2 Korintiyan 5:21 - Di Jamiekan Nyuu Testiment

²¹ Jiizas neva sin yet bot Gad put fi wi sin pan im, so dat wi kuda get kliin. Da wie de wen wi biliiv iina Jiizas, tingz wuda rait bitwiin wi an Gad.

2 Korintiyan 5:21 ပူးပေါင်းရင်းမြစ်များ

1 Piita 3:18

Kaaz Krais Jiizas sofa an ded fi di uol a wi sin wans an faraal. Wan man we du onggl wa rait, ded fi aal a uu a sina, fi bring wi tu Gad. Dem kil di badi, bot Gad mek im liv agen iina di Spirit.

Ruoman 5:19

So, kaaz wan man neva du we Gad se im fi du, sin kom iina di worl an siek-a dat evribadi a sina. A siem so, Gad mek tingz rait bitwiin im an piipl kaaz wan man did du we im tel im fi du.

Gyalieshan 3:13

Nou wi no aalwiez fala aal a di Laa dem an siek-a dat Gad wuda ponish wi. Bot Krais Jiizas siev wi fram get ponish wen im kom an sofa fi wi. Im get ponish so wi wudn get ponish. It aal rait dong iina Gad wod se, “Enibadi we dem eng op pan wan kraas — Gad a ponish dem.”

1 Jan 3:5

Unu nuo se Jiizas kom fi tek we sin an im no av no sin at aal.

1 Korintiyan 1:30

A Gad kaaz unu fi kluos wid Jiizas Krais. An a Jiizas mek wi kyan nuo Gad an kyan andastan sortn tingz — Gad mek wi waiz wen wi kluos wid Jiizas. An chuu wi kluos wid Jiizas, Gad tek we aal a wi sin an mek tingz rait bitwiin wi an im. An so wi a im pikni nou.

Filipiyan 3:9

Mi waahn Jiizas fi tek ful kanchuol a mi — badi an suol. Mi naa dipen pan notn we di Laa se, ar we mi kyan du fi mek miself rait iina Gad yai. Mi a dipen pan di rait sitn dem we Jiizas du, kaaz fi get rait iina Gad yai yu afi dipen onggl pan wa Jiizas du.

2 Korintiyan 5:17

Wen sumadi biliiv iina Krais Jiizas, dem ton wan nyuu sumadi. Dem tap liv di wie dem yuus tu liv bifuo dem biliiv an staat liv difrant.

Iibruu 4:15

Kaaz wi no av wan liida fi di priis dem we kyaahn andastan we wi a go chuu, an we no nuo se wi no so chrang wen wi fies notn we wi kaaz wi fi sin. Insted-a dat wi av wan we did get presha fi du aal kain-a rang sitn tu, siem laka wi — bot im neehn sin.

Ruoman 4:25

Gad sen Jiizas fi ded siek-a fi wi sin dem an Gad mek im kom bak alaiv so dat tingz kyan rait bitwiin wi an Gad.

Ifiijan 5:2

Lov unu wan aneda, jos laik ou Krais Jiizas lov unu. Im gi op im laif fi wi laik wan swiit sakrifais we dem bon pan alta gi Gad.

Ruoman 1:17

Di Gud Nyuuz shuo ou Gad tek we piipl sin an mek tingz rait bitwiin im an dem, an dat im du aal a dat kaaz dem biliiv iina Jiizas Krais. It aal rait dong iina Gad wod se, “Di piipl uufa sin Gad tek we kaaz dem biliiv iina im, a dem a-go riili liv.”

Iibruu 7:26

Liida fi priis we komiin laik Jiizas, a riili di kain-a liida fi priis we wi niid. Im mek Gad api iina evri kain-a wie. Im no du notn rang; im neva sin. Nobadi kyaahn bliem im fi notn. Gad mek im difrant, im no komiin laka sina piipl. An Gad riez im op ai ai, aiya dan aal evn.

Aks 3:14

Iivn duo Jiizas aalwiez sorv Gad an du we rait, unu ton unu bak pan im an aks fi dem le'go wan mordara insted-a im.

Luuk 1:35

Di ienjel ansa ar se, “Di Uoli Spirit a-go kom tu yu an di powa a di Muos Ai a-go toch yu. Im a-go bi Gad uoli pikni.