1 Korintiyan 1:21 - Di Jamiekan Nyuu Testiment

²¹ Kaaz piipl tingk se dem waiz, lef tu demself, dem wudn nuo Gad. Bot sins Gad riili waiz, im mek it so dat piipl kuda get siev ef dem biliiv di siem mesij we dem se a fuulinish.

1 Korintiyan 1:21 ပူးပေါင်းရင်းမြစ်များ

Luuk 10:21

Dat de taim, di Uoli Spirit kaaz Jiizas fi get api an im se, “Faada, yu ron evriting iina evn an pan ort, mi priez yu. Mi priez yu kaaz yu a shuo dem sitn ya tu likl pikni bot yu aid dem fram piipl we tingk se dem brait an av nof sens. Yes Faada, a dat yu did waahn fi apm.

Matyu 11:25

Da taim de, Jiizas se, “Faada, a yu ron evriting iina evn an pan ort, mi priez yu. Mi priez yu kaa yu aid dem sitn ya fram piipl we tingk se dem brait an av nof sens, bot yu shuo lili pikni dem.

Ifiijan 3:10

Gad du aal a dis so dat, iina dem taim ya, di choch wuda shuo di spirit dem we ruul an we av nof powa iina di skai, ou Gad riili riili waiz.

1 Korintiyan 1:24

Bot yu si di piipl dem we Gad kaal fi bi im pikni, weda dem a Juu ar dem a no Juu, da mesij de shuo ou Gad powaful an ou im waiz.

Ruoman 1:28

Dem nuo di chuut bout Gad bot dem mek op dem main se dem naa biliiv it. So Gad lef dem fi du aal a di sitn dem we dem doti main tel dem fi du im lef dem fi du di sitn dem we dem no fi du.

Ruoman 11:33

Gad gud an kain tu aal piipl nof nof! Nobadi no waiz laik im an nobadi no nuo aal we im nuo. Uu kyan se wai im mek op im main fi du di sitn dem we im du? Uu kyan andastan di wie im du tingz?

Luuk 12:32

“So, unu we a fala mi, no bada fried. Unu Faada api fi gi unu im kindom.

Jan 12:31

A di taim nou wen Gad gweehn joj di piipl dem we iina di worl; a nou di ruula fi da worl ya gweehn get fling out.

1 Korintiyan 1:18

Kaaz di mesij bout ou Jiizas ded pan di kraas fi wi, komiin laik fuulinish tu di wan dem we no biliiv an we a-go go a el. Bot tu wi, di wan dem we siev, it shuo ou Gad powaful.

1 Korintiyan 1:23

Bot yu si wi, wi priich bout ou Krais Jiizas ded pan di kraas fi siev wi. Di Juu dem beks enitaim dem ier da mesij ya an di piipl dem we a no Juu tingk se a fuulinish wi a taak.

1 Korintiyan 1:25

Kaaz di sitn dem we Gad du we di piipl dem we no biliiv tek fi fuulinish, mek muor sens dan eniting we enibadi kuda tingk bout. An we dem luk pan an se a wiik Gad wiik, it chrangga dan di chrangis ting enibadi kuda du.

1 Korintiyan 1:27

Bot Gad pik di sitn dem we piipl tingk a fuulinish, so dat im kyan shiem di wan dem we tingk se dem waiz. Gad pik di sitn dem we piipl tingk wiik, so dat im kuda shiem di piipl we tingk se dem chrang.

1 Korintiyan 2:14

Di piipl we no av Gad Spirit, naa go biliiv notn we di Spirit se kaaz it a-go komiin laik fuulinish tu dem. Dem naa go kyan andastan it, kaaz a onggl wen yu av di Spirit yu kyan andastan dem sitn de.

1 Korintiyan 4:10

Nof piipl tingk wi a fuul kaaz wi biliiv iina Krais Jiizas. Bot unu, unu tingk se unu waiz kaaz unu bilang tu Krais. Nof piipl tingk se wi naa no powa fi du notn bot unu, unu tingk se unu av nof powa. Piipl shuo unu rispek bot dem no rispek wi.

1 Korintiyan 6:2

Unu no nuo se a Gad piipl a-go joj di worl? An ef a unu a-go joj di worl, unu no tingk se unu kyan manij fi saat out di likl aagiment dem we unu av mongks unu wan aneda?

1 Korintiyan 11:32

Bot wen Gad ponish wi a tiich im a chrai fi tiich wi. Im waahn wi lorn wa rait so dat wen im kom bak fi joj di worl, wi naa go ded laik di piipl we no biliiv iina im.

Gyalieshan 1:15

Bot Gad gud an kain tu mi. Im pik mi fram mi baan an im kaal mi fi du im wok. An wen im did redi

Gyalieshan 4:8

Iina di paas, wen unu an Gad neva kluos, unu a did sliev. Unu a did sliev tu di sitn dem we unu kaal gad bot we a no riili gad at aal.

Ifiijan 1:9

An kaaz Gad did waahn wi fi nuo, im tel wi aal a im plan dem we nobadi neva nuo bout. Fram di staat, im did mek op im main fi yuuz Jiizas fi du aal a di sitn dem wa im plan.

Koloshan 1:19

Eniting we mek Gad Gad, de iina Jiizas tu. Gad did api wid dat; a im mek it apm so.

Iibruu 1:14

Aal a di ienjel dem, no spirit dem — spirit we Gad sen fi go sorv di piipl dem we a-go get siev? No so?

Iibruu 2:3

den a ou wi a-go get we, ef wi ton wi bak pan da impuotant mesij ya bout ou Gad a-go siev wi, an no pie it no main, iihn? A di Laad Jiizas imself did fos tel piipl bout it yu nuo. An den di piipl dem we did ier im, mek wi nuo se it go so fi chuu.

Iibruu 7:25

Piipl kyan kom tu Gad siek-a im an im kyan siev dem piipl de fi eva an eva. Im kyan siev dem fi eva kaaz im naa ded so im kyan aalwiez taak tu Gad fi dem.

Jiemz 4:4

Unu komiin laik piipl we sliip wid ada piipl waif an ozban! Unu no nuo se piipl we lov di worl iet Gad? So enibadi we mek di worl dem fren mek Gad dem enimi.

Jiemz 5:15

An wen di choch liida dem prie tu di Laad an biliiv se im ier dem, dem prieya a-go mek di sik sumadi get beta. Di Laad a-go mek dem get beta, an ef dem did sin, im a-go paadn dem.

Jiemz 5:20

memba dis: di wan we elp im kom bak a-go siev im so im no ded an im wi get paadn fi di uol iip a rang we im du.