2 Piita 2:13 - Di Jamiekan Nyuu Testiment

¹³ An fi aal a di bad sitn dem we dem du, som bad sitn a-go riich dem. Wa dem kaal fon, a fi du eniting we dem badi waahn, an dem a du dem sitn de iina braad die lait tu! Dem a piis a shiem an disgries, an a shiem an disgries dem a-go bring dong pan unu wen dem kom fi iit fuud wid unu an a galang dem siem kain-a wie de.

2 Piita 2:13 ပူးပေါင်းရင်းမြစ်များ

Ruoman 13:13

So mek wi liv ou wi nuo wi fi liv, mek wi liv laik piipl we iina di lait, no laik piipl we iina di daak. Wi no fi tek paat iina no wail seks paati an wi no fi jringk til wi jongk. Wi no fi a sliip roun sliip roun ar a tek paat iina no kain-a seks sin. Unu no fi lov fait an unu no fi red yai fi ada piipl tingz.

Ifiijan 5:27

Krais Jiizas du dis so im kuda gi op im choch tu imself laik wan gruup a piipl we luk wel gud — wan we no av no doti spat, no ringkl ringkl, ar notn laik dat, bot wan we gud an kliin an no av no faalt at aal.

Filipiyan 3:19

Dem piipl de, fi dem gad a dem beli an wa dem badi waahn. Di sitn dem we dem shuda shiem bout, a dem sitn de dem a buos bout. Di onggl ting we ful op dem main a di sitn dem we iina da worl ya. Gad gweehn mash dong dem piipl de.

2 Timoti 4:14

Aligzanda, di wan we wok wid metal, du nof wikid sitn tu mi. Gad a-go pie im bak fi aal we im du.

Jiemz 5:5

Unu a liv big laif pan ort. Unu get evriting unu waahn fi mek unu api. Bot rait ya nou, unu komiin laik dem big fat kou we dem a kyari go a bucha shap fi go kil.

1 Piita 4:4

An nou, dem piipl de we a gwaan wid di siem kain-a naasinis an wikidnis, dem no tap chat unu, an a se aal kain-a sitn bout unu, kaaz dem kyaahn andastan wa riili a gwaan. Ou kom unu naa ron galang wid dem, an a du di sed sitn dem laik wan taim?

2 Piita 2:15

Dem ton aafa di rait ruod an gaan gaan fala di ruod we Bielam tek. Bielam did a Biyuor pikni, an im did lov di moni we im get a du wikidnis.

Revilieshan 18:6

Du ar bak di siem ting shi du ada piipl; di sitn dem we shi du ada piipl, pie ar bak tuu taim. An di kop a wain we shi miks gi ada piipl, gi ar bak tuu kop ful.