1 Timoti 6:2 - Di Jamiekan Nyuu Testiment

² Ef enibadi av wan maasta we biliiv iina Jiizas tu, dem no fi rispek dem no les jos chuu di tuu a dem a breda. Bot sins dem an dem maasta ya a breda, dem fi rispek dem iivn muor an sorv dem beta. Kaaz it miin se dem a elp fi tek kier a Gad piipl we im lov. A dem sitn ya mi a beg yu fi tiich an fi push di piipl dem fi du.

1 Timoti 6:2 ပူးပေါင်းရင်းမြစ်များ

Matyu 23:8

“Bot nobadi no fi kaal unu, ‘tiicha,’ kaa a onggl wan Tiicha de bout, plos di uol a unu a breda an sista; nobadi no aiya dan nobadi.

Matyu 25:40

“An di king a-go ansa bak, ‘Mi tel unu dis, an a chuu mi a taak, di taim dem wen unu weehn du dem sitn de fi wan a mi breda an sista dem we piipl se no wot notn, a laik se a mi unu did dwi'it fa.’

Matyu 6:24

“Nobadi kyaahn sorv tuu maasta. Yu wi iet wan an lov di ada wan, ar yu wi ron go du eniting we wan waahn, bot no tuu bizniz wid di ada wan. Unu kyaahn sorv Gad an moni.

Aks 1:15

Iina dem die de, wen di biliiva dem gyada op fi wan a dem miitn, (bout onjrid an twenti a dem did de de), Piita tan op

Ruoman 11:17

Bot ef som a di branch dem brok aaf, an dem tek unu, unu we a wan wail piis a aliv shuut, an bod di aliv chrii so dat unu kyan liv aafa di gud sitn dem we kom fram di ruut,

Ruoman 8:29

Kaaz di piipl we Gad pik iivn bifuo im mek di worl, im maak dem. Im maak dem fi ton laik im Bwai Pikni, so dat im Bwai Pikni wuda bi di fos outa aal a im pikni dem.

Gyalieshan 5:6

Kaaz wen yu an Jiizas a wan it no mata ef yu sorkomsaiz ar yu no sorkomsaiz. Di onggl ting wa mata a dat yu chos iina im. An yu shuo se yu chos iina im wen yu shuo lov.

Ifiijan 1:1

Mi a Paal. Gad pik mi fi bi wan a Jiizas Krais apasl, kaaz a dat im did waahn. Mi a rait da leta ya tu aal a Gad piipl we de iina Efisos an we riili chos iina Jiizas.

Ifiijan 1:15

So nou, siek-a aal a dem sitn ya, fram di fos taim mi ier se unu chos iina di Laad Jiizas an dat unu lov Gad piipl,

Ifiijan 3:6

Di siikrit mesij a dat wen piipl we a no Juu biliiv iina di Gud Nyuuz, dem ton Gad pikni an tek paat iina aal a di gud sitn dem Gad gi di Juu piipl dem. Pan tap a dat, aal a dem jain op tugeda wid di Izrel piipl dem we bilang tu Gad, an siek-a wa Jiizas du, dem gweehn get aal a wa Gad pramis fi gi im piipl dem.

Koloshan 1:2

Wi a rait da leta ya tu aal a Gad piipl dem we de a Kolasi — di breda an sista dem we eva a chos iina Gad an we kluos tu Krais Jiizas: Wi prie se wi Faada Gad wi aalwiez shuo unu lov iivn duo wi no dizorv it, an gi unu piis iina unu aat.

Koloshan 1:4

Wi tangk im kaaz wi ier se unu chos iina Krais Jiizas, an wi ier ou unu lov aal a Gad piipl dem.

Koloshan 4:1

Az fi unu we uon sliev, unu fi chriit unu sliev rait an unu fi chriit dem fier. Kaaz unu nuo se unu av wan maasta iina evn tu.

2 Tesaluoniyan 1:3

Breda an sista, wi fi gi Gad tangks fi unu aal di wail — an dat a di rait ting tu. Wi fi gi tangks, kaaz unu a chos iina Gad muo an muo an a lov unu wan aneda muo an muo tu.

1 Timoti 4:11

Tiich dem sitn ya an tel evribadi fi mek shuor dem fala dem.

1 Timoti 5:1

No disrispek di uol man dem iina di choch an taak tu dem eni an eni wie. Taak tu dem laik ou yu wuda taak tu yu faada. Taak tu di yong bwai dem laik dem a yu breda.

Taitos 2:1

Taitos, yu afi tiich wa rait; yu afi tiich di chuut.

Taitos 2:15

Mek shuor se yu tel evribadi dem sitn ya. Yuuz di powa we Gad gi yu fi push di piipl dem fi fala di chuut an fi karek dem. An no mek nobadi put yu dong ar se yu a wan bad tiicha an no pie yu no main.

Taitos 3:8

Aal a wa mi jos tel yu, a chuu sopm. An a dat mi waahn yu fi tiich aad aad. Tiich it so dat aal a di piipl we biliiv iina Gad wi mek shuor se dem onggl du gud sitn; dem sitn ya gud an wi elp evribadi.

Iibruu 3:1

So mi breda an sista we bilang tu Gad, an we im kaal jos laik ou im kaal mi, unu fi kip unu main pan Jiizas. Im a di mesinja we Gad sen wi, an di liida fi di priis dem we go tu Gad fi wi, siek-a wa wi se wi biliiv iina.

Iibruu 3:14

Kaaz wi an Krais Jiizas, wi staat wok tugeda ef wi gwaan uol aan an chos iina im no mata wa, laik ou wi yuus tu du wen wi did fos staat biliiv iina im.

1 Piita 5:1

Mi a taak tu di elda dem ya nou. Mi a elda laik unu, mi a wan we si fi miself ou Krais Jiizas did sofa tu, an mi tel piipl bout dis, an mi a-go daans an praans wid im wen im kom bak wid aal a di powa we evribadi a-go si. So mi a beg unu du,

2 Piita 2:10

An aal di wan dem we eva gi iin tu wa dem badi waahn an iet nobadi we ruul uova dem, a dem im a-go ponish wikid wikid. Dem faalz tiicha ya, so brait an out-a-aada an tingk se dem nuo muo dan evribadi els, so dem mosn lisn wa nobadi se. An dem no fried fi bad mout di spirit dem we av powa fi ruul uova piipl.

Juud 1:8

A siem so dem piipl de kliem se dem get vijan an so dem du aal kain-a naasinis we mash op dem badi. Chuu dem kliem se dem get vijan dem go gens Gad, fait gens enibadi we a ruul uova dem, an bad mout Gad ienjel dem.