dem tel dem se, “Wi afi go chuu nof sofarieshan fi get iina Gad kindom.”

Aks 14:3

So Paal an Baanabas tan de fi wan lang taim. An dem neva fried fi priich fi di Laad. Di mesij we dem did a priich bout ou di Laad lov piipl iivn duo dem no dizorv it, di Laad pruuv se a chuu dem did a taak wen im gi dem powa fi du aal kain-a mirikl an sain.

Aks 16:14

Yu did av wan uman mongks dem fram Taiyataira niem Lidiya we yuus tu sel som dier porpl klaat. Shi did lov Gad so moch dat shi aalwiez a du di sitn dem we shi nuo Gad waahn ar fi du. Di Laad toch ar aat mek shi andastan an biliiv wa Paal did a se.

Aks 17:17

So evridie im go a di Juu dem choch, an iina di maakit go taak tu di piipl dem we did de de; piipl we a Juu an piipl we a no Juu we worship Gad.

Aks 17:34

Bot som piipl biliiv Paal an jain op wid im. Som a dem we biliiv a did Daiyoniisis, im a did wan memba fi di Ieriyapagos, an wan uman niem Damaris, an som muor piipl tu.

Aks 17:4

Som a di Juu dem biliiv wa Paal did a se a chuu, so dem jain Paal an Sailas, som uol iip a Griik piipl we worship Gad an nof uman uufa ozban dem a did tap-a-tap man.

Aks 18:7

Den Paal lef di Juu dem choch an go a Taitos Jostos ous. Jostos a did wan man we a no Juu, bot im worship Gad an im ous did de rait saida di Juu dem choch.

Aks 2:10

piipl we kom fram Frijiya, Pamfiliya, Iijip an di paat a Libiya we nier Sairiin; piipl we kom fram Ruom an jos a tan de likl,

Aks 28:23

So dem set di taim fi miit wid im. Wen dem shuo op a im ous fi di miitn, uol iip muor a dem kom dan di fos taim. Fram maanin til iivnin, Paal taak tu dem an elp dem andastan di mesij bout Gad kindom an Jiizas. An im yuuz di Laa we Muoziz did rait dong, an wa di prafit dem did rait fi get dem fi biliiv se wa im did a tel dem bout Gad kindom a chuu.

Aks 6:5

Aal a di piipl dem we did biliiv iina Jiizas did api fi du wa di apasl dem did se dem fi du. So dem pik Stiivn, wan man we biliiv iina Gad nof nof an we di Uoli Spirit kanchuol. An dem pik Filip, Prakoros, Nekenor, Timon, Paaminas, an Nikolas we did ton wan Juu an we did kom fram Antiyak.

Ruoman 11:6

A no notn we dem du mek im pik dem, im pik dem kaaz im mek op im main fi shuo dem lov iivn wen dem no dizorv it. Ef a neva so it go, ef Gad did a pik piipl bies pan wa dem du, den a no gud an kain im wuda a gud an kain tu piipl.

Ruoman 3:24

Bot iivn duo wi no dizorv it, Gad shuo wi lov. So moch so dat im mek tingz rait bitwiin wi an im, an wi neva iivn afi du notn. Im sen Jiizas Krais fi ded fi wi an tek we wi sin dem.

Ruoman 5:2

Aal a di gud sitn dem we wi a get fram Gad an we wi no dizorv, wi a get dem siek-a wa Jiizas Krais did du an kaaz wi biliiv. An wi wel api kaaz wi nuo fi shuor se Gad a mek wi muor an muor laik im.

Ruoman 5:21

Im du dat, so dat, jos laik ou evribadi evriwe did a ded siek-a dem sin, a siem so Gad lov, iivn duo wi neva dizorv it, wuda kaaz piipl fi liv fi eva. Siek-a Gad lov an siek-a wa wi Laad Jiizas Krais du, Gad put tingz rait bitwiin im an piipl an mek dem liv fi eva an eva.

2 Korintiyan 5:11

So kaaz wi av nof rispek fi di Laad an chuu wi nuo se im a-go joj evribadi, wi du aal we wi kyan du fi win piipl uova fi Gad. Gad nuo se wi onggl priich wa im waahn wi fi priich an mi uop se, iina unu aat, unu nuo se a dat wi a du.

2 Korintiyan 6:1

So sins wi wok wid Gad, wi a beg unu, im so gud an kain tu unu, no mek it kom tu notn, no bada wies it.

Gyalieshan 5:1

Gad frii wi so dat wi wudn afi fala di Laa. So tan op chrang an no mek notn ar nobadi tek unu ton unu bak iina sliev.

Gyalieshan 5:4

Yu si di wan dem we gaan bak gaan fala di Laa an tingk se dat a-go mek tingz rait bitwiin dem an Gad — dem kot aaf demself fram Krais Jiizas. Unu a mek it so dat Gad naa go kyan gud an kain tu unu.

Ifiijan 2:8

Gad siev unu kaaz im lov unu iivn duo wi no dizorv it, an kaaz unu chos iina im. A no siek-a notn we unu du mek im siev unu. Di nyuu laif we Gad gi unu a wan prezent.

Filipiyan 3:16

Eniwie, mek wi gwaan uol aan pan wa Gad mek wi nuo aredi.

Filipiyan 4:1

Mi breda an sista, mi lov unu, an mi mis an lang fi si unu so til. Unu mek mi api, an mi kyan riili buos bout unu, kaaz unu komiin laik wan kroun we mi get fi mi aad wok. So mi waahn unu fi tan op chrang iina wa unu biliiv bout di Laad.

Koloshan 1:23

A so it go, ef unu riili uol aan chrang an gwaan chos iina im, an ef unu no tap luk faawod tu di gud sitn dem unu ier bout wen unu ier di Gud Nyuuz. Piipl pred da Gud Nyuuz de aal uova di worl. An mi, Paal, mi ton Gad sorvant, so mi kyan pred di Gud Nyuuz tu.

Koloshan 1:28

Wi pred di mesij bout im. Wi waan piipl an tiich piipl bout wa dem no fi du an wa dem fi du. Wen wi waan an tiich, wi yuuz aal a di sens dem we Gad gi wi. An wi du aal a dis ya so evribadi kyan kom kluos tu Krais Jiizas, an kyan kom ton ou Gad waahn dem fi ton, an no shaat a notn wen wi tek dem go infronta Gad.

Taitos 2:11

Gad shuo ou im lov wi iivn duo wi no dizorv it wen im mek wan wie fi piipl get siev.

Iibruu 12:15

Gad lov wi iivn duo wi no dizorv it, so mek shuor se nobadi no ton dem bak pan wa im du fi dem. An mek shuor se nobadi no galang laik bita ruut we gruo kom ton bita chrii. Dem piipl de wi kom kom mek chobl an brok out wan bag a piipl. Mek shuor se dat no apm.

Iibruu 13:9

No mek di chrienj sitn dem we piipl go bout an a tiich mek unu chrie we. Kaaz a no ruul bout wa unu fi nyam an no nyam, mek di aat chrang. Bot a ou Gad lov wi so moch iivn duo wi no dizorv it — an a wan gud sitn dat. Di ruul dem bout wa piipl fi nyam neehn elp di piipl dem we did a fala dem.

1 Piita 5:12

Silvanos, uu a laik mi breda, we riili chos iina Jiizas, a im elp fi rait da leta ya, so widoutn mek it tuu lang, mi rait fi jos elp unu fi gwaan uol aan pan Gad, an fi tel unu chrang chrang se wa Gad du fi unu riili a shuo se im lov unu bad bad. Tan op chrang iina da lov de.

2 Piita 3:14

So fren, wail unu a wiet pan dis, unu fi mek shuor se unu liv rait, an no mek Gad fain no faalt wid unu.

1 Jan 2:28

Breda an sista, tan iina Krais Jiizas so dat wen im kom bak wi no afi fried an ron go aid iina shiem.

2 Jan 1:9

Ef nobadi ton we fram di sitn dem wa Krais Jiizas tiich, im no av Gad iina im. Bot di sumadi we uol aan tait tu di sitn dem bout Krais Jiizas, da sumadi de av Faada Gad an im Bwai Pikni a liv iina im.