1 Piita 5:10 - Di Jamiekan Nyuu Testiment

¹⁰ Bot afta unu sofa likl, di Gad we lov unu so til, we no uol bak non a im lov fram unu, im sed wan we kaal unu fi enjai im powa we kyaahn don, kaaz unu a fala Krais Jiizas — im a-go fiks bak evriting fi unu agen, an di chos unu chos iina im, im a-go mek dat chrang chrang. Im a-go mek unu aat chrang tu, so unu kyan anggl di sofarieshan. An im a-go mek shuor se unu tan op chrang iina im no mata ou rof it mait-a get.

1 Piita 5:10 ပူးပေါင်းရင်းမြစ်များ

Luuk 22:32

Bot mi prie fi yu, Saiman, so yu no tap biliiv. An wen yu chos iina mi muo agen, elp yu breda dem fi chos iina mi tu.”

Ruoman 15:13

Mi prie se Gad, Gad we kaaz piipl fi luk fa an nuo fi shuor se dem wi get wa im pramis, mi prie se im wi gi unu piis iina unu aat an mek unu aat api, api kyaahn don kaaz unu biliiv iina im. Mi prie se im du dat, so dat di Uoli Spirit wi kaaz unu muor an muor fi luk fi get di sitn dem we Gad pramis an nuo fi shuor se yu wi get dem.

Ruoman 15:5

Mi prie se Gad, Gad uu kyan mek piipl chrang an kaaz dem fi eng aan an no gi op, mi prie se im wi kaaz unu fi liv iina piis wid unu wan aneda wail unu a fala Krais Jiizas.

Ruoman 16:25

Mek wi priez Gad — Gad we kyan mek unu tan op chrang iina wa unu biliiv azkaadn tu di Gud Nyuuz we mi priich bout Krais Jiizas, an azkaadn tu di chuu sitn dem we a did siikrit fram lang lang taim a bak,

Ruoman 9:11

Bifuo Aizak bwai pikni dem did baan, bifuo eni a dem kuda du notn gud ar bad, Gad pik wan fi ruul uova di ada wan. Gad pik im bifuo im baan fi shuo se a no notn we im did du mek Gad pik im — Gad pik uu im waahn fi pik fi du we im waahn im fi du.

Ruoman 9:24

Wi a dem piipl de. Gad kaal wi, an a no jos piipl we a Juu im kaal, im kaal piipl we a no Juu tu.

1 Korintiyan 1:10

Nou iina wi Laad Jiizas Krais niem, mi a beg unu breda an sista fi tap aagyu wid unu wan aneda an plit op plit op di choch iina gruup. Unu niid fi kom tugeda an mek shuor se aal a unu tingk di siem wie an aal a unu mek op unu main fi du di siem sitn.

1 Korintiyan 1:9

Gad, di wan we kaal unu fi bi wan wid im Bwai Pikni, wi Laad Jiizas Krais, aalwiez du wa im se im a-go du. So unu kyan chos se im wi de de fi unu.

2 Korintiyan 13:11

Breda an sista, aal mi av fi se fi don da leta ya a dat mi uop se unu wi api. Chienj unu wiez an liv ou unu sopuoz fi liv. Mi a beg unu lisn an fala aal we mi tel unu. Kom tugeda an biliiv di siem ting an liv iina piis wid unu wan aneda. An Gad we lov wi an we gi wi piis wi tan wid unu aalwiez.

2 Korintiyan 4:17

Di likl chobl an di sofarieshan we wi a go chuu nou, naa go laas fi eva an dem a no notn wen yu tingk bout di nais nais sitn dem we Gad a-go gi wi, wen wi riich a evn.

Filipiyan 4:13

Mi kyan du eniting, kaaz Krais Jiizas gi mi di powa fi du it.

Koloshan 2:7

So, jos laik ou chrii ruut de diip iina grong, a so fi unu ruut fi beri diip dong iina im. An jos laik ou bildin tan op pan sopm, a im unu fi bil unu laif pan. Dat miin se unu fi dipen pan im muo an muo an du wa im tel unu fi du. Unu fi uol aan chrang an gwaan chos iina im jos laik ou wi did tiich unu fi du. An no figet fi gi Faada Gad tangks aal di taim.

1 Tesaluoniyan 2:12

Wi gi unu gud wod, wi gi unu chrent an wi kip aan a beg unu fi liv laik Gad piipl. Kaaz a im kaal unu iina fi im kindom an kaal unu fi kom nuo ou big an powaful im bi.

2 Tesaluoniyan 2:14

Gad did kaal unu fi get siev fram di taim wen wi did kom tel unu di Gud Nyuuz. Im kaal unu so unu kyan kom get som a di ana we wi Laad Jiizas Krais av.

2 Tesaluoniyan 2:17

Wi prie se wi Laad Jiizas an wi Faada Gad wi gwaan gi unu gud wod an mek unu aat chrang, so unu wi aalwiez se an du wa gud.

2 Tesaluoniyan 3:3

Bot, memba se Gad wi aalwiez du wa im se im a-go du. Im a-go mek unu aat chrang, an im wi protek unu fram di wikid wan.

1 Timoti 6:12

Yu chos iina Gad so yu a-go av nof tingz we yu a-go afi chogl chuu. Gwaan tan op chrang an priich Gad wod. Ef yu du dis yu kyan nuo fi shuor se yu a-go liv fi eva. Kaaz dat a di pramis we Gad gi yu wen yu did se dat yu biliiv iina im infronta evribadi.

2 Timoti 1:9

Gad siev wi an pik wi fi bi im piipl. A no kaaz a notn we wi du mek im du dat. Gad pik wi kaaz im did plan fi gud an kain tu wi. Wie bifuo taim im di plan fi shuo wi lov iivn duo wi no dizorv it an sen Krais Jiizas fi siev wi.

2 Timoti 2:10

An sins di mesij no iina prizn mi wi gwaan sofa fi di piipl dem we Gad pik. So dat Jiizas Krais wi siev dem an so dem kyan liv fi eva wid Gad.

Iibruu 9:15

A so kom im mek wan nyuu plan bitwiin Gad an piipl. So di piipl dem we Gad kaal fi bi fi im uona piipl dem, im kyan bles dem fi eva laik we im pramis fi du. Dat kyan apm kaaz im ded, an kaaz im go ded di piipl dem we sin an brok di uol taim plan we Gad did mek wid dem, dem piipl de kyan get paadn.

1 Piita 1:15

Bot wa unu fi du a liv kliin an no dabl-dabl iina sin. Du wa rait iina evriting we unu du, jos laik ou Gad, di wan we kaal unu fi kom ton fi im pikni dem, onggl du di sitn dem we rait an gud an kliin.

1 Piita 4:10

Gad gi unu difrant difrant gif. Evri wan a unu fi yuuz wat-eva gif Gad gi unu, an yuuz it gud. Yuuz it elp ada piipl.

1 Piita 4:11

So ef Gad mek non a unu fi priich — unu fi priich laik se a Gad wod itself unu a taak. Aal a uu fi sorv, fi sorv wid di chrent an powa we Gad gi unu. Da wie de Gad wi get di priez iina evriting wi du siek-a Jiizas Krais. Aal a di ana, priez an powa a fi Gad, tide, tumaro an fi eva! Iemen.

2 Piita 1:3

Im tek fi im uona powa an gi wi evriting we wi niid fi liv di kain-a laif we im waahn wi fi liv. An dis apm onggl kaaz wi lorn muo an muo bout im. Im a di wan we kaal wi fi shier iina uu im bi — wid aal a im powa an di priez an ana we piipl gi im.

1 Jan 2:25

An wa di Bwai Pikni did pramis a dis: im se wi a-go liv fi eva.

Juud 1:24

Di onggl Gad, di wan we siev unu, av powa fi kip unu fram tombl dong iina di devl chrap. Im wi mek unu tan op infronta im iina im brait brait lait wen im kom bak iina aal a im powa, an mek unu wel api an no fain no faalt wid unu.