1 Piita 3:18 - Di Jamiekan Nyuu Testiment

¹⁸ Kaaz Krais Jiizas sofa an ded fi di uol a wi sin wans an faraal. Wan man we du onggl wa rait, ded fi aal a uu a sina, fi bring wi tu Gad. Dem kil di badi, bot Gad mek im liv agen iina di Spirit.

1 Piita 3:18 ပူးပေါင်းရင်းမြစ်များ

Matyu 27:19

Wen Pailat de de a sidong iina im speshal siit az joj fi di kies, im waif sen im da mesij ya: “No av notn fi du wid da man de kaa im no du notn rang. Mi av wan bad bad jriim bout im tide. Laaks! It mek mi sofa.”

Matyu 27:24

Wen Pailat si se im neva did a go no we wid dis ya, bot did onggl a rail op di kroud muo, im tek waata wash im an infronta dem an se, “A no mi mek da man ya ded. Fi'im blod de pan fu'unu ed!”

Jan 16:10

Dem rang bout Gad an bout uu an wa rait iina Gad yai, kaa, luk ya no, mi a go a mi Faada duo piipl tingk se mi a sina. Mi a go baka mi Faada an unu naa go si mi no muo.

Aks 22:14

“Den im se tu mi se, ‘Di Gad we wi faada faada dem worship pik yu fi nuo wa im plan fi du, fi si im sorvant we aalwiez du wa im waahn im fi du an fi ier da wan de taak tu yu imself.

Aks 3:14

Iivn duo Jiizas aalwiez sorv Gad an du we rait, unu ton unu bak pan im an aks fi dem le'go wan mordara insted-a im.

Ruoman 1:4

Jiizas Krais wi Laad a Gad Uoli Bwai Pikni. An iivn duo im kom fram Dievid fambili, Gad shuo klier klier se im a im Bwai Pikni an gi im im powa wen im mek Jiizas kom bak alaiv.

Ruoman 4:25

Gad sen Jiizas fi ded siek-a fi wi sin dem an Gad mek im kom bak alaiv so dat tingz kyan rait bitwiin wi an Gad.

Ruoman 5:2

Aal a di gud sitn dem we wi a get fram Gad an we wi no dizorv, wi a get dem siek-a wa Jiizas Krais did du an kaaz wi biliiv. An wi wel api kaaz wi nuo fi shuor se Gad a mek wi muor an muor laik im.

Ruoman 8:11

A Gad Spirit mek Jiizas kom bak alaiv. So den, ef Gad Spirit a liv iina unu, siem laik ou it mek Jiizas kom bak alaiv a siem so Gad wi yuuz im Spirit fi mek fi wi badi kom bak alaiv afta wi ded.

Ruoman 8:3

Wi aat so ful op a sin wi kudn fala aal we di Laa se an so di Laa kudn siev wi. Bot Gad du we di Laa kudn du. Gad tek im Bwai Pikni ton im iina wan man, gi im wan badi siem laik fi wi uon we wuda waahn fi sin, an sen im kom a ort fi ded fi wi sin dem.

2 Korintiyan 1:24

Wi a no som baas we a chrai fi ruul uova unu an tel unu wa fi biliiv. Wi a wok wid unu fi mek unu api kaaz unu chrang iina wa unu biliiv.

2 Korintiyan 13:4

A chuu se, wen dem did niel im op pan di kraas, im neva shuo im powa — im mek imself wiik, bot Gad powa mek im kom bak alaiv an a liv nou. An siem laik ou im did wiik a siem so mi wiik, bot wan die unu wi si se Gad powa a-go mek mi liv laik ou Krais Jiizas a liv an mi a-go gwaan liv wid im.

2 Korintiyan 5:21

Jiizas neva sin yet bot Gad put fi wi sin pan im, so dat wi kuda get kliin. Da wie de wen wi biliiv iina Jiizas, tingz wuda rait bitwiin wi an Gad.

Gyalieshan 1:4

Jiizas gi op im laif fi siev wi fram wi sin dem an fi frii wi fram aal a di wikid sitn dem we a apm nou. A dat Faada Gad did waahn im fi du an so a dat im du.

Gyalieshan 3:13

Nou wi no aalwiez fala aal a di Laa dem an siek-a dat Gad wuda ponish wi. Bot Krais Jiizas siev wi fram get ponish wen im kom an sofa fi wi. Im get ponish so wi wudn get ponish. It aal rait dong iina Gad wod se, “Enibadi we dem eng op pan wan kraas — Gad a ponish dem.”

Ifiijan 3:12

Siek-a Jiizas an kaaz wi chos iina im, im mek wi kyan kom tu Gad frii an no fried a notn.

Taitos 2:14

Im a di wan we gi op im laif fi siev wi fram aal kain-a wikidnis an mek wi kliin so wi kuda bi im piipl; piipl we eva a chrai fi du gud.

Iibruu 10:10

An siek-a dat, di uol a wi ton kliin iina Gad yai. Im sakrifais im uona badi jos wan dege-dege taim an dat kova evriting.

Iibruu 9:14

den tingk bout umoch muo Krais Jiizas blod a-go du fi wi! Siek-a di Spirit we liv fi eva, im kuda gi op imself, an im naa no sin at aal. So fi im blod frii wi kanchens fram di sitn dem we wi du uova an uova fi worship, bot we riili naa no yuus an we boun fi kil wi aaf. Im blod frii wi kanchens fram dem de an mek wi kyan riili sorv di Gad we liv fi eva!

Iibruu 9:26

Ef a so, den Krais Jiizas wuda afi sofa uol iip a taim sins di worl mek. Bot nier di taim wen di worl a-go don nou, im gi op imself laik wan sakrifais, onggl wan taim, an dat kova evriting. Da wie de im kuda get rid a sin.

Iibruu 9:28

wel a siem so, Krais Jiizas sakrifais imself onggl wan taim fi paadn uol iip a piipl sin. Bot wen im kom bak, a no kom im a kom fi tek we sin bot fi siev di piipl dem we a wiet fi im.

Jiemz 5:6

Unu mek joj rait aaf piipl we no du notn rang se dem gilti, an morda dem. An dem kudn iivn tan op fi demself gens unu.

1 Piita 3:19

Di Spirit gi Jiizas Krais powa an im go priich tu di spirit dem we did de iina prizn.

1 Piita 4:1

Sins Krais Jiizas sofa wen im did a waak pan da ort ya, a siem wie unu fi get unu main redi fi sofa tu. Kaaz enibadi we staat sofa so, a ton dem ton dem bak pan sin.

1 Piita 4:6

A dat mek di Gud Nyuuz did priich tu aal di piipl dem we ded nou, kaaz iivn duo dem get joj laik ada piipl, di Spirit wi mek dem kyan go liv wid Gad.

1 Jan 1:9

Bot ef wi si se wi sin an beg Gad paadn, wi kyan nuo fi shuor se Gad wi paadn wi an wash we aal a wi sin dem.