Ruuka 8:13 - Indagano Inyaaya mu-Chijita

¹³ “Jimbibho jinu ꞉jaaguuwe ku‑rutare, ejisusanyibhwa na abhaanu bhanu abhoongwa omusango gwa Nyamuwanga, nibhaguramira kwa rikonderwa enene, nibhagwikirisya katungu katooto era. Nawe omwanya gunu abharegeejibhwa abhagusiga. Bhari rwa amati ganu emisi jaago jiri ingurunguru era.

INDAGANO INYA:YA

¹³ Na ba ku rutare, nibo abongwa omusango nibagwikirisya no kukonderwa. Nawe hatari na misi, nibe:kirisya kasinjeke, na mu siku jo kusakwa nibe:bere:ra.

Ruuka 8:13 ပူးပေါင်းရင်းမြစ်များ

Ruuka 8:12

Jimbibho jinu ꞉jaaguuwe ku‑njira ejeeresya ati, ni bhaanu bhanu abhoongwa omusango gwa Nyamuwanga. Bhaakamara okutegeresya, awoawo, Syetaani ˆnaaja, ˆnaagusoosya mu‑myoyo jeebhwe, bhaasiga okugwikirisya na okuchungurwa.

Ruuka 8:14

“Jimbibho jinu ꞉jaaguuwe mu‑mawa, ejisusanyibhwa na abhaanu bhanu abhoongwa omusango gwa Nyamuwanga, nawe nibhayiganywa na obhwiganirisya bhwa obhurame bhwa ku‑chaaro na obhurigire bhwa obhuniibhi. Ejo nijo ejikora eriikirisya ryebhwe ritakusoosya amatwasyo ga ekisi.

Yowana 15:2

Bhuri tabhi rinu ritakutwasya amatwasyo keenu riri kw‑anye, Raata kaaritema okusooka kw‑anye. Nawe bhuri tabhi rinu eritwasya amatwasyo, Raata kaarikongorera korereki ritwasye amatwasyo maafu muno.

Yowana 15:6

Omuunu woonewoone unu atari na obhumwi na anye kaasusana na ritabhi rinu eryeswa na okuuma. Mbe, abhaanu abharibhooja na okuryesa mu‑muriro, nirisingaarika.

Yowana 5:35

Yowana Omubhatiija aariga ari rwa idara inu eyaaka na okumirika mu‑chisuute, ka emwe ꞉mwakondereeywe obhweru obhwo kwa omwanya mufuyi era.

1 Bakorinto 13:2

Ka wone noorwo nikasoosya obhuragi na okusombookerwa jimbisike joone na okumenya joone kisi, noorwo nikabha na eriikirisya enene rya okutura okufurusya ebhiima, nawe araabha nitari na eryenda, anye nitari chiinu.

1 Bakorinto 15:2

Araabha omugenderera okuruubha emisango jinu ꞉naabharaasisiisye, awo niwo omubhona obhuchungusi. Nawe araabha mutakujiruubha, eriikirisya ryemwe eribha ritari na omuriiro.

Bagalatia 3:1

Emwe Abhagaraatiya, abhataamutaamu! Niga unu abharogere? ꞉Naabhabhwiriiye abhwerubhweru inguru ya Yeesu Kirisito okubhambwa ku‑musarabha.

Bagalatia 3:4

Angu, jinyaako joone jinu ꞉jaabhabhwene, omwitogera ati jaariga jiri ja okufwirwa‑mo? Jaariga jitari ja okufwirwa‑mo!

Baefeso 3:17

korereki Kirisito akore obhwikaro bhwaye mu‑myoyo jeemwe ku‑njira ya eriikirisya. Enimusabhwa wone, abhasakire korereki murumatane ndi mu‑ryenda ryaye. Kutyo, eryenda ryaye riribha rwa risina na orufuka rwa obhurame bhwemwe,

Bakolosai 1:23

Nawe mwenderwe okugenderera okwikirisya Emisango ja Ekisi murumateene na okubha na amanaga. Mwasiga okwikirisya abhandi bhabhakongye okusiga obhwiyikanyo bhunu ꞉mwabhwene omwanya gunu ꞉mwoonguuwe Emisango ja Ekisi. Emisango ja Ekisi ejo, jiraasiibhwe ku‑bhaanu bhoone ku‑chaaro anu, anye Pawuro nibheeye omukosi waajo.

Bakolosai 2:7

Mwimaririre mu‑mwene, mutuure obhurame bhwemwe mu‑mwene na okurumatana mu‑riikirisya rwa kutyo ꞉mweeyigiiye. Ka wone, mubhe abhaanu bhanu abhasiima Nyamuwanga bhuri mwanya.

1 Batesalonika 3:5

Mbe, anye omwene nejire naataamibhwa okugenderera okwigumiirisya, ꞉naatumire Timoteewo kw‑imwe, korereki nimenye kutyo mwariga nimugenderera okwikirisya Yeesu. ꞉Naakorere kutyo kwa okubha naariga niniiganirisya ati, amwi Syetaani omuregeeji urya, ꞉aabharegeejere na okubhayabhya. Jikabha jiri kutyo, emirimu joone jinu ꞉chaakorere jitaribha na omuriiro.

1 Timoteo 1:19

Ugwatirire eriikirisya na okubha na omutima gwa ekisi. Abhaanu abhandi abhagaya okukora emisango jinu abhamenya ati ni chimari, eryo rikorere nibhasiga okwikirisya Nyamuwanga.

Baeburania 10:39

Mbe, eswe chitari rwa abhaanu bhanu abhasiga okuruubha Nyamuwanga, nibhasingaarika. Tari chiri aamwi na bhanu abhamwikirisya, nibhachunguka.

Yakobo 2:26

Nyabhuriko, araabha omuunu ari na eriikirisya, nawe atari na ebhikorwa bhya ekisi, eriikirisya ryaye eryo rifuuwe. Omuunu oyo, kaasusana rwa omubhiri gunu gukabha gutari‑mo omwoyo, gutari na obhuwanga.

2 Petero 2:20

Na abhaanu bhaakabha bhaasigire obhujabhi bhwa ku‑chaaro chinu kwa okumenya kisi Raatabhugenyi na Omuchungusi weeswe Yeesu Kirisito, nibheeya nibhakomwa rindi na okutaamibhwa okusooka mu‑bhujabhi obhwo, ku‑bhuteero itungwa ya abhaanu abho, eyibha mbiibhi muno okukira kutyo yaariga iri ku‑bhwambiro.

2 Petero 2:22

Iri‑wo inyaayika ya echimari inu eyayika ati, “Imbwa eyirya amatanake gaayo,” wone iri‑wo eyindi inu eyayika ati, “Imbiiji inu yosiibhwe eyigaragasya rindi mu‑matoto!” Nikwo kutyo abheene wone ꞉bhaakorere.

1 Yoana 2:19

Abhaanu abho, bhaariga bhachiri‑ko, nawe mbachisoka‑ko, kwa okubha bhaariga bhatari na obhumwi bhwa echimari na eswe. Okubha, araabha bhakabheeye na obhumwi obhwo na eswe, bhaakasigaaye kw‑iswe. Nawe ꞉bhaachisookere‑ko, korereki bhaswerurwe abhweru ati bhaariga bhatari na obhumwi bhwa echimari na eswe.

Yuuda 1:12

Abhaanu abho, omwanya gunu omurya ebhiryo aamwi nabho mu‑bhugenyi bhwemwe bhwa eryenda, abharya keenu nibheegana abheene era, bhatakwiswara wuri. Abhaanu abho, bhari rwa ebhyaji bhya mu‑nyanja bhinu bhitakubhonekana, ni ngʼanga kw‑imwe. Bhatari na omuriiro gwonegwone, bhari rwa ameere ganu gatari‑mo amanji, omuyaga ogugayemba na okugasira woonewoone. Bhari rwa amati ganu gawungurukire, gafuuwe kwiya kabhiri, nikwo okwayika ati gatari na amatwasyo, na geeyirwe chimwi.