2 Korintiyan 12:20 - Di Jamiekan Nyuu Testiment

²⁰ Mi fried se wen mi riich de, unu naa go tan ou mi waahn unu fi tan an mi naa go tan ou unu waahn mi fi tan. Mi fried se wen mi riich de a bier kyas-kyas a gwaan, piipl a-go beks an a shout aafa dem wan aneda, an piipl a bad main ada piipl fi dem sitn dem. Mi fried se mi a-go fain unu a tel lai pan unu wan aneda an a susu-susu bout unu wan aneda an evribadi onggl a-go bizniz bout demself. Wen mi kom de mi fried se mi a-go fain piipl a gwaan buosi-buosi an evriting a-go ton opsaid dong.

2 Korintiyan 12:20 ပူးပေါင်းရင်းမြစ်များ

1 Piita 2:1

So tap dabl iina aal kain-a sin an wikidnis. No beks wid piipl an no chat tu dem, no bada tel no lai an no bi no ipokrit niida. Unu no fi bad main piipl fi we dem av. An mek shuor se unu no tek unu mout an tier dong nobadi.

Gyalieshan 5:15

Bot ef unu kip aan a bait an chaa op chaa op unu wan aneda laik unu a wail animal, unu beta wach out, kaaz unu a-go mash op unu wan aneda.

1 Korintiyan 1:11

Mi nuo se unu a aagyu wid unu wan aneda kaaz som piipl we liv iina Klowi ous tel mi bout it.

Ruoman 1:29

Dem de piipl de wikid, dem ful op a wikidnis. Dem eva waahn wa ada piipl av an dem eva a du bad sitn tu ada piipl. Dem de piipl de ful op a bad main. Dem lov fi kos an fait, dem eva a chrai fi chrik dem wan aneda an dem eva waahn fi kil aaf dem wan aneda tu. Dem de piipl de lov fi susu-susu.

Juud 1:16

Dem piipl de no du notn bot grombl an paint fingga pan ada piipl; eniting we dem wikid aat tel dem fi du — a dat dem du. Dem buos bout demself an swiit-taak piipl so dem kyan yuuz dem fi di rang riizn.

2 Piita 2:18

Dem mek big chat we no wot notn an chrai fi jraa we di piipl dem we jos bieli ton we fram di piipl dem we naa liv rait. Kaaz dem piipl ya bieli muuv we fram dem sitn de, an wi stil wel waahn av seks iivn duo dem no marid an dabl-dabl iina aal kain-a sin, di faalz tiicha dem yuuz dis an jraa dem we.

Gyalieshan 5:26

Mek wi no get ful-a wiself an tingk se wi beta dan ada piipl. Mek wi no provuok wan aneda an mek wi no red yai fi wan aneda sitn dem.

2 Korintiyan 12:21

Mi fried se wen mi kom de, Gad we mi sorv, a-go mek mi fiil shiem agen an mi a-go baal fi di wan dem we a sin, an we naa chienj dem wiez an beg Gad fi paadn dem. Dem naa beg Gad fi paadn dem fi di doti laif we dem a liv an fi ou wail dem a gwaan. Dem naa beg Gad fi paadn dem fi aal a di seks sin dem we dem a du.

2 Korintiyan 13:2

Laas taim mi did de de, dat a did di sekan taim mi kom luk fi unu, mi did waan unu. Mi did tel di piipl dem we did a du rang, an di res a unu tu fi tap it. Tap du rang kaaz wen mi kom bak mi naa go tek it iizi pan unu. Evribadi we du rang a-go get ponish. A dat mi did tel unu wen mi de de an nou iivn duo mi de faar fram unu, mi a tel unu agen.

2 Korintiyan 10:6

An wen wi si se unu a fala Krais Jiizas iina evri wie, wi wi redi fi ponish enibadi we naa fala wa im se.

2 Korintiyan 10:2

no push mi fi rof wid unu wen mi kom de fi si unu, laik ou mi shuor se mi afi go rof wid di wan dem we tingk se wi a liv laik di piipl dem we de iina di worl an no nuo Gad.

2 Korintiyan 1:23

Nou ef wa mi bout fi tel unu a lai, mek Gad ponish mi: a fi fi unu uona gud mek mi neva kom baka Korint. Mi neva kom bak kaaz mi neva waahn unu fi sofa.

1 Korintiyan 14:33

Kaaz Gad no diil wid kanfyuuzhan, im waahn im choch fi ron sortn an sortn wie. An im waahn aal a di choch dem fi ron so.

Ruoman 1:30

Dem lai an dem lov fi big op demself — dem ful-a demself so til. Nobadi kyaahn taak tu dem an dem no shuo nobadi no rispek. Dem no fala notn we dem mada an faada se. Dem no lov Gad an dem eva a plan op plan op aal kain-a wikid sitn.

Ruoman 2:8

Bot yu av som ada piipl we onggl bizniz bout demself — dem no du notn fi elp ada piipl. Dem mek op dem main se dem naa du wa rait — dem onggl a-go du we Gad se rang. Dem piipl de Gad a-go shuo dem se im beks wid dem, im a-go ponish dem aad aad.

1 Korintiyan 5:2

An unu a buos bout unuself! Unu no tingk se unu shuda a eng dong unu ed iina shiem an a baal? Unu no tingk se unu shuda kik out di wan dem we a du dem sitn de?

2 Korintiyan 2:1

So mi mek op mi main se mi naa kom si unu ef wa mi av fi tel unu a-go kaaz unu pien.

Jiemz 4:11

Mi breda an sista, no taak bad sitn buot wan aneda! Ef unu du dat ar joj piipl an gwaan laik se Gad kyaahn paadn dem, unu a se Gad Laa no gud. An ef unu se di Laa no gud unu a gwaan laik se a unu a joj uova di Laa.