1 Korintiyan 1:11 - Di Jamiekan Nyuu Testiment

¹¹ Mi nuo se unu a aagyu wid unu wan aneda kaaz som piipl we liv iina Klowi ous tel mi bout it.

1 Korintiyan 1:11 ပူးပေါင်းရင်းမြစ်များ

1 Timoti 6:4

im ful-a imself an no nuo ar andastan notn. Im lov fi kwaril an fait wid ada piipl uova wa som wod miin. Im kaaz piipl fi waar an kos wid dem wan aneda an fi red yai fi dem wan aneda sitn dem.

Gyalieshan 5:26

Mek wi no get ful-a wiself an tingk se wi beta dan ada piipl. Mek wi no provuok wan aneda an mek wi no red yai fi wan aneda sitn dem.

1 Korintiyan 3:3

Unu stil a mek di sitn dem we unu badi waahn kanchuol unu. Ef unu eva a kos unu wan aneda, an ef unu eva red yai an waahn waahn unu wan aneda sitn dem, unu no tingk se unu a mek unu badi kanchuol unu? Unu no tingk se unu a gwaan laik di piipl dem we no nuo Gad?

Gyalieshan 5:20

Di piipl we mek dem badi kanchuol dem worship aal kain-a faalz gad an wok uobiya. Dem chriit piipl aad an dem lov kos an fait. Dem bad main piipl fi we dem av an it no tek notn fi set dem aaf. Di piipl dem we mek dem badi kanchuol dem eva waahn piipl fi rispek dem bot dem no rispek nobadi. Dem onggl bizniz wid demself. Dem kaaz piipl fi plit op an dem onggl taak tu dem fren.

Gyalieshan 5:15

Bot ef unu kip aan a bait an chaa op chaa op unu wan aneda laik unu a wail animal, unu beta wach out, kaaz unu a-go mash op unu wan aneda.

2 Korintiyan 12:20

Mi fried se wen mi riich de, unu naa go tan ou mi waahn unu fi tan an mi naa go tan ou unu waahn mi fi tan. Mi fried se wen mi riich de a bier kyas-kyas a gwaan, piipl a-go beks an a shout aafa dem wan aneda, an piipl a bad main ada piipl fi dem sitn dem. Mi fried se mi a-go fain unu a tel lai pan unu wan aneda an a susu-susu bout unu wan aneda an evribadi onggl a-go bizniz bout demself. Wen mi kom de mi fried se mi a-go fain piipl a gwaan buosi-buosi an evriting a-go ton opsaid dong.

Filipiyan 2:14

Du we unu afi du an no bada grombl grombl an aagyu bout wa unu fi du.

1 Korintiyan 11:18

Fos ting fos, mi ier se wen unu gyada tugeda fi av choch unu plit op iina gruup an aagyu wid unu wan aneda. A dat piipl a tel mi an mi biliiv se som a wa dem a se a chuu sopm.

1 Korintiyan 1:10

Nou iina wi Laad Jiizas Krais niem, mi a beg unu breda an sista fi tap aagyu wid unu wan aneda an plit op plit op di choch iina gruup. Unu niid fi kom tugeda an mek shuor se aal a unu tingk di siem wie an aal a unu mek op unu main fi du di siem sitn.

1 Korintiyan 1:12

Unu nuo wa mi a taak bout. Som a unu a se, “Mi a fala Paal.” Wan neda gruup a se, “Mi a fala Apalos.” Wan neks gruup a se, “Mi a fala Siifas” an wan neda gruup a se, “Mi a fala Krais.”

Taitos 3:9

No fait wid nobadi uova no fuul-fuul taak ar mek op tuori. An no bada kos-kos wid nobadi uova uu a uufa jinarieshan ar bout di laa. Stie faar fram dem sitn de kaaz dem no wot notn an dem kyaahn elp nobadi.