2 Timoti 1:8 - Di Jamiekan Nyuu Testiment

⁸ So no shiem fi tel di piipl dem bout Gad. No shiem fi se yu nuo mi niida, jos chuu dem fling mi iina jiel kaaz mi sorv Gad. Yuuz di powa we Gad gi yu. Sofa wid mi an gwaan tel di piipl bout Gad.

2 Timoti 1:8 ပူးပေါင်းရင်းမြစ်များ

Ruoman 1:16

Mi no shiem fi priich di Gud Nyuuz kaaz it powaful. A di Gud Nyuuz Gad yuuz fi siev aal a di piipl we chos iina Jiizas. Im yuuz it fi siev di Juu dem fos an den im yuuz it fi siev di piipl dem we a no Juu.

Maak 8:38

Kaaz ef nobadi shiem a mi an fi mi mesij iina da worl ya we ful op a sin an piipl we ton dem main gens Gad, di Man we Gad Pik naa go av notn fi du wid dem wen im kom iina im Faada brait brait lait wid im uoli ienjel dem.”

2 Timoti 4:5

Bot yu si yu Timoti, yu afi kanchuol yuself iina evriting. Yu a-go fies nof chobl bot yu mos push chuu it an gwaan priich Gad wod. An kaaz yu a Gad sorvant yu mos du aal di wok we im gi yu fi du.

Revilieshan 12:11

Gad piipl biit di devl an no gi iin tu di sitn dem we im waahn dem fi du, kaaz dem neva tap biliiv iina Jiizas we did gi op im laif pan di kraas fi dem. An dem neva tap pred di Gud Nyuuz bout Jiizas. An dem neva lov dem laif so moch dat dem wuda fried fi ded.

2 Timoti 2:9

A chuu mi a tiich da mesij ya mek mi a sofa so. An a kaaz mi tiich da mesij ya mek dem fling mi iina prizn an chriit mi laik se mi a kriminal. Bot dem kyaahn tap Gad mesij ar lak it op laik ou dem lak mi op iina prizn.

2 Timoti 1:12

A kaaz mi tiich di Gud Nyuuz mek mi a sofa nou. Bot iivn duo mi iina prizn mi no shiem, kaaz mi nuo uu mi biliiv iina. An mi nuo se im wi kip sief aal a di sitn dem we im chos mi wid til di die Gad kom fi joj wi.

Ifiijan 3:1

Krais Jiizas mek mi, Paal, im prizna, so mi kuda priich tu unu we a no Juu.

Filipiyan 3:10

Aal mi kier bout a fi nuo Krais Jiizas, an dat di powa we mek im kom bak alaiv wi wok iina mi. Mi waahn fi kyan go chuu eniting we mi afi sofa fi du we Gad waahn mi fi du, siem laik ou Krais Jiizas go chuu we im did sofa fi du we Gad did waahn im fi du. An siem laik ou im ded fi di rait riizn, mi mek op mi main fi ded fi im tu,

Luuk 9:26

Ef enibadi shiem a mi an wa mi tiich, wen di man we Gad Pik kom, im a-go shiem a dem tu. Wen im kom im lait a-go shain roun im. An di lait we shain roun di Faada an di uoli ienjel dem, a-go shain roun im tu.

2 Timoti 1:16

Mi prie se Gad wi gud an kain tu Onisiforos an im fambili. Kaaz im neva shiem fi kom luk fi mi iina jiel an fi mek mi aat api.

Ifiijan 4:1

So den, mi we de a prizn kaaz mi a sorv di Laad, a beg unu — unu we Gad pik fi bi im piipl; mi a beg unu fi liv ou Gad waahn unu fi liv.

Revilieshan 1:9

Mi a Jan, unu breda an fren we a go chuu di siem sofarieshan we unu a go chuu. Aal a wi a-go tek paat iina Gad kindom, an siem laik unu, mi naa gi op — mi wi gwaan sofa til Gad kom bak. Kaaz mi priich Gad wod an tel piipl aal a di sitn dem we Jiizas shuo mi, dem put mi pan wan ailan niem Patmos.

Juud 1:24

Di onggl Gad, di wan we siev unu, av powa fi kip unu fram tombl dong iina di devl chrap. Im wi mek unu tan op infronta im iina im brait brait lait wen im kom bak iina aal a im powa, an mek unu wel api an no fain no faalt wid unu.

1 Piita 1:5

Di siem wie Gad tek kier a dem, a siem so im powa a-go kip unu sief tu, kaaz unu chos iina im. Im a-go kip unu sief an siev unu iina evri wie, an a pan di laas die unu a-go si aal a dat.

2 Timoti 2:3

Sins yu a wan a Krais Jiizas gud suoja dem, yu afi go chuu nof sofarieshan laik di res a Jiizas suoja dem. Mek shuo se yu uol aan.

1 Tesaluoniyan 3:4

Memba wen wi did de wich paat unu de, wi did waan unu lang bifuo it apm se wi did a go sofa? An si de — a dat apm! Unu don nuo dat aredi.

Filipiyan 1:7

Mi nuo se it aarait fi mi tingk da wie ya bout aal a unu, kaaz mi lov unu an aal a unu elp mi wen mi did a tan op an a difen di Gud Nyuuz, weda mi did lak op iina prizn ar mi did frii. Aal a unu tek paat iina di gud sitn we Gad gi mi fi du, iivn duo wi no dizorv it.

Ifiijan 3:13

So, mi a beg unu, no bada fiil bad an fiil laik se unu waahn fi gi op, siek-a ou mi a sofa. No du dat, kaaz wa mi a sofa a fi unu uona gud.

Ruoman 16:25

Mek wi priez Gad — Gad we kyan mek unu tan op chrang iina wa unu biliiv azkaadn tu di Gud Nyuuz we mi priich bout Krais Jiizas, an azkaadn tu di chuu sitn dem we a did siikrit fram lang lang taim a bak,

1 Jan 4:14

Faada Gad sen im Bwai Pikni fi siev wi. Wi did si im, an wi a tel evribadi bout im.

2 Timoti 4:17

Bot di Laad did tan op saida mi an gi mi chrent. Im gi mi chrent so dat mi kuda priich di uol a im mesij tu di piipl dem we a no Juu. An im siev mi fram di piipl dem we did waahn fi fling mi gi di laiyan dem.

Filipiyan 4:13

Mi kyan du eniting, kaaz Krais Jiizas gi mi di powa fi du it.

Ruoman 9:33

A dat Gad wod did a taak bout. It rait dong se Gad se: “Lisn Gud! Mi a put wan stuon iina Zaiyan we a-go chrip piipl — wan stuon we a-go kaaz piipl fi faal dong. Bot di piipl we biliiv iina mi, mi naa go mek dem shiem.”

Aks 5:41

So di apasl dem lef di miitn wel api kaaz Gad did tingk dem gud inof fi mek dem sofa fi Jiizas Krais.

Revilieshan 19:10

Wen mi ier dis, mi jrap pan mi nii a im fut fi worship im. Bot im se tu mi se, “No, yu kyaahn du dat! Mi sorv Gad jos laik yu an yu breda an sista dem we biliiv evriting we Jiizas tiich. So a Gad yu fi worship, kaaz di chuu sitn dem we nobadi neva nuo an we Jiizas shuo wi, a dat lou piipl fi pred Gad mesij!”

Revilieshan 1:2

An Jan rait dong evriting wa im did si an ier. Im rait dong aal a di mesij dem we Gad sen im, an evriting we Jiizas Krais shuo im.

1 Korintiyan 1:6

An sins unu kyan du dem sitn de, dat shuo se di mesij we wi did bring kom gi unu bout Krais Jiizas — a chuu sopm.

Jan 19:35

Di sumadi we si dem sitn ya apm taak bout dem, so unu kyan biliiv iina Jiizas. (Wa im taak bout a chuu. A no lai. An im nuo se a chuu im a taak.)

Koloshan 1:24

Rait ya nou, mi api se mi a sofa fi unu. Mi a sofa laik ou Krais Jiizas did sofa, so mi kyan go chuu aal a we mi fi go chuu. Di sofarieshan mi a go chuu a fi mek gud sitn apm tu di choch, Krais badi.

Ifiijan 4:17

So, lisn nou! Mi a Gad sorvant so mi av di rait fi tel unu wa unu fi du. Unu no fi liv no muo laik di piipl dem we no nuo Gad. We dem piipl de main tel dem fi du no mek no sens.

2 Korintiyan 6:7

Wi onggl tiich di chuut an Gad powa a wok iina wi. An siem laik ou suoja yuuz di wepan iina dem lef an fi protek demself an di wan iina dem rait an fi fait di piipl dem we a kom gens dem a siem so di gud we wi du wi fait an protek wi fram evriting we wuda kom gens wi.

Ruoman 8:36

It rait dong iina Gad wod se: “Kaaz wi bilang tu yu, piipl chrai fi kil wi aal di taim; dem chriit wi laik shiip we dem plan fi kil.”

Jan 15:27

An unu fi tel piipl bout mi tu, kaa unu did de wid mi fram di staat.

1 Timoti 2:6

Jiizas gi op im laif so dat im kuda bai bak evribadi an frii dem fram sin. Wen Jiizas ded, im shuo se Gad did av wan plan fi siev piipl bot iina fi im uona taim.

Koloshan 1:11

An wi prie se Gad wi tek fi im powa an mek unu wel chrang, so unu kyan uol aan no mata wa, an no grombl grombl, bot a sing sang iina unu aat

2 Timoti 1:10

Nou Jiizas Krais wi sievya shuo wi ou im kain wen im kom an mek it so dat wi kyaahn ded. Im tiich di Gud Nyuuz so dat wi kuda andastan wa it miin fi liv fi eva.

2 Timoti 2:8

Memba uu Krais Jiizas bi. Jiizas a di wan we Gad bring bak fram di ded an we kom fram di siem fambili we Dievid kom fram. Dat a di mesij we mi tiich.