1 Jan 4:17 - Di Jamiekan Nyuu Testiment

¹⁷ Wen jojment die kom wi wi kyan tan op infronta Gad an no fried, kaaz im lov iina wi aat, an wi a liv iina di worl jos laik ou Jiizas did liv.

1 Jan 4:17 ပူးပေါင်းရင်းမြစ်များ

Matyu 10:15

Mi naa lai, pan jojment die, di ponishment we Sadam an Gomaro a-go get a-go iiziya dan da toun de.

Matyu 10:25

Fi di falara kom ton laik im tiicha — di falara no waahn muo dan dat, an fi di sliev kom ton jos laik im maasta, di sliev sopuoz fi aarait wid dat. Ef piipl kaal di ed fi di ous ‘Belzibul, di diiman ruula,’ a wich wosa niem dem a-go kaal di res a im fambili dem?

Matyu 11:22

Bot ier we mi a se, mi naa lai: it a-go iiziya fi Taiya an Saidan pan jojment die dan fi unu.

Matyu 11:24

Bot ier we mi a se, it a-go iiziya fi Sadam pan jojment die dan fi yu!”

Matyu 12:36

A tel unu dis, pan jojment die, piipl a-go afi ansa fi evri wikid sitn we dem se, we dem shuda neva se iina di fos plies.

Jan 15:20

Memba we mi did tel unu se, ‘No sorvant no biga dan im maasta.’ Ef dem mek mi sofa den dem mos a-go mek unu sofa tu. Ef dem du wa mi tiich dem fi du, dem a-go du wa unu tiich dem fi du tu.

Jan 17:22

Mi gi dem di uol iip a rispek yu did gi mi so dat dem kyan kom wan jos laka ou mi an yu a wan:

Ruoman 8:29

Kaaz di piipl we Gad pik iivn bifuo im mek di worl, im maak dem. Im maak dem fi ton laik im Bwai Pikni, so dat im Bwai Pikni wuda bi di fos outa aal a im pikni dem.

Iibruu 9:27

An jos laik ou wi nuo fi shuor se a wan taim evribadi a-go ded an den Gad a-go joj dem,

Jiemz 2:13

kaaz piipl we no paadn nobadi, naa go get no paadn pan jojment die. Ef unu paadn piipl unu wi get frii fram jojment.

Jiemz 2:22

So unu si se wa Iebriyam du shuo se im riili biliiv Gad.

2 Piita 2:9

So ef a so it go den, dat miin se di Laad nuo ou fi siev piipl we gud iina im yai fram di chraiyal an kraasiz dem we dem fies. An a siem so im nuo fi kip di wikid piipl dem we no bizniz wid im til jojment die kom an gwaan ponish dem.

2 Piita 3:7

An a Gad siem wod a kip di evn an di ort ya nou til jojment die wen im a-go bon dem op iina faiya an ponish di piipl dem we no bizniz wid wa im se.

1 Jan 2:28

Breda an sista, tan iina Krais Jiizas so dat wen im kom bak wi no afi fried an ron go aid iina shiem.

1 Jan 2:5

Wen enibadi du we Gad se dem fi du, da sumadi de shuo se dem riili lov Gad di wie im waahn dem fi lov im. A so wi nuo se wi a fi im uon.

1 Jan 2:6

Ef sumadi se Gad liv iina dem, dem fi liv di wie Krais Jiizas liv.

1 Jan 3:1

Luk umoch di Faada lov wi. Im kaal wi im uona pikni, an wi a riili fi im pikni fi chuu. Di piipl dem iina di worl no nuo wi, jos laik ou dem neva nuo Gad niida.

1 Jan 3:3

Evribadi we biliiv se Jiizas a-go mek dem jos laik imself, kip we fram sin, jos laik ou Jiizas kip we fram sin.

1 Jan 3:7

Mi pikni, no mek nobadi fuul unu op. Enibadi wa du wa rait a dem gud iina Gad yai, jos laik ou Jiizas gud iina Gad yai.

1 Jan 4:12

Nobadi neva si Gad yet, bot ef wi lov wi wan aneda dat shuo se Gad riili iina wi an wi a lov ou im waahn wi fi lov.