Aks 13:26 - Di Jamiekan Nyuu Testiment

²⁶ “Breda an sista we a Iebriyam pikni, an aal a unu we a no Juu we rispek Gad, a wi di mesij kom tu bout ou Gad siev piipl.

Aks 13:26 ပူးပေါင်းရင်းမြစ်များ

Matyu 10:6

Wa unu fi du, a go tu di Izrel piipl dem we komiin laik wan set a laas shiip.

Matyu 3:9

An no bada se dis an tingk se unu sief: ‘A Iebriyam a wi faada.’ Mek mi tel unu sopm, Gad kyan mek pikni fi Iebriyam outa dem rakstuon ya ef im waahn!

Luuk 1:69

Im sen wan powaful sumadi fi siev wi. Da powaful sumadi ya kom fram di fambili a Gad sorvant Dievid.

Luuk 1:77

Yu a-go mek Gad piipl nuo se di Laad a kom fi siev dem; Im a-go paadn dem so dem kyan get siev.

Luuk 24:47

an iina fi mi niem unu fi priich an tel di piipl dem we a no Juu fi ton tu Gad an get paadn fi we dem du rang. Staat rait ya-so iina Jeruusilem.

Jan 6:68

Saiman Piita ansa im an se, “Laad, a uu els wi mos go tu? A yu av di mesij we kaaz piipl fi liv fi eva.

Aks 10:2

Im an im uol fambili aalwiez worship Gad. Nof taim im wuda elp puo piipl an im aalwiez a prie tu Gad.

Aks 10:35

bot enibadi, no mata wich konchri dem kom fram, ef dem worship im an aalwiez du we rait, im wi tek dem fi'im piipl.

Aks 13:43

Afta di Juu dem choch uova, nof a di Juu dem an di piipl dem we did ton Juu fala Paal an Baanabas. Paal an Baanabas did a taak tu dem an a tel dem no fi tap chos Gad fi shuo dem lov iivn duo dem neva dizorv it.

Aks 13:46

Bot Paal an Baanabas neva fried fi tel dem di chuut. Dem se, “Wi did afi priich Gad wod tu unu fos bifuo wi kuda priich tu di piipl we a no Juu, kaaz a dat Gad tel wi fi du. Bot unu ton unu bak pan Gad mesij an se a lai wi a tel. Da wie de unu ton unu bak pan Gad. An unu tingk se unu neva gud inof fi liv wid im fi eva an eva laik wa im did pramis. So fram nou aan, wi a lef unu an go priich Gad mesij tu di piipl dem we a no Juu.

Aks 16:17

Shi kip aan a fala baka wi an Paal an a baal out, “Dem man ya a di Muos ai Gad sorvant dem. Dem a priich an a tel unu di wie ou unu fi get siev.”

Aks 22:5

Di liida fi di priis dem an di uol gruup a elda dem kyan tel unu bout mi kaaz dem did aal gi mi leta fi kyari tu wi breda dem iina Damaskos we a Juu. So mi go de go ares di piipl dem we did a fala di Wie ou Jiizas se dem fi liv an kyari dem kom a Jeruusilem kom ponish dem.

Aks 28:28

“So mi waahn unu fi nuo se Gad mesij bout ou im a-go siev piipl a-go go tu di piipl dem we a no Juu. Dem wi lisn!”

Aks 3:26

So wen Gad riez op Jiizas im sorvant, im sen im kom a unu fos fi bles unu. Im bles unu wen im kaaz unu fi ton we fram unu wikidnis.”

Aks 4:12

A onggl Jiizas wan kyan siev piipl, an a fi'im niem Gad gi piipl. Nobadi els iina di uol worl kyaahn siev yu.”

Aks 5:20

“Go tan op iina di yaad we Gad ous de an tel di piipl dem evriting bout da nyuu wie ya fi liv.”

Ruoman 1:16

Mi no shiem fi priich di Gud Nyuuz kaaz it powaful. A di Gud Nyuuz Gad yuuz fi siev aal a di piipl we chos iina Jiizas. Im yuuz it fi siev di Juu dem fos an den im yuuz it fi siev di piipl dem we a no Juu.

Ifiijan 1:13

An wen unu did ier Gad wod — di chuu mesij we siev unu — wen unu biliiv iina Krais Jiizas, Gad gi unu im Uoli Spirit we im did pramis, fi shuo se unu a fi im.

Koloshan 1:5

Unu du dem sitn de kaaz unu a luk fi get wa Gad put op iina evn fi wi, an unu nuo fi shuor se unu a-go get dem. Wa Gad put op a di sed sitn dem we unu did ier bout wen unu did ier di Gud Nyuuz, an da mesij de chuu.