Matayo 5:12 - Indagano Inyaaya mu-Chijita

¹² Mwichuke ati, nikwo kutyo abhaanu bhaanyaasyaga wone abharagi bhanu bhaariga bhari‑wo kara. Mukondererwega na okusandabha muno, kwa okubha Nyamuwanga abhabhiikiiye echiyaanwa echinene mu‑rwire.”

INDAGANO INYA:YA

¹² Mukonderwe mutembetembe, kwo kuba omuyero gwemwe ni mwafu mu rwire, kwo kuba nikwo banya:syaga abaragi banu babatangatiye emwe.

Matayo 5:12 ပူးပေါင်းရင်းမြစ်များ

Matayo 16:27

Okubha anye Omwana wa Omuunu, niriija aamwi na bhamaraayika bhaani mw‑ikusyo rya Raata waani. Niwo niririya bhuri muunu okuruubhana na ebhikorwa bhyaye.

Matayo 6:16

“Omwanya gunu omwiyima ebhiryo, obhusu bhwemwe bhwasiga okweresya obhusurumbaaye rwa kutyo abheerimaanya abhakora. Abheene abhasurumbara korereki abhaanu abhandi bhabharore ati, bheeyimire ebhiryo. Ni chimari enibhabhwira ati, bhaamarire okuramira omuyeero gwebhwe gwone.

Ruuka 13:34

“Emwe abhaanu bha Yerusareemu! Abhaanu bha Yerusareemu! Omwita abharagi na okubhuma amabhuyi abhaanu bhanu Nyamuwanga ꞉aatumire kw‑imwe. Ni kwiya karinga neendere okubhakumanya rwa kutyo ingʼoko eyikumanya ebhyanakoko bhyayo mu‑mabhabha gaayo, keemwe nimurema!

Ruuka 6:23

Orusuku runu ejo jirikorekana, mukonderwe na okusandabha muno, kwa okubha mumenyere ati, echiyaanwa cheemwe mu‑rwire ni chinene. Mwichuke ati, noorwo bhasaaja weebhwe, bhaariga nibhanyaasya kutyokutyo abharagi bha Nyamuwanga.

Ruuka 6:35

“Nawe emwe, mwendega abhasoko bheemwe, mubhakorerega eja ekisi. Mubhabhanjega muteeyikanya okusubhisibhwa. Nyamuwanga aribhayaana echiyaanwa echinene, na omuja okubha abhaana bha echimari ku‑mwene unu ari Inguru ya Bhyone. Okubha Nyamuwanga kaasakira abhaanu bhoone noorwo bhanu bhatakumusiima, na bhanu abhakora amabhiibhi.

Ebikorwa 16:25

Yejire yaakinga mu‑bhwire agati, Pawuro na Siira bhaasabhwaga na okumwimbira Nyamuwanga jinyimbo ja okumukusya, enu abhabhoywa abheejaabho nibhabhategeresyaga.

Ebikorwa 5:41

Niwo jitumwa nibhasooka mw‑ibharaja rikuru rirya bhakondeeywe, kwa okubha ꞉bhaabharire ati bhaariga bheeyire okugaywa inguru ya risiina rya Yeesu.

Barumi 5:3

Noorwo ebhinyaasyo bhyonebhyone bhikabha nibhichiija‑ko, eswe chirigenderera okukonderwa, kwa okubha echimenya ati ebhinyaasyo ebhichireetera obhwigumiirisya.

1 Bakorinto 3:8

Unu kaayamba na unu keetirira amanji bhoone bheengeene, Nyamuwanga ariyaana bhuri umwi weebhwe omuyeero gwaye, okuruubhana na kutyo ꞉aakorere emirimu jaaye.

2 Bakorinto 4:17

Enaayika kutyo, kwa okubha ebhinyaasyo bhyeswe ni bhyangu na ni bhya kasinjeeke era. Ka wone, ebhichireetera rikusyo rya akajaanende koone. Rikusyo eryo ni ryafu muno, okukira ebhinyaasyo bhyone.

Bafilipi 1:29

Okubha mutayaaywe echibharo cha okwikirisya Kirisito era, tari muyaaywe wone echibharo cha okunyaasibhwa ku‑songa yaaye.

Bafilipi 2:17

Noorwo ikabha ati isagama yaani eyisoosibhwa rwa echoogo ku‑chigabhiro, aamwi na eriikirisya ryemwe rinu erikorwa echoogo imbere ya Nyamuwanga, anye enikonderwa na okusandabha aamwi na emwe bhoone.

Bakolosai 1:24

Woori enikondererwa ebhinyaasyo bhinu enibhona inguru yeemwe. Mu‑mubhiri gwani enisangira ebhinyaasyo bhya Kirisito inguru ya omubhiri gwaye, omubhiri ogwo, niryo rikanisa.

Bakolosai 3:24

Mwichuke ati Raatabhugenyi unu omukorera emirimu niwe Kirisito ka omwene aribhayaana omwandu gunu ꞉aabharagire.

1 Batesalonika 2:15

Abhayawudi abho, nibho ꞉bheetire Raatabhugenyi Yeesu aamwi na abharagi bha kara. Ka wone, nibho ꞉bhaachinyaasiisye eswe wone. Abhaanu abho abhabhiyisya Nyamuwanga, nyabhuriko ni bhasoko bha abhaanu bhoone,

Baeburania 10:34

Mwariga nimufwira echigongo abheejaanyu bhanu ꞉bhaabhoyerwe mu‑mabhoyero. Ka wone omwanya gunu ꞉mwateesibhwe ebhiinu bhyemwe, ꞉mwegumiirisiisye kwa rikonderwa, kwa okubha emwe ꞉mwamenyere ati muri na ebhiinu bhya ekisi muno bhinu bhitariwaa‑wo wuri.

Baeburania 11:26

꞉Aarorere ati okufumwa inguru ya Kirisito ni bhuniibhi bhwafu muno okukira okubhona obhuniibhi bhwone bhwa ku‑chaaro cha Miisiri. ꞉Aarorere kutyo kwa okubha aariga ˆneeyikanya echiyaanwa chinu Nyamuwanga arimuyaana omwanya gunu oguuja.

Baeburania 11:33

Okuruubhana na eriikirisya ryebhwe, abhaanu abho ꞉bhaarwanire riremo na abhakama bha ebhyaro ebhindi, nibhayiga. ꞉Bhaakorere emisango ja obhurengeresi na okuramira jinu Nyamuwanga ꞉aaragire. Bhaariga bhari na obhuturo bhwa okubhumbatanya eminwa ja jiitare.

Baeburania 11:6

Atari‑wo omuunu unu kaatura okukondisya Nyamuwanga araabha atakumwikirisya. Bhuri muunu unu keenda okufogera ku‑Nyamuwanga, eenderwe okwikirisya ati Nyamuwanga ari‑wo, ka wone niwe kaayaana echiyaanwa bhanu abheenda okumusombookerwa.

Yakobo 1:2

Abhayiri bhaani mu‑riikirisya, mukonderwaga muno omwanya gunu omuregeejibhwa amaregeejo ga bhuri mbaga,

Yakobo 5:10

Abhayiri bhaani mu‑riikirisya, mwichuke abharagi bhanu bhaayikaga kw‑isiina rya Raatabhugenyi, bhabhe echijekekanyo cha obhwigumiirisya bhwemwe mu‑nyaako.

1 Petero 4:13

Nawe mukondererwe ati omunyaaka rwa kutyo Kirisito ꞉aanyaakire. Mukonderwe woori, korereki mubhe na risandabha ryone, omwanya gunu arisubha na rikusyo ryaye niriswerurwa abhwerubhweru.