Ebikorwa 3:25 - Indagano Inyaaya mu-Chijita

²⁵ Emwe muri bhaana bha abharagi, omuyaanwa indagano inu Nyamuwanga ꞉aakorere na bhasaaja waanyu. Nyamuwanga ꞉aaragire Bhurayimu ati, ‘Okutura ku‑muunu wa mu‑rwibhuro rwawo, abhaanu bha mu‑bhyaro bhyone bhariyaanwa ribhando.’

INDAGANO INYA:YA

²⁵ Emwe muri ba:na ba baragi, na bo buragane bunu Nyamuanga aragene na basaja wanyu, nabwira Iburaimu ati, Jiŋanda jo:ne ja mu ca:ro jiriyanirwa ribando mu rwiburo rwao.

Ebikorwa 3:25 ပူးပေါင်းရင်းမြစ်များ

Ruuka 1:72

꞉Aayikire ati, aribhafwira echigongo bhasaaja weeswe, na okwichuka indagano yaaye iinyeru.

Ebikorwa 13:26

“Abhayiri bhaasu, emwe abhaanu bha orwibhuro rwa Bhurayimu, na emwe abhaanu bhanu mutari Bhayawudi bhanu omuramya Nyamuwanga, emisango ja obhuchungusi bhunu jaaretwa kw‑iswe!

Ebikorwa 2:39

Omurago gunu Nyamuwanga ꞉aachiragire inguru yeemwe, na abhaana bheemwe, noorwo ku‑bhandi bhoone bhanu bhari kura, bhoone bhanu Raatabhugenyi Nyamuwanga weeswe kaja okubhirikira bhabhe abhaanu bhaaye.”

Barumi 15:8

Enibhabhwira ati, Kirisito ꞉eejire okubha omukosi wa Abhayawudi, korereki abheeresye ati, Nyamuwanga ni mwiyikanyibhwa. Okutura ku‑Kirisito, Nyamuwanga akuumisiisye emirago joone jinu ꞉aaragire bhasaaja weeswe.

Barumi 4:13

Nyamuwanga ꞉aaragire Bhurayimu na abhaanu bha orwibhuro rwaye ati, aribhayaana echaaro choone okubha omwandu gwebhwe. Nyamuwanga ꞉ataabharagire kutyo kwa okubha Bhurayimu aariga ˆnaakuumisya ebhiraagiro, tari kwa okubha aariga ˆneekirisya Nyamuwanga na omurago gwaye. Niwo ˆnaabharwa okubha omurengeresi imbere ya Nyamuwanga.

Bagalatia 3:16

Mbe Nyamuwanga ꞉aasoosiisye emirago ku‑Bhurayimu saaja weeswe, aamwi na ku‑mwibhurwa waaye. Ebhikaame Ebhyeru bhitakwayika ati, “Na ku‑bheebhurwa bhaaye,” obhugajuro bhwabhyo ni ati bhatari bhaafu, tari bhyayika ati, “Na omwibhurwa waaye,” obhugajuro bhwabhyo ni ati ni umwi, niwe Kirisito.

Bagalatia 3:29

Araabha emwe muri ku‑Kirisito, kurwa ejo woori, emwe muri rwibhuro rwa Bhurayimu, na muriramira omwandu gunu Nyamuwanga ꞉aaragire.

Bagalatia 3:8

Ebhikaame Ebhyeru ꞉bhyaragire ati Nyamuwanga akabharire abhaanu bhanu bhatari Bhayawudi okubha abharengeresi imbere yaaye kwa eriikirisya ryebhwe. Nyamuwanga ꞉aatangatire okuraasisya Bhurayimu emisango ja ekisi ejo ati, “Okutura kw‑awe, abhaanu bha amaanga goone bharibhona amabhando.”

Obhusweruro 14:6

Nejire neeya, nindora maraayika owundi ˆneejungajunga ku‑rutumba. Maraayika oyo, aariga ari na Emisango ja Ekisi ja akajaanende okuraasisya abhaanu bhanu bheekaaye ku‑chaaro, abhaanu bha amaanga goone, jingʼanda joone, jinyaayika joone na abha jinyaami joone.

Obhusweruro 5:9

Nibheembira Omwana wa Inaama orwimbo oruyaaya runu rwayikaga ati, “Awe wiiyire okuramira echitabho echo na okusuruumura jimboyero jaacho ja obhurimbo. Okubha awe ꞉waatemerwe omutwe na ku‑sagama yaawo, nuugurira Nyamuwanga abhaanu bha jingʼanda joone, jinyaayika joone, jinyaami joone na abha amaanga goone.

Obhusweruro 7:9

Ejo jejire jaawa, nindingira, nindora echise echinene cha abhaanu chinu omuunu aariga atakutura okubhara. Abhaanu abho bhaariga bhasookere mu‑maanga goone, mu‑ngʼanda joone, mu‑nyaami joone na mu‑nyaayika joone. Abho bhoone bhaariga bheemereeguuyu imbere ya echitebhe cha ingʼoma na imbere ya Omwana wa Inaama. Abhaanu abho bhaariga bhafwaye emingiro jiinyeru na bhaariga bhagwatiriiye amatabhi ga jikinda mu‑mabhoko geebhwe.