1 Tesaluoniyan 5:20 - Di Jamiekan Nyuu Testiment

²⁰ No se di mesij we piipl kliem se dem get fram Gad a fuulinish,

1 Tesaluoniyan 5:20 ပူးပေါင်းရင်းမြစ်များ

1 Korintiyan 14:1

So muo dan eniting els, unu fi waahn fi lov ada piipl, bot unu fi wel waahn di gif dem we di Uoli Spirit gi tu. An di gif we unu fi waahn di muos a di wan we lou unu fi kyari mesij chriet fram Gad.

1 Korintiyan 11:4

Dat miin se ef wan man a prie ar a pred Gad mesij tu di piipl wid im ed kova op, a disrispek im a disrispek di wan we a di ed.

1 Korintiyan 12:28

Evribadi av wan plies iina Gad choch. A di tap tap pozishan yu av di apasl dem. Afta dat yu av di prafit dem, den di tiicha dem, di piipl dem we wok mirikl an piipl we mek sik piipl get beta. Afta dem de piipl de, yu av di piipl dem we lov fi elp ada piipl, den di wan dem we elp fi kip di choch iina aada an afta dem yu av di piipl we taak iina tongz.

Aks 19:6

An wen Paal put im an pan dem, di Uoli Spirit tek kanchuol a dem, an dem staat taak iina wan chrienj wie we nobadi no nuo ar andastan, an gi out mesij we kom fram Gad.

1 Korintiyan 13:9

Kaaz Gad no shuo wi evriting an wi no nuo evriting we im nuo. So di gif dem we di Uoli Spirit gi wi a jos fi wan taim,

1 Korintiyan 13:2

Ef mi kuda kyari mesij chriet fram Gad, an nuo bout aal a di tingz we Gad kip fram mi an nuo bout evriting we de fi nuo bout, an mi so chrang iina wa mi biliiv dat mi kyan muuv mountn bot mi no av lov iina mi aat, mi a no notn.

1 Korintiyan 12:10

Som piipl, Gad Spirit mek dem kyan wok mirikl. Wan neda set a piipl, di Spirit mek dem kyan priich Gad mesij. Ada piipl di Spirit gi dem di powa fi nuo ef a Gad Spirit a mek som piipl kyan du sortn tingz ar ef a som ada spirit a mek dem du it. Di Spirit aal mek som piipl kyan taak iina tongz an a di siem Spirit kaaz ada piipl fi andastan dem.

1 Tesaluoniyan 4:8

An enibadi we no du dis, a no jos man dem naa fala bot dem ton dem bak pan Gad — Gad, we gi unu im Uoli Spirit.

Aks 13:1

Nou yu did av som prafit an som tiicha mongks di biliiva dem we did de a Antiyak: man laik Baanabas, Simiyan we dem kaal Naiga, Luushos fram Sairiin, Manoyen (im an Erad di ruula a did gud gud fren fram dem a pikni) an Saal.

1 Jan 4:1

Mi fren, no biliiv iina evri spirit we se dem kom fram Gad. Wa yu fi du a tes di spirit dem fi si ef dem kom fram Gad fi chuu, kaaz a nof nof faalz prafit gaan out aal uova di worl.