1 Korintiyan 16:13 - Di Jamiekan Nyuu Testiment

¹³ Kip unu yai dem uopm, tan op chrang fi wa unu biliiv, no fried a notn an gwaan kip chrang.

1 Korintiyan 16:13 ပူးပေါင်းရင်းမြစ်များ

Ifiijan 6:10

Dis a di laas sitn we mi a se: unu an di Laad kluos, so mek im powa mek unu chrang.

1 Korintiyan 15:58

Mi breda an sista tan op chrang an no mek notn mek yu tap biliiv. Mek shuor se unu eva a du di Laad wok sins unu nuo se aal we unu du fi Gad — unu naa du fi notn.

Gyalieshan 5:1

Gad frii wi so dat wi wudn afi fala di Laa. So tan op chrang an no mek notn ar nobadi tek unu ton unu bak iina sliev.

Filipiyan 4:13

Mi kyan du eniting, kaaz Krais Jiizas gi mi di powa fi du it.

2 Tesaluoniyan 2:15

So breda an sista, tan op chrang an eng aan tait pan di sitn dem we wi tiich unu — weda a se wi did se dem, ar a rait wi did rait dem.

Filipiyan 1:27

So mek shuor se unu liv ou di Gud Nyuuz bout Krais Jiizas se unu fi liv. Da wie de weda mi kom luk fi unu, ar mi no kom, mi wi ier se aal a unu a tan op chrang tugeda fi di siem ting an a fait fi wa unu biliiv bout di Gud Nyuuz.

1 Piita 5:8

Wach out! Wiek op. Unu fi get unu main redi fi akshan. Klier unu ed an staat tingk chriet. Unu enimi — di devl, im a siniik roun laik wan wikid onggri-beli laiyan, a luk sumadi fi nyam.

Filipiyan 4:1

Mi breda an sista, mi lov unu, an mi mis an lang fi si unu so til. Unu mek mi api, an mi kyan riili buos bout unu, kaaz unu komiin laik wan kroun we mi get fi mi aad wok. So mi waahn unu fi tan op chrang iina wa unu biliiv bout di Laad.

1 Tesaluoniyan 3:8

An nou wi riili a liv sins wi nuo se unu a tan op chrang iina Gad.

2 Timoti 4:7

Mi wok aad fi Gad; mi fait fi wa mi biliiv iina. Mi priich Gad wod an du aal a wa Gad tel mi fi du; mi ron da ries ya til it don an no gi op. Mi a-go sorv im til mi ded.

2 Korintiyan 1:24

Wi a no som baas we a chrai fi ruul uova unu an tel unu wa fi biliiv. Wi a wok wid unu fi mek unu api kaaz unu chrang iina wa unu biliiv.

Matyu 26:41

No sliip. Kip wach an prie so unu no fies notn we wi kaaz unu fi sin. Kaaz iina unu aat unu waahn du wa rait, bot unu a jos piipl an dat mek unu wiik.”

Koloshan 4:2

No tap prie. Unu fi wach out an get unu main redi fi akshan an gi Gad tangks wen unu a prie.

1 Piita 4:7

Bot, di taim wen aal a dis a-go don suun kom. So klier unu ed an staat tingk chriet, get unu main redi fi akshan, kanchuol unuself an staat liv siiros. Du aal a dat so dat unu kyan prie.

1 Timoti 6:12

Yu chos iina Gad so yu a-go av nof tingz we yu a-go afi chogl chuu. Gwaan tan op chrang an priich Gad wod. Ef yu du dis yu kyan nuo fi shuor se yu a-go liv fi eva. Kaaz dat a di pramis we Gad gi yu wen yu did se dat yu biliiv iina im infronta evribadi.

1 Korintiyan 14:20

Breda an sista no tingk laik se unu a pikni, unu fi tingk laik se unu a big piipl. Onggl gwaan laik pikni wen it kom tu wikidnis kaaz pikni no du no iip a wikid sitn.

Koloshan 4:12

Epafras, we kom fram mongks unu, an we a wan a Krais Jiizas sorvant dem, im se oudi tu. Im eva a prie fi unu wid aal a im aat. Im prie se unu wi tan op chrang iina Gad an no tap chos iina im. Im prie se unu wi biliiv iina Gad so til nobadi kyaahn mek unu tap chos iina im. An im prie aad se unu wi nuo fi shuor wa Gad waahn unu fi du an fi biliiv.

2 Timoti 2:1

So yu, Timoti, we komiin laik mi pikni, mek di lov we Krais Jiizas gi iivn duo wi no dizorv it, kip yu chrang.

Koloshan 1:23

A so it go, ef unu riili uol aan chrang an gwaan chos iina im, an ef unu no tap luk faawod tu di gud sitn dem unu ier bout wen unu ier di Gud Nyuuz. Piipl pred da Gud Nyuuz de aal uova di worl. An mi, Paal, mi ton Gad sorvant, so mi kyan pred di Gud Nyuuz tu.

1 Tesaluoniyan 5:6

So mek wi no sliip laik dem we a liv iina di daak. Bot mek wi kip wi yai waid uopm an wi ed skruu aan gud.

Ifiijan 3:16

Gad powaful an im gud an kain kyaahn don, so mi prie se im Spirit wi mek unu chrang.

Revilieshan 16:15

“Luk, mi a-go kom laik wan tiif! Di wan dem we gwaan luk out an kip aan dem kluoz so dat dem na'afi go bout niekid an shiem se evribadi si dem niekid, a dem wel bles.”

2 Timoti 4:5

Bot yu si yu Timoti, yu afi kanchuol yuself iina evriting. Yu a-go fies nof chobl bot yu mos push chuu it an gwaan priich Gad wod. An kaaz yu a Gad sorvant yu mos du aal di wok we im gi yu fi du.

Luuk 21:36

Aalwiez a wach, prie se unu wi kyan get we fram aal a wa a-go apm, an prie se unu kyan tan op infronta di Man we Gad Pik.”

Matyu 25:13

“So ier wa, mek shuor se unu eva redi an a luk out, kaa unu no nuo a wich die ar a wa taim di Man we Gad Pik a-go kom bak.