2 Piita 2:10 - Di Jamiekan Nyuu Testiment

¹⁰ An aal di wan dem we eva gi iin tu wa dem badi waahn an iet nobadi we ruul uova dem, a dem im a-go ponish wikid wikid. Dem faalz tiicha ya, so brait an out-a-aada an tingk se dem nuo muo dan evribadi els, so dem mosn lisn wa nobadi se. An dem no fried fi bad mout di spirit dem we av powa fi ruul uova piipl.

2 Piita 2:10 ပူးပေါင်းရင်းမြစ်များ

Luuk 11:25

Wen it kech bak, it fain se di ous swiip kliin an evriting niit an taidi.

Luuk 19:14

“Bot di piipl dem we liv wich paat im kom fram did iet im. So dem sen piipl baka im fi se, ‘Wi no waahn da man ya fi ton wi King.’

Aks 23:5

Paal ansa se, “Mi breda, mi neva nuo se im a did di liida fi di priis dem, kaaz it rait dong iina Gad wod se, ‘Yu no fi chat bad bout di ruula fi yu piipl.’ ”

Ruoman 8:1

So nou, di piipl we biliiv iina Krais Jiizas an we ton wan wid im, Gad naa go luk pan dem an se dem gilti an mos get ponish.

1 Korintiyan 6:9

Unu no nuo se di wikid naa go av no paat iina Gad kindom? No bada fuul unuself! Di piipl dem we tek paat iina aal kain-a seks sin an we worship faalz gad naa go tek paat iina Gad kindom. Piipl we sliip wid piipl dem no marid tu, piipl we sel dem badi fi moni, man we sliip wid man an uman we sliip wid uman, dem naa go si Gad kindom at aal.

2 Korintiyan 10:3

Kaaz iivn duo wi liv iina di worl wi no fait laik ou di worliyan dem fait.

Ifiijan 4:19

Dem no kier bout we rait ar rang no muo, kaaz dem no av no shiem. Dem eva waahn fi du di sitn dem we dem badi waahn — aal saat a naasi an wikid sitn. Dem jos kyaahn satisfai. Di muo dem du rang, a di muo rang dem waahn fi du.

Ifiijan 5:5

Unu kyan nuo fi shuor se enibadi we sliip wid sumadi dem no marid tu, dem kyaahn tek paat iina di nais sitn dem we put op fi Gad piipl iina Faada Gad an Krais Jiizas kindom. Di siem ting go fi dem we du naasinis an dem we waahnti-waahnti (dem piipl de a worship faalz gad).

Koloshan 3:5

Eniting we insaida unu we bilang tu da worl ya — dash it we! Mi a taak laik seks sin, an ou unu mait-a lang fi go miks op unuself iina dem sitn de. Unu mait-a no tap tingk bout dem, an waahn fi go du dem so til unu galang go du dem. Bot dem de no kliin. Unu fi dash we dat! Plos aal a di sitn dem we unu waahn waahn we no rait; plos di wikid sitn dem we unu waahn fi du. Unu fi klier dem outa unu laif! Kil dem! An unu no fi waahnti-waahnti niida; aal waahn waahn tingz we unu no niid! Wen unu du dat, a worship unu a worship dem sitn de insted-a unu a worship Gad.

1 Tesaluoniyan 4:7

Kaaz Gad neehn kaal wi fi wi dabl iina seks sin, bot fi liv kliin.

2 Timoti 3:2

Piipl onggl a-go bizniz wid demself an dem a-go lov moni. Dem a-go gwaan buosi-buosi an ful-a demself. Dem a-go kos out an biit op biit op dem wan aneda an dem naa go fala wa dem mada an faada se. Piipl naa go gi tangks fi notn an dem naa go av notn fi du wid Gad.

Taitos 1:7

Sins di elda a-go inchaaj a Gad wok, im afi bi sumadi we di piipl dem kyan rispek an no av notn bad fi se bout. Im no fi ful-a imself, kwik fi get beks an im no fi lov waar niida. Im no fi lov jringk tu moch an im no fi lov ron dong moni.

Iibruu 13:4

Evribadi fi rispek marid laif, ozban an waif mosn go sliip wid nobadi els — dem fi kip dem bed kliin. Kaaz di piipl dem we dabl iina seks sin, an we sliip wid piipl dem no marid tu, Gad a-go joj dem.

2 Piita 3:3

Fos ting fos, unu fi andastan se iina di laas die dem, piipl we mak piipl we biliiv iina Jiizas, a-go kom laaf aafa unu tu. Dem waahn fi du di rang sitn dem an a dat dem galang go du!

Juud 1:10

Bot dem ya piipl ya se som torbl torbl sitn bout we dem no andastan. Dem a gwaan laik wail animal wa kyaahn tingk out notn. An di sitn dem we dem du andastan widout afi tingk bout dem, a dem sitn de mash dem op.

Juud 1:16

Dem piipl de no du notn bot grombl an paint fingga pan ada piipl; eniting we dem wikid aat tel dem fi du — a dat dem du. Dem buos bout demself an swiit-taak piipl so dem kyan yuuz dem fi di rang riizn.

Juud 1:18

Dem did tel unu se iina di laas die dem, di taim wen di worl bout fi don, unu gweehn av som piipl we gweehn mek fon a Gad an im mesij an im piipl. Dem a-go liv onggl fi di wikid sitn dem we dem waahn.

Juud 1:4

Kaaz som man slip iina unu choch anda di kwaiyat. Dem man de maak fi get mash dong fram wie bak wen, an a dat mi a-go tel unu bout. Dem man de no av notn fi du wid Gad. Kaaz Gad lov piipl iivn duo dem no dizorv it, dem yuuz dat fi du aal kain-a wikidnis an ton gens Jiizas Krais, wi onggl maasta an Laad.