1 Korintiyan 1:27 - Di Jamiekan Nyuu Testiment

²⁷ Bot Gad pik di sitn dem we piipl tingk a fuulinish, so dat im kyan shiem di wan dem we tingk se dem waiz. Gad pik di sitn dem we piipl tingk wiik, so dat im kuda shiem di piipl we tingk se dem chrang.

1 Korintiyan 1:27 ပူးပေါင်းရင်းမြစ်များ

Jiemz 2:5

Mi breda an sista, ier wa mi a se. No Gad pik di puo piipl iina di worl fi bles dem kaaz dem biliiv iina im? Im pik dem fi tek paat iina im kindom wa im pramis fi gi aal uu lov im.

Matyu 11:25

Da taim de, Jiizas se, “Faada, a yu ron evriting iina evn an pan ort, mi priez yu. Mi priez yu kaa yu aid dem sitn ya fram piipl we tingk se dem brait an av nof sens, bot yu shuo lili pikni dem.

1 Korintiyan 1:20

So den, wa unu tingk a-go apm tu di piipl dem we tingk se dem waiz? Wa unu tingk dat miin fi di Laa tiicha dem? Wa unu tingk dat a se bout di piipl dem we lov aagyu bout evriting? Gad no don shuo se aal a di sitn dem we dem piipl de tingk se dem nuo a fuulinish?

Luuk 21:15

Mi wi gi unu di wod dem so unu wi nuo ou fi ansa, so non a unu enimi dem kyaahn tan op gens unu ar se unu rang.

2 Korintiyan 4:7

Iivn duo wi a laik som pat we mek outa klie an we iizi fi mash op, Gad mek wi andastan di Gud Nyuuz bout Jiizas an gi wi di powa fi tiich piipl, dat a laik wan chrezha. Im du it da wie de so dat evribadi wuda nuo se a no wi av di powa, bot a im riili av aal a di powa.

Matyu 21:16

an dem se tu Jiizas se, “Yu ier wa dem a se?” So Jiizas se, “Ye man. Yu neehn riid iina Gad wod se, ‘Im mek pikni an likl biebi priez im ou im fi get priez’?”

2 Korintiyan 10:10

Kaaz som piipl se, “Im rof wen im a rait wi. Iina im leta dem im taak tu wi aad bot wen im de mongks wi im saaf an wa im tel wi no wot notn.”

Matyu 9:9

Wen Jiizas a lef de-so, im si wan man we niem Matyu a sidong a di staal wich paat piipl kalek taks. “Fala mi,” im se tu Matyu. An Matyu get op an fala Jiizas.

Aks 17:18

Som tiicha we did bilang tu wan gruup we niem Epikyuuriyan an som we bilang tu wan neda gruup we niem Stowik did a aagyu wid Paal. An som ada wan aks, “A wa da likl bod-brien, mout-a-masi man ya a chat bout?” An som ada piipl ansa se, “It soun laik im a chat bout som kain-a gad we wi no nuo bout.” Dem se dat kaaz Paal did a priich di Gud Nyuuz bout Jiizas an ou Gad mek ded piipl kom bak alaiv.

Aks 7:54

Wen di Juu liida dem ier dis dem beks wid im so til dem staat grain dem tiit.

Aks 7:35

“A da siem Muoziz ya dem did ton dem bak pan wen dem se, ‘A uu mek yu wan ruula an wan joj?’ A im siem wan Gad sen tu dem fi ruul dem an fi frii dem wid di elp a di ienjel we did taak tu im fram di bush.

1 Korintiyan 1:21

Kaaz piipl tingk se dem waiz, lef tu demself, dem wudn nuo Gad. Bot sins Gad riili waiz, im mek it so dat piipl kuda get siev ef dem biliiv di siem mesij we dem se a fuulinish.

1 Korintiyan 2:12

Di spirit we wi av neva kom fram di worl. Di spirit we wi av kom fram Gad, an a chuu wi av im Spirit mek wi kyan andastan an nuo aal a di sitn dem we Gad kwik fi du fi wi.