Matayo 23:15 - Indagano Inyaaya mu-Chijita

¹⁵ “Jiribhabhona emwe abheeyigisya bha ebhiraagiro bhya Muusa na emwe Abhafarisaayo! Emwe muri bheerimaanya, kwa okubha omwiyinda mu‑chaaro choone na okwambuka inyanja, korereki mukongye omuunu unu atari Muyawudi abhe muruubhirisya weemwe. Nawe akamara okubheekirisisya, omumukora okubha omuunu unu eeyire mu‑muriro gwa akajaanende koone kwiya kabhiri okukira emwe abheene.

INDAGANO INYA:YA

¹⁵ Jiribabona emwe, abandiki na Bafarisayo, ba rurimi, kwo kuba omwisinga mu nyanja na ku ca:ro, korereki mucu:sye omu:nu umwi, nawe ka wora aboneka, nimumukora mwana wo muriro gunyatasima kukira emwe kwiya kabiri.

Matayo 23:15 ပူးပေါင်းရင်းမြစ်များ

Matayo 23:13

“Jiribhabhona emwe abheeyigisya bha ebhiraagiro bhya Muusa na emwe Abhafarisaayo! Emwe muri bheerimaanya, kwa okubha omuyingirira abhaanu okwingira mu‑bhukama bhwa mu‑rwire kwa ameeyigisyo geemwe. Emwe abheene mutakwingira, ka wone mutakwikirisisya abhaanu abhandi bhanu abheenda okwingira. [

Matayo 3:7

Nawe Yowana ejire aarora Abhafarisaayo na Abhasadukaayo bhaafu nibhamuuja‑ko, korereki abhabhatiije, ˆnaabhabhwira ati, “Emwe orwibhuro rwa jinjoka! Niga unu ꞉aabhabhwiriiye ati, omutura okwikenga indamu ya Nyamuwanga inu iriija, kwa okubhatiijibhwa era?

Matayo 5:22

Nawe anye enibhabhwira ati, omuunu woonewoone unu kaasoka oweejaabho, kaakenwa aramurwe. Ka wone, woonewoone unu kaafuma oweejaabho ati, ni mutaamutaamu, omwene wone kaakenwa aramurwe kw‑ibharaja rikuru rya Abhayawudi. Omuunu woonewoone unu kaafuma oweejaabho ati, ni mumuumu, kaakenwa eeswe mu‑muriro gwa akajaanende koone!

Matayo 5:29

Mbe, araabha eriiso ryawo rya ebhuryo rikakureterera okukora echibhiibhi, nuuriiye‑mo na okuryesa kura. Ni akiri kusingaarisya echiwuga chimwi woori, okukira omubhiri gwawo gwone okweswa mu‑muriro gwa akajaanende koone.

Yowana 8:44

Emwe muri bhaanu bha Syetaani, oyo niwe esomwana! Niyo isonga omwenda okukora jinu esomwana keegomba. Syetaani ni mwiti okusookerera ku‑bhwambiro. Atakwenda echimari kata, kwa okubha echimari echo, chitari‑mo mu‑mwoyo gwaye. Omwene ni mubheeyi, na akatungiiywe kaaye ni kubheeya, ka wone niwe esemwene orubheeyi.

Ebikorwa 13:10

ˆnaamubhwira ati, “Awe omwana wa Syetaani! Awe uri omusoko wa eja ekisi joone jinu jiri imbere ya Nyamuwanga! Wijuuye orubheeyi era, awe utakwendaga okurora omusango gwa rirenga! Utakusiga okuyindura emisango ja echimari ja Raatabhugenyi okubha ja orubheeyi?

Ebikorwa 13:43

Omwanya gunu abhaanu abho ꞉bhaanyarambukire, Abhayawudi bhaafu, aamwi na abhaanu abhandi bhanu ꞉bhaagwateene na Abhayawudi bhanu bhaaramyaga Nyamuwanga, nibharuubha Pawuro na Bharinaabha. Abheene wone nibhasimura na abhaanu abho nibhabhakomeeresyaga ati, bhagenderere okwiyikanya obhwitiriranya bhwa Nyamuwanga.

Ebikorwa 14:19

Nawe nibhaaja Abhayawudi abhandi okusooka Atiyookiya mu‑mukoowa gwa Pisiidiya, na okusooka Yikoniya. Nibhakongya eriikofyanyo rya abhaanu, korereki bhabhe aamwi nabho. Bhoone nibhabhuma Pawuro na amabhuyi, nibhamukurura, nibhamusira anja ya omusi, nibheetogeraga ati aafuuwe.

Ebikorwa 14:2

Nawe Abhayawudi abharebhe bhanu ꞉bhaaremere Yeesu, nibhaamba okukungirisya abhaanu abhandi bhanu bhatari Bhayawudi, korereki bhasoke abheekirisya abho.

Ebikorwa 17:13

Abhayawudi bha Tesaroonike abho, bhejire bhaamenya ati Pawuro keeyigisya omusango gwa Nyamuwanga mu‑musi gwa Bherooya, nibhagenda‑yo ku‑songa ya okukungirisya echise chinu chaariga chiri awo, okukingira injogere niibha‑wo.

Ebikorwa 2:10

Furiigiya, Pamufiriya na Miisiri. Bhari‑wo abhandi okusooka mbaara ja echaaro cha Riibhiya chinu chiri yeeyi na omusi gwa Kureene. Abhandi ni bhagenyi bhanu ꞉bhaasookere mu‑musi gwa Ruumi, Abhayawudi bha obhusimukwa na abhandi bhanu ꞉bheekirisiisye idiini ya Echiyawudi.

Ebikorwa 6:5

Obhuramusi obhwo nibhukondera abheeyigisibhwa abho bhoone. Nibhasora Tefwano, omuunu unu eejuuywe Mwoyo Mweru na owa eriikirisya enene. Nibhasora na Firipo, Porokoro, Nikanoori, Timooni, Paarimeena, na Nikorawo wa Atiyookiya, unu kara awo ꞉aafurukiiye mu‑diini ya Echiyawudi.

Bagalatia 4:17

Abhaanu abhandi bharya, abheekomeesya okubhanyaakirira, nawe omusango gunu ogukora bhabharuubhirire gutari gwa ekisi. Abheenda okubhataaganya na anye, korereki emwe mwikomeesye okubhanyaakirira.

Bagalatia 6:12

Abhaanu bhanu abhabhasinyiirisya mutendwe, abheenda mukore kutyo, korereki Abhayawudi bhabhayaane echibharo. Abheenda bhasige okunyaasibhwa inguru ya okuraasya emisango ja omusarabha gwa Kirisito.

Baefeso 2:3

Omwanya ogwoogwo eswe bhoone wone, chaariga nichikora rwa kutyo abhaanu bhanu bhatakugayuka Nyamuwanga bhaakoraga. Chaakoraga rwa kutyo emibhiri jeeswe na obhwiganirisya bhweswe bhyendaga. Okuruubhana na jitungwa jeeswe jimbiibhi ja obhusimukwa, risungu rya Nyamuwanga ryekaga inguru yeeswe rwa ku‑bhaanu abhandi bhoone.