1 Timoti 6:18 - Di Jamiekan Nyuu Testiment

¹⁸ Tel dem fi du nof gud sitn — a dat dem fi rich wid, an tel dem se dem mos gi tu ada piipl an shier wa dem av.

1 Timoti 6:18 ပူးပေါင်းရင်းမြစ်များ

Iibruu 13:16

An no figet fi du wa gud, an fi shier we unu av, kaaz Gad lov dem kain-a sakrifais de.

1 Jan 3:17

Ef nobadi si im breda ar sista riili shaat a sopm an no elp dem iivn duo im kuda elp dem, ou da sumadi de a-go se Gad lov iina im aat?

Ruoman 12:8

Ef Gad mek yu kyan taak tu piipl an mek dem fiil laik se dem kyan du wa dem niid fi du, den a dat yu fi du. Ef im gi yu wan aat fi piipl we mek yu shier aal we yu av, den yu fi gi wid aal a yu aat. Ef Gad mek yu wan liida, den yu fi wok aad. Ef Gad mek yu kyan gud an kain tu piipl, den a dat yu fi du an yu fi api fi du it tu.

Taitos 3:8

Aal a wa mi jos tel yu, a chuu sopm. An a dat mi waahn yu fi tiich aad aad. Tiich it so dat aal a di piipl we biliiv iina Gad wi mek shuor se dem onggl du gud sitn; dem sitn ya gud an wi elp evribadi.

Taitos 2:14

Im a di wan we gi op im laif fi siev wi fram aal kain-a wikidnis an mek wi kliin so wi kuda bi im piipl; piipl we eva a chrai fi du gud.

Luuk 12:21

“Dis a wa apm tu enibadi we siev op fi demself di sitn dem we de pan ort bot no rich iina di sitn dem we Gad kier bout.”

Gyalieshan 6:10

So wen-eva wi av di chaans fi du gud, mek wi du it. Mek wi du gud fi evribadi, wos ef dem a paat a Gad fambili an biliiv iina Jiizas laik wi.

Ruoman 12:13

Ef unu choch breda an sista no av wa dem niid, unu fi shier wa unu av wid dem an unu mos eva redi fi tek iin piipl we a chravl an naa no we fi stie.

1 Timoti 5:10

Ef shi a-go go pan di lis, piipl mos nuo ar fi di gud sitn dem we shi du. Dem mos nuo ar kaaz shi bring op ar pikni dem gud, aalwiez uopm op ar yaad tu piipl an shi wash di fut a di biliiva dem. Dem mos nuo ar kaaz shi elp enibadi we niid elp an kaaz shi du aal kain-a gud sitn.

2 Korintiyan 8:9

Kaaz unu nuo ou wi Laad Jiizas Krais shuo wi lov iivn duo wi no dizorv it. Im did rich bot im gi op evriting an mek imself puor so dat unu we puor kuda get rich.

2 Korintiyan 8:12

Umoch yu av no mata, Gad no bizniz wid umoch yu av ar no av. Wa mata a umoch yu waahn fi gi outa we yu av.

1 Korintiyan 16:2

Pan di fos die a evri wiik, unu mos pudong paat a di moni we unu mek. Unu fi pudong moni bies pan ou Gad bles unu. Da wie de unu wi av di moni pudong an wi no afi go kalek op notn wen mi riich de.

3 Jan 1:11

Mi breda, no fala bad kompni. Enibadi we du wa rait kom fram Gad. Enibadi we lov du we rang no nuo Gad.

Jiemz 2:5

Mi breda an sista, ier wa mi a se. No Gad pik di puo piipl iina di worl fi bles dem kaaz dem biliiv iina im? Im pik dem fi tek paat iina im kindom wa im pramis fi gi aal uu lov im.

Aks 9:36

Nou yu did av wan uman we biliiv iina Jiizas we liv a Japa. Shi did niem Tabita, bot iina Griik shi niem Daakas. Shi did eva a du gud an a elp puo piipl.

1 Piita 3:11

Dem fi ton we fram wikidnis an du di gud sitn dem. An dem fi chrai aad fi liv iina piis wid dem wan aneda.

Aks 11:29

So di piipl dem we biliiv iina Jiizas mek op dem main fi elp Gad piipl we de iina Judiya. Evribadi gi wa dem kuda gi an dem gi bies pan wa dem av.

Aks 10:38

Unu nuo ou Gad did gi Jiizas we kom fram Nazaret im Uoli Spirit an powa. Jiizas go aal bout a du gud sitn, an aal a di piipl we di devl did kanchuol, Jiizas frii dem kaaz Gad did de wid im.

Matyu 5:42

Sumadi beg unu sitn, gi dem, an no ton unu bak pan di piipl dem we waahn baro sitn fram unu.

Luuk 3:11

Im se tu dem se, “Ef yu av tuu shot yu fi gi sumadi wan an ef yu av fuud yu fi du di siem ting.”

Ifiijan 4:28

Aal uu did a tiif mos tap tiif. Wa dem fi du a wok aad fi wa dem waahn. Da wie de, dem wi av inof fi shier wid piipl we no av notn.