1 Piita 1:15 - Di Jamiekan Nyuu Testiment

¹⁵ Bot wa unu fi du a liv kliin an no dabl-dabl iina sin. Du wa rait iina evriting we unu du, jos laik ou Gad, di wan we kaal unu fi kom ton fi im pikni dem, onggl du di sitn dem we rait an gud an kliin.

1 Piita 1:15 ပူးပေါင်းရင်းမြစ်များ

Matyu 5:48

So ier mi nou, unu no fi gud onggl somtaim an onggl tu som piipl; nobadi no fi av notn bad fi se bout unu, tan jos laik unu faada we iina evn — im gud aal di wail, tu evribadi, an nobadi kyaahn se notn bad bout im an a taak chuut.”

Ruoman 9:24

Wi a dem piipl de. Gad kaal wi, an a no jos piipl we a Juu im kaal, im kaal piipl we a no Juu tu.

2 Korintiyan 7:1

Mi gud gud fren, sins Gad mek dem pramis ya tu wi, mek wi stie faar fram sin an kip wi badi an wi spirit kliin. Mek wi rispek Gad an gi im evri paat a wi. Mek wi chrai fi bi muor laik im.

Filipiyan 1:27

So mek shuor se unu liv ou di Gud Nyuuz bout Krais Jiizas se unu fi liv. Da wie de weda mi kom luk fi unu, ar mi no kom, mi wi ier se aal a unu a tan op chrang tugeda fi di siem ting an a fait fi wa unu biliiv bout di Gud Nyuuz.

Filipiyan 3:14

Mi a push aad fi go chuu an finish di ries an fi get di sitn dem we Gad pudong iina evn fi mi, kaaz a dat Gad kaal mi fi chos Krais Jiizas fa.

Filipiyan 3:20

Bot evn a fi wi konchri. An a de-so di wan we siev wi de, Jiizas Krais wi Laad, an wi kyaahn wiet fi im kom bak!

1 Tesaluoniyan 2:12

Wi gi unu gud wod, wi gi unu chrent an wi kip aan a beg unu fi liv laik Gad piipl. Kaaz a im kaal unu iina fi im kindom an kaal unu fi kom nuo ou big an powaful im bi.

1 Timoti 4:12

No mek nobadi put yu dong kaaz yu yong. Mek shuor yu liv rait so piipl kyan fala yu: lov piipl, chos iina Gad an liv wan kliin laif an no sin.

2 Timoti 1:9

Gad siev wi an pik wi fi bi im piipl. A no kaaz a notn we wi du mek im du dat. Gad pik wi kaaz im did plan fi gud an kain tu wi. Wie bifuo taim im di plan fi shuo wi lov iivn duo wi no dizorv it an sen Krais Jiizas fi siev wi.

Taitos 3:14

Di piipl we biliiv iina Jiizas an we iina Kriit mos lorn fi wok aad an du gud sitn, so dat dem wi aalwiez av inof, so dem kyan gi piipl we niid it.

Taitos 3:8

Aal a wa mi jos tel yu, a chuu sopm. An a dat mi waahn yu fi tiich aad aad. Tiich it so dat aal a di piipl we biliiv iina Gad wi mek shuor se dem onggl du gud sitn; dem sitn ya gud an wi elp evribadi.

Iibruu 12:14

Chrai aad fi liv iina piis wid evribadi, an chrai fi no dabl-dabl iina sin bot tan gud an kliin kaaz nobadi naa get fi si Gad ef dem no gud an kliin.

Iibruu 13:5

Unu no fi lov moni. Unu fi satisfai wid wat-eva unu av, kaaz Gad se, “Mi naa go lef unu non at aal. Nuo mi naa lef unu fi fen fi unuself.”

Jiemz 3:13

Enibadi mongks unu waiz an av sens? Ef unu liv gud, ombl unuself an du wa rait, dat wi shuo se unu waiz.

1 Piita 2:12

Unu mos liv gud an liv rait mongks di piipl dem we no biliiv iina Jiizas, so iivn duo rait ya nou dem a se aal kain-a bad sitn bout unu, an a se a bier wikidnis unu du, dem wi si se a gud sitn unu a du an priez Gad wen im kom baka ort kom big op uu fi get big op an ponish uu fi get ponish.

1 Piita 2:9

Bot unu a wan set a piipl we Gad pik. Unu a di king priis — an Gad a di king. Unu a wan speshal piipl we Gad tek fi kom ton fi im uona piipl dem. Im pik unu so unu kyan tel ada piipl ou big im bi an ou gud im bi. Kaaz a im sed wan tek unu outa daaknis an kom put unu iina im brait brait lait.

1 Piita 3:16

An wen unu a ansa dem no bada disrispek dem ar fuos dem fi biliiv wa unu a se. An unu fi diil wid dem gud tu, so unu no en op fiil gilti. Da wie de, aal a uu se aal kain-a rang sitn bout unu gud bievya kaaz unu a Krais Jiizas falara, dem wi en op fiil shiem bout wa dem did se.

1 Piita 5:10

Bot afta unu sofa likl, di Gad we lov unu so til, we no uol bak non a im lov fram unu, im sed wan we kaal unu fi enjai im powa we kyaahn don, kaaz unu a fala Krais Jiizas — im a-go fiks bak evriting fi unu agen, an di chos unu chos iina im, im a-go mek dat chrang chrang. Im a-go mek unu aat chrang tu, so unu kyan anggl di sofarieshan. An im a-go mek shuor se unu tan op chrang iina im no mata ou rof it mait-a get.

1 Jan 3:3

Evribadi we biliiv se Jiizas a-go mek dem jos laik imself, kip we fram sin, jos laik ou Jiizas kip we fram sin.

Revilieshan 3:7

Im se tu mi agen se, “Rait da leta ya go gi di liida fi di choch we iina Filidelfiya an tel im se: Da mesij ya a kom fram di wan we uoli an we aalwiez du we Gad waahn im fi du. A im av King Dievid kii we shuo se im av di powa fi ruul. Wa im uopm nobadi kyaahn shot, an wa im shot nobadi kyaahn uopm.

Revilieshan 4:8

Evri wan a di fuo sopm dem av siks wing an di uol a dem badi plos dem siks wing dem ful op a yai. Dem av yai aal anda dem wing. Die an nait dem neva tap se: “Uoli, uoli, uoli Laad Gad a yu av aal di powa. Yu did de bout fram wie bak wen, yu aalwiez a-go de bout, an a yu a-go kom baka ort.”

Revilieshan 6:10

Di suol dem anda di alta kaal out wid wan loud vais, “Ou lang, powaful Laad, yu we uoli an we aalwiez du we Gad waahn yu fi du, ou lang yu a-go wiet fi joj an ponish di piipl dem pan ort we kil wi aaf?