Aks 11:18 - Di Jamiekan Nyuu Testiment

¹⁸ Wen dem ier aal we Piita se dem tap aagyu wid im. Insted-a dat dem staat priez Gad an se, “So den Gad gi di piipl we a no Juu di chaans fi ton we fram dem sin an get siev so dem kyan liv fi eva an eva.”

Aks 11:18 ပူးပေါင်းရင်းမြစ်များ

Matyu 9:8

Wen di kroud a piipl si dis ya, dem kech dem fried an staat big op Gad, kaa a im gi piipl di rait an powa fi du dem sitn ya.

Aks 11:1

Di apasl dem an di ada breda an sista dem aal uova Judiya we biliiv iina Jiizas ier se di piipl we a no Juu biliiv Gad wod tu.

Aks 14:27

Wen dem riich a Antiyak, Paal an Baanabas gyada op di choch piipl an tel dem evriting we Gad did gi dem powa fi du, an ou Gad gi di piipl we a no Juu di chaans fi biliiv iina im.

Aks 15:3

Di choch sen dem aaf, an wen dem did a go chuu Foniisiya an Samieriya dem tel di piipl dem we biliiv iina Jiizas ou nof a di piipl we a no Juu iina Antiyak biliiv di gud nyuuz. Dat mek di biliiva dem wel api.

Aks 20:21

An mi neva fried fi tel piipl we a Juu an piipl we a Griik fi ton we fram dem sin, shuo se dem sari fi wa dem du, ton tu Gad, an biliiv iina Jiizas.

Aks 21:20

Wen dem ier dis, dem priez Gad. Den dem se tu im se, “Breda, yu si di touzn an touzn a Juu iina Jeruusilem we biliiv iina Jiizas, an aal a dem biliiv an fala di Laa dong tu di laas leta.

Aks 3:19

So ton we fram unu sin, beg Gad paadn an kom bak tu im, so dat im wi tek we unu sin dem.

Aks 3:26

So wen Gad riez op Jiizas im sorvant, im sen im kom a unu fos fi bles unu. Im bles unu wen im kaaz unu fi ton we fram unu wikidnis.”

Aks 5:31

Gad big op Jiizas an put im fi sidong a im rait an. Im mek Jiizas wan liida an di wan we a-go siev piipl so dat di Izrel piipl wuda get di chaans fi ton we fram dem sin, shuo se dem sari, an get dem sin paadn.

Ruoman 9:30

So den wa wi kyan se bout aal a dat? Wi kyan se dat di piipl we a no Juu, dem neva did a luk fi Gad put tingz rait wid dem, bot Gad mek tingz rait bitwiin im an dem kaaz dem chos iina im.

2 Korintiyan 3:18

An so aal a wi we bilang tu Jiizas, fi wi fies no kova op an wi kyan luk pan di Laad brait brait lait. An di Uoli Spirit we a di Laad kaaz wi fi shain brait brait tu. An muor an muor im a mek wi laik imself, til wan die wi a-go luk jos laik im.

2 Korintiyan 7:10

Kaaz ef sumadi a sin, an dem sari fi wa dem du laik ou Gad waahn dem fi sari, dem wi ton we fram dem sin an beg Gad fi paadn dem. An wen dem du dat Gad wi siev dem. Nobadi naa go se dem sari se dat apm. Bot ef sumadi a sin an no sari ou Gad waahn dem fi sari, dem a-go gwaan sin an dem naa go get siev. Dem a-go ded.

Gyalieshan 1:24

An dem priez Gad siek-a wa apm tu mi.