1 Tesaluoniyan 5:6 - Di Jamiekan Nyuu Testiment

⁶ So mek wi no sliip laik dem we a liv iina di daak. Bot mek wi kip wi yai waid uopm an wi ed skruu aan gud.

1 Tesaluoniyan 5:6 ပူးပေါင်းရင်းမြစ်များ

1 Piita 1:13

So siek-a aal we Gad du, mek shuor se unu get unu main redi fi akshan. Kanchuol unuself an staat liv siiros. Kip unu main onggl pan di blesn dem we Gad a-go gi unu wen Krais Jiizas kom bak.

Matyu 24:42

“So mek shuor se unu eva a wach an a luk out, kaa unu no nuo a wich die unu Laad a-go kom bak.

Luuk 22:46

Jiizas aks dem, “Wa mek unu a sliip? Git op an prie man so unu no fies notn we wi kaaz unu fi sin.”

1 Piita 5:8

Wach out! Wiek op. Unu fi get unu main redi fi akshan. Klier unu ed an staat tingk chriet. Unu enimi — di devl, im a siniik roun laik wan wikid onggri-beli laiyan, a luk sumadi fi nyam.

Revilieshan 16:15

“Luk, mi a-go kom laik wan tiif! Di wan dem we gwaan luk out an kip aan dem kluoz so dat dem na'afi go bout niekid an shiem se evribadi si dem niekid, a dem wel bles.”

Taitos 2:12

Di gud we im du fi wi, tiich wi ou fi ton we fram wikidnis an fi no lov di sitn dem we di worliyan dem waahn.

Ifiijan 5:14

Lait shuo op evriting an mek wi si wa dem riili komiin laik. A dat mek Gad wod se, “Unu we a sliip, wiek op, man. Aal a unu we ded, kom bak alaiv, an mek Krais Jiizas shain pan unu laka lait.”

Revilieshan 3:2

So wiek op, an staat liv agen laik ou unu nuo Gad piipl fi liv, bifuo evriting mash op, kaaz mi fain se di wie unu a liv no mach op wid di wie fi mi Gad waahn unu fi liv.

1 Piita 4:7

Bot, di taim wen aal a dis a-go don suun kom. So klier unu ed an staat tingk chriet, get unu main redi fi akshan, kanchuol unuself an staat liv siiros. Du aal a dat so dat unu kyan prie.

1 Korintiyan 16:13

Kip unu yai dem uopm, tan op chrang fi wa unu biliiv, no fried a notn an gwaan kip chrang.

1 Timoti 2:9

Mi waahn di uman dem fi jres prapa. Dem no fi jres op demself iina big fansi ier stail, guol, porl ar dier kluoz.

Taitos 2:6

Push di yongga man dem fi kanchuol demself tu.

1 Timoti 3:2

Di elda fi liv im laif so dat nobadi kyaahn se notn bad gens im. Im fi av onggl wan waif, im fi nuo ou fi kanchuol imself an no go uova buod wid notn. Piipl mos kyan rispek im an im fi kyan chriit piipl gud wen dem kom a im yaad. Di elda mos nuo ou fi tiich.

Koloshan 4:2

No tap prie. Unu fi wach out an get unu main redi fi akshan an gi Gad tangks wen unu a prie.

Ifiijan 6:18

An evritaim unu a prie, mek di Uoli Spirit liid unu. An no mata wa, no tap aks Gad fi elp unu an aal a im piipl iina evriting. Nou dat unu nuo aal a dem sitn ya, wach out an kip unu yai dem waid uopm aal di taim.

Luuk 21:36

Aalwiez a wach, prie se unu wi kyan get we fram aal a wa a-go apm, an prie se unu kyan tan op infronta di Man we Gad Pik.”

Luuk 12:39

Bot andastan dis! Ef di uona fi di ous did nuo di taim wen di tiif a kom, im wudn mek di tiif brok iina im ous.

Matyu 25:13

“So ier wa, mek shuor se unu eva redi an a luk out, kaa unu no nuo a wich die ar a wa taim di Man we Gad Pik a-go kom bak.

Matyu 25:5

Di braidgruum did a tek lang fi kom, an sliip did staat fi uol dem dong an di uol a dem jrap a sliip.

Matyu 13:25

Bot wen evribadi a sliip, wan a im enimi dem kom kom plaant op wiid mongks im wiit dem an go we.

2 Timoti 4:5

Bot yu si yu Timoti, yu afi kanchuol yuself iina evriting. Yu a-go fies nof chobl bot yu mos push chuu it an gwaan priich Gad wod. An kaaz yu a Gad sorvant yu mos du aal di wok we im gi yu fi du.

1 Timoti 3:11

A siem so di uman dem mos liv dem laif so piipl wi rispek dem. Dem no fi susu-susu, lai ar taak bad bout piipl. Insted-a dat dem fi kyan kanchuol demself, no go uova buod wid notn an piipl fi kyan chos dem.

1 Tesaluoniyan 5:8

Bot wi we bilang tu di die, wi fi tingk chriet an chos iina Gad an lov im. Da wie de wi a protek wiself jos laik di suoja dem wen dem wier di metal ves. An jos laik ou di suoja dem put aan di elmit fi protek dem ed, a siem so wi fi protek wiself an luk faawod fi Gad siev wi, an biliiv iina wi aat se im a-go du it.

Filipiyan 4:5

Liv iina wan wie so dat evribadi kyan si se unu tek taim wid ada piipl. Di Laad suun kom bak.

1 Korintiyan 15:34

Unu fi wiek op, tek kanchuol a unuself an tap sin. Unu shuda shiem, kaaz som a unu no nuo Gad at aal.

Aks 20:31

So wach unuself an memba ou nait an die fi chrii ier, mi neva tap waan evri wan a unu, iivn duo mi did afi go chuu nof sofarieshan.

Luuk 12:37

It a-go gud fi di sorvant dem uufa maasta fain dem bizi a wiet fi'im kom bak. Mi a tel unu dis, di maasta imself a-go put aan im wok kluoz, mek dem sidong a di tiebl, an im wi sorv dem.

Maak 13:37

Wa mi se tu unu, mi a se tu evribadi: ‘Kip wach!’ ”

Matyu 26:38

Den im se tu dem se, “Mi aat evi so til mi fiil laik da presha ya a go kil mi. Tan ya-so an no bada go sliip pan mi.”

1 Timoti 2:15

Bot Gad gweehn siev di uman chuu ar pikni. Im gweehn siev di uman dem ef dem gwaan biliiv iina im, shuo lov an liv ou im waahn dem fi liv.

Ifiijan 2:3

Matarafak, aal a wi yuus fi liv laka dat wan taim. Wi did a liv onggl fi wa wi badi waahn an fi di rang sitn dem wa wi main tel wi fi du. Wi did komiin jos laik evribadi els we fi get joj an ponish fi dem sin.

1 Tesaluoniyan 4:13

Breda an sista, wi waahn unu fi nuo bout wa riili apm tu aal a dem we jrap asliip. Da wie ya unu wi no baal an muon laik di piipl dem we no nuo Gad an no ekspek notn gud fi apm afta sumadi ded.

1 Tesaluoniyan 5:10

Jiizas ded fi wi, so weda wi alaiv ar wi ded di uol a wi kyan go liv wid im.