1 Tesaluoniyan 4:4 - Di Jamiekan Nyuu Testiment

⁴ Evri wan a unu fi nuo ou fi kanchuol unu badi iina wan wie we gud an kliin an we shuo se unu a Gad piipl, an iina wan wie we piipl kyan rispek.

1 Tesaluoniyan 4:4 ပူးပေါင်းရင်းမြစ်များ

1 Korintiyan 7:9

Bot ef dem kyaahn kanchuol demself, dem fi get marid. Kaaz a beta dem marid dan dem no marid an mek dem niecha kil dem.

Ruoman 12:1

So den breda an sista, sins Gad gud an kain tu unu nof nof, mi a beg unu du, gi op unu laif tu Gad laik wan sakrifais — wan sakrifais we alaiv, we de de fi sorv Gad an we Gad kyan api wid. Dat a ou unu fi worship Gad.

1 Piita 3:7

A siem so di ozban dem fi liv gud wid dem waif an tingk bout dem siem laik ou Gad si dem. Unu nuo aredi se dem no chrang laka unu an dem kyaahn go du aal a wa unu kyan du. So andastan dat an rispek dem, kaaz di siem speshal laif we Gad so gud an kain fi gi unu, im gi dem tu. So mek shuor se unu chriit dem rait so unu kyan prie ou unu sopuoz fi prie.

Iibruu 13:4

Evribadi fi rispek marid laif, ozban an waif mosn go sliip wid nobadi els — dem fi kip dem bed kliin. Kaaz di piipl dem we dabl iina seks sin, an we sliip wid piipl dem no marid tu, Gad a-go joj dem.

1 Korintiyan 6:15

Unu no nuo se fi unu badi a paat a Krais Jiizas badi. So den, mi fi tek di piipl dem we mek op im badi an mek dem go sliip wid uman we sel ar badi fi moni — an mek dem ton paat a fi ar badi? Nuo sa!

1 Korintiyan 7:2

Bot sins nof piipl a sliip wid piipl an dem no marid, evri man fi av im uona waif, an evri uman fi av ar uona ozban.

Filipiyan 4:8

Mi breda an sista, wan muor ting mi waahn se tu unu. Unu si eniting we chuu, eniting we unu kyan rispek, eniting we rait, eniting we gud an kliin, eniting we piipl kyan luk pan an fiil gud bout, eniting we piipl kyan taak gud bout, eniting we fit fi get big op — a dem sitn de unu fi set unu aat an main pan aal di taim.

Ruoman 6:19

(Mi a yuuz sopm outa unu laif, dis uol ting bout sliev an maasta, fi elp unu andastan wa mi a se. Mi no tingk unu wi andastan ef mi no du dat.) Wan taim unu did tek unuself ton sliev tu aal kain-a naasinis an wikidnis — unu gi op evri paat a unu badi fi tek paat iina aal kain-a sin. A siem so nou unu fi tek unuself ton Gad sliev — unu mos gi op evri paat a unu fi du wa rait. Da wie de unu wi riili bi Gad piipl.

Ruoman 1:24

An kaaz piipl so fuul-fuul, Gad lef dem fi du wa dem waahn fi du. Im lef dem fi du aal a di naasinis we dem wel waahn fi du, an fi tek paat iina aal kain-a seks sin we jos a mash op dem badi an we jos a bring dong shiem pan dem wan aneda.

Aks 9:15

Bot di Laad se tu Ananaiyas se, “Gwaan! Kaaz mi pik da man ya fi sorv mi. Mi pik im fi go tel piipl bout mi, piipl we a no Juu, di king dem an di Izrel piipl dem tu.

2 Korintiyan 4:7

Iivn duo wi a laik som pat we mek outa klie an we iizi fi mash op, Gad mek wi andastan di Gud Nyuuz bout Jiizas an gi wi di powa fi tiich piipl, dat a laik wan chrezha. Im du it da wie de so dat evribadi wuda nuo se a no wi av di powa, bot a im riili av aal a di powa.