Ebikorwa 5:36 - Indagano Inyaaya mu-Chijita

³⁶ Okubha omwichuka jisiku jinu ꞉jaayitingʼeene, ꞉aabhonekeene omuunu umwi, risiina ryaye aatogwaga Tewuda. Tewuda oyo aariga ˆneekora ati ni omuunu mukuru, na abhaanu amagana gana (400) kutya ꞉bhaaruubheene nage. Nawe ku‑bhuteero, ˆneetwa na abharuubhirisya bhaaye bhoone nibhanyarambuka. Jifurubhendo jeebhwe joone nijiwa‑wo.

INDAGANO INYA:YA

³⁶ Okuba mu siku ja karao, e:mukire Teuda unu e:ku:isye ati, nanye Omukuru. Na ba:nu abo bamuru:baga be:ire uti magana gana. Oyo ejire e:twa, bo:ne abo be:kirisisye byae nibanyaragana, nibawao.

Ebikorwa 5:36 ပူးပေါင်းရင်းမြစ်များ

Matayo 24:24

Bhariibhuka abharagi abhabheeyi na abhaanu bhanu bharibhaga nibheetoga ati ni Kirisito. Bharibhaga nibhakora ebhibharikisyo bhyafu na ebhiruguusyo. Kutyo, bhariregeeja okujiga abhaanu na araabha ikaturikeene, bhakaregeejere na abhasorwa bha Nyamuwanga.

Matayo 24:26

Araabha abhaanu bhaakabhabhwira ati, ‘Ringira, Kirisito ari mw‑ibhara erya!’ mwasiga okugenda eyo. Amwi araabha bhaakabhabhwira ati, ‘Ringira, eeyibhisire mu‑nju omwo!’ mwasiga okubheekirisisya.

Matayo 24:5

Abhaanu bhaafu bhariija nibhakoreraga emirimu risiina ryani, bharyayikaga ati, ‘Anye naanye Kirisito!’ Abhaanu abho bharibha nibhajiga abhaanu bhaafu.

Ebikorwa 21:38

Awe utari Mumiisiri unu ꞉aasokanyiisye abheeti bhiwumbi bhina (4,000) ˆnaabhatangasya okuja ibhara?”

Ebikorwa 5:35

Ejire eeya, ˆnaabhwira abhakuru abheejaabho ati, “Abhayiri bhaasu Abhayisirayeeri, muchaari okukora omusango ogwo omukena okukora ku‑bhaanu bhanu, okwamba mwiganirisye‑wo kisi!

Ebikorwa 8:9

Mu‑musi gwa Samaariya ogwo, aariga ari‑mo omuunu owa amawufyo, risiina ryaye aatogwaga Simooni. Kwa omwanya mureera, Simooni aariga ˆnaaruguusya abhaanu bha mu‑chaaro echo kwa okukora ebhiruguusyo, ˆneekuuyaga ati omwene ni chikaaka.

Bagalatia 2:6

Nawe abhatangasya bharya bha rikanisa bhanu abhayaanwa echibharo muno na abhaanu, bhaariga bhatari na omusango gwonegwone omuyaaya gwa okumbwira. Ni chimari ꞉bhaayaaywe echibharo muno, nawe kw‑anye eryo chitari echiinu, kwa okubha Nyamuwanga atakuringira echibharo cha omuunu.

Bagalatia 6:3

Mbe, omuunu woonewoone unu keerora ati ni wa obhugajuro okukira abheejaabho, oyo atari wa obhugajuro, keejiga omwene era.

2 Petero 2:18

Abhaayika emisango ja orwikuuya na jinu jitari na obhugajuro, na mu‑kuruubha okurigira kwebhwe okubhiibhi kwa orukubho, abhatega abhaanu bhakore kutyokutyo. Abhaanu bhanu abhategwa, bhaamamara okwikirisya na okusiga okukora jinu abhanyamusi abhakora.

2 Petero 2:2

Ka wone, abhaanu bhaafu bhariruubha jinjira jeebhwe ja orukubho. Ku‑songa ya abheeyigisya abho, injira ya echimari irifumwa.

Yuuda 1:16

Abheeyigisya bha orubheeyi bharya abhajujuuma na okutongʼanira abhandi, keenu nibharuubha okurigira kwebhwe okubhiibhi. Abheekuuya muno na okwayika emisango ja okukondisya abhaanu, isonga iri ati, bheebhonere omuriiro.

Obhusweruro 17:3

Mbe, Mwoyo wa Nyamuwanga ˆneeka inguru yaani. Maraayika oyo ˆnaankingya mw‑ibhara. Nejire naakinga eyo, nindora omugasi ariinyire kw‑ityanyi rirya rya okwamba. Rityanyi eryo ryariga riri ritukurasi, riri na emitwe etaanu na ebhiri na ameyembe ekumi. Ka wone, ryariga riswirire amasiina ga okufumirisya Nyamuwanga.

Obhusweruro 17:5

Ku‑chisuusu chaaye, ryariga rikaamirwe‑ko risiina rinu obhugajuro bhwaryo bhwariga bhuri mbisike. Risiina eryene ni rinu, Omusi Omukuru gwa Bhaabheeri, Nyiramwene Abhagasi Bhanu Abheegusya Okwibhonera Ribhona na Owa Amafuruurusyo ga Echaaro.