2 Korintiyan 1:22 - Di Jamiekan Nyuu Testiment

²² Im maak wi fi shuo se wi bilang tu im an gi wi di Spirit iina wi aat so wi wuda nuo se im a-go gi wi aal we im pramis fi gi wi.

2 Korintiyan 1:22 ပူးပေါင်းရင်းမြစ်များ

Ifiijan 4:30

No du notn fi mek Gad Uoli Spirit afi baal. A im liv iina unu an put im speshal maak pan unu fi shuo se unu bilang tu Gad an se wan die Gad a-go frii unu kaaz a dat im siev unu fa.

2 Korintiyan 5:5

Gad a di wan we mek wi redi fi da nyuu badi de an im sen im Spirit gi wi so dat wi wuda nuo fi shuor se wi a-go get dem.

Jan 6:27

No wok fi fuud we kyan pwail an we naa go laas no taim. Wok fi di kain-a fuud we a-go mek unu liv fi eva, a dat de fuud di Man we Gad Pik gweehn gi unu. Faada Gad put im speshal maak pan im fi shuo se im av di rait fi du we im du.”

Revilieshan 9:4

Gad gi dem powa fi bait piipl an aada dem se dem onggl fi mek di wan dem we no av fi im maak iina dem farid sofa. Bot dem no fi chobl di graas, ar di griin plaant, ar non a di chrii dem pan di ort.

Ruoman 8:23

An a no jos dem a muon an a gruon, wi we av Gad Spirit a liv iina a wi, di Spirit we a di fos gif Gad gi wi, wi a muon an a gruon tu. Bot wi naa gruon out loud, wi a gruon insaida wiself. Wi a gruon kaaz wi a ded fi Gad frii wi fram da badi ya an gi wi wan nyuu wan an riili mek wi im pikni iina evri wie.

Ruoman 8:9

Bot yu si unu, unu naa liv ou unu badi waahn unu fi liv. Unu a liv ou di Spirit se unu fi liv, dat a ef Gad Spirit riili de iina unu. Nou di piipl we no av Krais Jiizas Spirit a liv iina dem, dem no bilang tu Gad.

Revilieshan 7:3

“No chobl di lan ar di sii ar di chrii dem til wi put wan maak iina di piipl dem farid we bilang tu fi wi Gad.”

2 Timoti 2:19

Bot Gad foundieshan salid an chrang, it a tan op siem wie. An it av dis rait pan it: “Di Laad nuo di piipl dem we a fi im uon,” an “Enibadi we se Jiizas a ‘Laad’ mos tap du wikid sitn.”

Ruoman 4:11

An a lang afta dat apm Iebriyam go get sorkomsaiz. Im go get sorkomsaiz fi shuo se Gad did mek tingz rait bitwiin di tuu a dem iivn duo im neva sorkomsaiz, an Gad did du it kaaz Iebriyam did biliiv iina im. So Iebriyam komiin laik di faada fi aal a di piipl dem we neva get sorkomsaiz bot uu Gad mek tingz rait bitwiin im an dem kaaz dem biliiv iina im.

Revilieshan 2:17

Aal uu av iez fi ier beta lisn gud we di Uoli Spirit a se tu di choch dem. Enibadi we biit di devl an no gi'iin tu di sitn dem we im waahn dem fi du, mi a-go gi dem som a di fuud we niem mana we sumadi did aid. An mi a-go gi dem wan wait stuon tu wid wan nyuu niem rait pan it. Onggl di sumadi we get da stuon de a-go andastan wa rait pan it.’

Jan 3:33

Di sumadi we tek iin an fala wa im se shuo klier klier se wa Gad se a chuu sitn.

1 Tesaluoniyan 4:8

An enibadi we no du dis, a no jos man dem naa fala bot dem ton dem bak pan Gad — Gad, we gi unu im Uoli Spirit.