2 Korintiyan 6:4 - Di Jamiekan Nyuu Testiment

⁴ So insted-a kaaz piipl fi ton we, wa wi du a shuo dem se wi a Gad sorvant iina evriting we wi du. Wi shuo dem se wi a Gad sorvant wen wi no gi op wen nof chobl an chraiyal an kraasiz tek wi.

2 Korintiyan 6:4 ပူးပေါင်းရင်းမြစ်များ

2 Korintiyan 12:10

So mi api se mi wiik. Wen piipl chriit mi bad, wen chobl tek mi, wen piipl kaaz mi fi sofa an wen tingz aad, mi stil api. Mi api fi sofa fi Krais Jiizas kaaz wen mi wiik, a da taim de mi chrang.

2 Korintiyan 4:8

Evri wich wie wi ton chobl lik wi bot no mata wa wi fies, it naa go kyan tap wi. Iivn wen wi no nuo wa fi du, wi naa gi op.

2 Korintiyan 11:27

Mi chogl an wok aad aad, nof nait mi no get no sliip. Mi did onggri an waahn sopm fi jringk an nof taim neva av no fuud fi iit. Yu did av taim wen mi kuol an no av inof kluoz fi kip mi waam.

2 Korintiyan 12:12

Di sitn dem we shuo se sumadi a riili wan apasl, mi du dem mongks unu. Nof mirikl apm mongks unu an kaaz unu fi andastan nof sitn bout di Spirit. Gad du nof powaful sitn mongks unu tu, so powaful dat unu kudn iivn biliiv wa unu a si.

2 Korintiyan 3:6

A Gad mek wi kyan sorv im an go roun go tel piipl bout di Nyuu Diil we Gad mek wid wi. Da Nyuu Diil ya no av notn fi du wid di Laa we did rait dong. Iina da Nyuu Diil ya Gad sen im Spirit gi wi; kaaz di Laa kil bot di Spirit gi laif.

1 Korintiyan 3:5

Afta aal, uu a Apalos? An uu a Paal? A wi kom priich tu unu an mek unu biliiv bot di tuu a wi did onggl a du wa Gad se wi fi du. Wi a onggl Gad sorvant.

Revilieshan 3:10

Kaaz mi tel unu fi tan op chrang an no gi op wen chobl tek unu, an unu dwi'it, mi a-go kip unu sief iina da taim de wen torbl kraasiz an sofarieshan a-go kom pan di uol worl fi tes aal uu liv pan di ort.

Revilieshan 1:9

Mi a Jan, unu breda an fren we a go chuu di siem sofarieshan we unu a go chuu. Aal a wi a-go tek paat iina Gad kindom, an siem laik unu, mi naa gi op — mi wi gwaan sofa til Gad kom bak. Kaaz mi priich Gad wod an tel piipl aal a di sitn dem we Jiizas shuo mi, dem put mi pan wan ailan niem Patmos.

1 Korintiyan 4:1

Dis a ou unu fi tingk bout wi we a tiich unu: unu fi luk pan wi an si se wi a jos Krais Jiizas sorvant dem an di wan dem we de ya fi tel unu bout aal a di sitn dem we unu no nuo bout Gad.

Iibruu 12:1

So laik ou wan kroud a piipl de aal bout roun wi, an dem shuo wi aredi ou fi chos iina Gad, wi afi dash aaf evriting we a sluo wi dong iina da ries ya. Di sin we tai op wi fut iizi iizi, wi afi dash dem aaf man, an ron di ries we de infronta wi an no wier out pan di wie.

2 Timoti 4:5

Bot yu si yu Timoti, yu afi kanchuol yuself iina evriting. Yu a-go fies nof chobl bot yu mos push chuu it an gwaan priich Gad wod. An kaaz yu a Gad sorvant yu mos du aal di wok we im gi yu fi du.

2 Timoti 2:24

An Jiizas Krais sorvant dem no fi fait; dem fi kain tu evribadi. Dem fi kyan tiich gud an wen dem a diil wid piipl dem fi tek dem taim wid dem.

2 Timoti 1:8

So no shiem fi tel di piipl dem bout Gad. No shiem fi se yu nuo mi niida, jos chuu dem fling mi iina jiel kaaz mi sorv Gad. Yuuz di powa we Gad gi yu. Sofa wid mi an gwaan tel di piipl bout Gad.

1 Timoti 6:11

Bot aal laik yu Timoti we a wan man a Gad, yu fi ron fram dem wikid sitn de. Yu fi chrai yu bes fi liv ou Gad waahn yu fi liv an fi liv di sitn dem we yu tiich. Yu mos gwaan tiich di Wod an chos se Gad wi gi yu chrent. No gi op, shuo lov an tek yu taim wid piipl tu.

1 Timoti 4:6

Timoti, yu wi bi wan gud sorvant fi Jiizas Krais ef yu tiich di piipl di chuut bout dem sitn ya, gwaan kip di chuu mesij bout Krais Jiizas kluos tu yu aat an gwaan fala di chuu sitn dem we mi did tiich yu.

1 Timoti 2:15

Bot Gad gweehn siev di uman chuu ar pikni. Im gweehn siev di uman dem ef dem gwaan biliiv iina im, shuo lov an liv ou im waahn dem fi liv.

1 Tesaluoniyan 5:14

An breda an sista, wi beg unu fi waan di aiglaz dem we no waahn wok; elp di wan dem we friedi-friedi fi get briev, an elp di wan dem we wiik iina eni kain-a wie tu. An beg unu du, tek unu taim wid evribadi.

1 Tesaluoniyan 3:7

So breda an sista, iivn duo wi de ya an a go chuu wi uona chobl an sofarieshan, wi fiil gud iina wi aat, kaaz unu tan op chrang iina Gad an a gwaan chos iina im siem wie.

Koloshan 1:24

Rait ya nou, mi api se mi a sofa fi unu. Mi a sofa laik ou Krais Jiizas did sofa, so mi kyan go chuu aal a we mi fi go chuu. Di sofarieshan mi a go chuu a fi mek gud sitn apm tu di choch, Krais badi.

Koloshan 1:11

An wi prie se Gad wi tek fi im powa an mek unu wel chrang, so unu kyan uol aan no mata wa, an no grombl grombl, bot a sing sang iina unu aat

2 Korintiyan 11:23

Dem a Krais Jiizas sorvant? (Mi a taak laik wan riil madman nou.) Mi a muor Krais sorvant dan dem. Mi wok aada dan dem. Mi get lak op iina prizn nof muor taim dan dem. Mi get nof muor biitn dan dem an a nof taim mi aalmuos ded.

2 Korintiyan 11:9

Wen mi did de mongks unu an wel niid som tingz mi neva aks unu fi notn, kaaz wi breda an sista dem we did kom fram Masiduoniya did bring evriting we mi niid. Mi neva presha non a unu fi notn an mi naa go presha non a unu fi notn niida.

2 Korintiyan 7:11

So unu si umoch gud it du unu wen Gad mek unu sari. It mek unu staat tek tingz siiros an wel waahn fi shuo se unu a du di rait ting. It beks unu. It mek unu fried. It mek unu wel waahn fi si mi. It mek unu staat tek kier wid wa unu du an chrai aad fi mek shuor se unu a du di rait ting.

2 Korintiyan 4:17

Di likl chobl an di sofarieshan we wi a go chuu nou, naa go laas fi eva an dem a no notn wen yu tingk bout di nais nais sitn dem we Gad a-go gi wi, wen wi riich a evn.

2 Korintiyan 4:2

Wi no av notn fi du wid di bad sitn dem we piipl aid an du, an we bring dong shiem pan dem. Wi no chrai fi chrik nobadi an wi no ad ar chienj op notn we de iina Gad wod. Gad a wi witnis se wi onggl tiich di chuut an so piipl nuo se dem kyan chos wi.

1 Korintiyan 9:11

Ef a wi plaant di gud sitn dem fram Gad Spirit iina unu aat, unu no tingk se wi shuda a get fram unu di sitn dem we wi niid fi liv?

Ruoman 16:10

Tel Apelez we go chuu nof chraiyal an kraasiz an pruuv se im a Gad sorvant oudi fi mi. An tel aal a di piipl we liv a Aristobyuulos ous oudi fi mi tu.

Ruoman 14:18

Enibadi we liv an sorv Krais Jiizas da wie de, wi kaaz Gad fi api wid dem an piipl wi rispek dem fi wa dem du.

Ruoman 5:8

Bot Gad shuo wi umoch im lov wi wen im sen Jiizas Krais fi ded fi wi, iivn duo wi a did sina.

Aks 20:34

Unu wel nuo se wid mi uona tuu an dem mi tek kier a aal we mi did niid, an aal we di piipl we wok wid mi did niid tu.

Aks 9:16

Mi a-go shuo im umoch im afi go sofa fi fi mi siek.”

Aks 2:22

“Unu Izrel piipl, ier we mi a se: Gad yuuz di mirikl, sain an powaful sitn dem we im did mek Jiizas du mongks unu, fi shuo unu klier klier se im did a wok wid Jiizas, di man fram Nazaret.

Luuk 21:19

Uu tan op chrang fi mi no mata wa, wi siev dem laif.

2 Korintiyan 2:17

Wi no komiin laik nof ada piipl we chriit Gad wod laik a sopm chiip we dem kyan sel an mek moni. Nuo! Gad sen wi fi tiich im Wod an chuu wi a Jiizas sorvant dem wi aalwiez tiich di chuut laik se Gad did tan op rait infronta wi.

Jan 16:33

“Mi tel unu dem sitn ya so dat unu kyan av piis iina unu aat kaa mi an unu a wan. Iina da worl ya, unu gweehn av chobl an sofarieshan. Bot no fret! Mi don win di fait wid di worl.”

Ruoman 3:5

So wa ef wen wi du rang, piipl si klier klier se Gad aalwiez a du we rait? Wa wi kyan se bout dat? Unu tingk wi kyan se Gad a du rang wen im ponish wi? (Mi jos a taak ou som piipl taak)