2 Tesaluoniyan 1:8 - Di Jamiekan Nyuu Testiment

⁸ wid wan faiya we a bliez. Im a-go bring dong jojment pan aal a uu no nuo Gad an dem de we no fala di Gud Nyuuz bout wi Laad Jiizas.

2 Tesaluoniyan 1:8 ပူးပေါင်းရင်းမြစ်များ

1 Piita 4:17

Kaaz jojment taim kom ya nou; an wi we a Gad piipl, a wi it a staat wid fos. So, a wa a-go apm tu aal a di piipl dem we no biliiv Gad Gud Nyuuz?

2 Piita 3:7

An a Gad siem wod a kip di evn an di ort ya nou til jojment die wen im a-go bon dem op iina faiya an ponish di piipl dem we no bizniz wid wa im se.

Iibruu 10:27

Bot notn no lef fi wi du dan fi wiet an fried a Gad jojment we a kom, plos di wikid wikid faiya we im a-go tek bon op di piipl dem we fait gens im.

Iibruu 10:30

Kaaz wi nuo a uu se, “A mi a di wan we a-go ponish piipl fi di wikidnis we dem du, an mi a-go pie dem bak fi aal a di bad sitn dem we dem du.” An wan neks taim im se, “Di Laad wi joj im piipl dem.”

Iibruu 2:3

den a ou wi a-go get we, ef wi ton wi bak pan da impuotant mesij ya bout ou Gad a-go siev wi, an no pie it no main, iihn? A di Laad Jiizas imself did fos tel piipl bout it yu nuo. An den di piipl dem we did ier im, mek wi nuo se it go so fi chuu.

Gyalieshan 4:8

Iina di paas, wen unu an Gad neva kluos, unu a did sliev. Unu a did sliev tu di sitn dem we unu kaal gad bot we a no riili gad at aal.

Ruoman 6:16

Unu mos nuo se, wen unu tek unuself ton sumadi sliev an se unu a-go fala unu maasta, unu afi du evriting we unu maasta se. Nou unu kyan chuuz fi mek sin unu maasta an ded ar unu kyan mek Gad unu maasta an mek im put tingz rait bitwiin unu an im.

Matyu 25:41

“Den di king a-go se tu aal uu de pan im lef-an-said se, ‘Gwe fram saida mi! Gwaan go bon op iina di faiya we a bliez fi eva an eva. A it Gad did fiks op fi di devl an im ienjel dem, bot im a sen unu go de tu!

Revilieshan 20:10

An di devl, we fuul dem op, get fling dong iina di siem liek a faiya we a bon wid solfa we di wail animal an di faalz prafit did get fling iina. Aal a dem a sofa wikid wikid die an nait fi eva an eva.

Iibruu 12:29

Kaaz fi riil, wi Gad a laik wan faiya we bon op tingz.

Revilieshan 21:8

Bot di wan dem we a kowad, we no biliiv iina Gad, we mek demself doti wid aal a di naasi sitn we dem du, we kil piipl, we tek paat iina aal kain-a seks sin, we wok uobiya, we worship faalz gad an we tel lai — dem a-go get fling dong iina di liek a faiya we a bon wid solfa. A dis a di sekan det.”

Revilieshan 6:10

Di suol dem anda di alta kaal out wid wan loud vais, “Ou lang, powaful Laad, yu we uoli an we aalwiez du we Gad waahn yu fi du, ou lang yu a-go wiet fi joj an ponish di piipl dem pan ort we kil wi aaf?

1 Tesaluoniyan 4:5

Unu no fi go roun an a dabl-dabl iina seks sin laik di worliyan dem we no nuo Gad.

Ruoman 1:28

Dem nuo di chuut bout Gad bot dem mek op dem main se dem naa biliiv it. So Gad lef dem fi du aal a di sitn dem we dem doti main tel dem fi du im lef dem fi du di sitn dem we dem no fi du.

Aks 6:7

Gad mesij bout Jiizas pred muo an muo, an muo an muo piipl biliiv iina Jiizas an wan uol iip a di priis dem biliiv di Gud Nyuuz tu.

Jan 3:19

“Nou, a dis ya mek piipl get rait aaf: di wan we a di lait kom iina di worl, bot di piipl dem we liv iina di worl lov daaknis insted-a lait. Dem lov di daak, kaa a bier wikidnis dem du.

Matyu 25:46

“An dem piipl ya, dem a-go go wich paat dem get ponish fi eva, bot di wan dem we du we rait iina Gad yai, Gad a-go mek dem liv fi eva.”

1 Piita 3:6

Luk pan Siera. Shi du wa Iebriyam tel ar fi du, an shi kaal im ar maasta. An unu a fi ar daata ef unu du wa rait an no fried a notn.

1 Piita 1:2

Faada Gad pik unu fi wan riizn, jos laik im did a plan fi du lang bifuo unu baan. An im Spirit kliin op unu aat so unu kyan fala wa Jiizas Krais se. An Jiizas blod mek unu kliin tu. Mi prie se Gad wi aalwiez shuo unu im lov iivn duo wi no dizorv it an gi unu piis iina unu aat.

Iibruu 11:8

Kaaz Iebriyam chos iina Gad, wen Gad kaal im, im lisn. An so im go a wan plies we im did bout fi get fram Gad, im go de iivn duo im neehn nuo a wich paat im did a go.

Iibruu 5:9

An nou dat im go chuu aal a dat, an kom ton aal a we im sopuoz fi bi, im en op ton di wan we siev piipl fi eva, so langks dem du wa im tel dem fi du.

Gyalieshan 3:1

Unu fuul-fuul Gyalieshan unu! A uu guzum unu? Mi tel unu klier klier tu unu fies ou Jiizas did ded pan di kraas.

2 Korintiyan 10:5

an di sitn dem we dem se chuu dem ful-a demself, an we komiin laik wan waal a tap piipl fram nuo Gad. Wi a-go tier it dong. Di sitn dem we dem tingk an se, komiin laik wi enimi an siem laik ou suoja kech dem enimi an fling dem iina prizn, a siem so wi a-go kech evriting we dem tingk an fuos dem fi fala wa Krais Jiizas se.

1 Korintiyan 15:34

Unu fi wiek op, tek kanchuol a unuself an tap sin. Unu shuda shiem, kaaz som a unu no nuo Gad at aal.

Ruoman 16:26

bot we Gad mek wi nuo bout nou. Gad we liv fi eva an eva, tel di prafit dem fi rait dong dem sitn ya iina Gad wod, an sen out piipl fi priich bout it so dat evribadi wuda nuo di chuut an staat fi biliiv an fala Gad.

Ruoman 15:18

Mi wudn mad fi taak bout notn bot di wok we Krais Jiizas yuuz mi fi du — di wok we kaaz di piipl we a no Juu fi staat du aal a wa Gad se dem fi du. Dem staat fala Gad siek-a di sitn dem we mi se an du,

Ruoman 10:16

Bot a no evribadi did biliiv an fala wa di Gud Nyuuz se. Laik Aizaiya did se “Laad, mi priich yu mesij, bot uu biliiv it?”

Ruoman 1:5

Gad kaaz Jiizas fi gud an kain tu mi an fi mek mi wan a im apasl dem, iivn duo mi neva dizorv it. Im mek mi wan apasl so dat mi kuda sorv Jiizas Krais an elp di piipl dem we a no Juu fi biliiv iina im an fala aal a wa im se.

Jan 8:19

“So den, we paat yu Faada de?” di Farisii dem aks im. “Unu no nuo mi ar mi Faada,” Jiizas se tu dem. “Ef unu did nuo mi, unu wuda nuo mi Faada tu.”

Juud 1:7

A siem so Sadam an Gomaro an di piipl dem we liv nier dem tek paat iina aal kain-a seks sin an ron aafa aal kain-a naasinis. Gad bon dem op wid faiya we a-go bon fi eva an eva mek evribadi si wa wi apm ef dem fala dem wikid piipl de.