Ebikorwa 20:21 - Indagano Inyaaya mu-Chijita

²¹ Naabhwiraga Abhayawudi na bhanu bhatari Bhayawudi ati, bhayindukire Nyamuwanga, bhate ebhibhiibhi bhyebhwe na bheekirisye Raatabhugenyi weeswe Yeesu Kirisito.

INDAGANO INYA:YA

²¹ Nimbwira Abayaudi ka na Bagiriki ati, baindukire Nyamuanga no kwikirisya Ratabugenyi Yesu Kristo.

Ebikorwa 20:21 ပူးပေါင်းရင်းမြစ်များ

Matayo 3:2

“Mute ebhibhiibhi bhyemwe ku‑Nyamuwanga, kwa okubha obhukama bhwa mu‑rwire bhuri yeeyi!”

Matayo 4:17

Ku‑mwanya ogwo, Yeesu ˆnaamba okuraasisya abhaanu ati, “Mute ebhibhiibhi bhyemwe ku‑Nyamuwanga, kwa okubha obhukama bhwa mu‑rwire bhuri yeeyi!”

Mariko 1:15

Aaraasyaga, ˆnaayikaga ati, “Omwanya gunu ꞉gwaragirwe, gwakinga, obhukama bhwa Nyamuwanga bhuri yeeyi. Mbe, mute ebhibhiibhi bhyemwe ku‑Nyamuwanga na okwikirisya Emisango ja Ekisi ejo.”

Mariko 6:12

Abheeyigisibhwa bharya nibheemuka, nibhaamba okuraasisya abhaanu ati bhate ebhibhiibhi bhyebhwe.

Ruuka 13:3

Enibhabhwira ati, jitari kutyo! Nawe araabha mukarema okuta ebhibhiibhi bhyemwe, nikwo kutyo emwe bhoone murisingaarika.

Ruuka 13:5

Enibhabhwira ati, jitari kutyo! Nawe araabha mukarema okuta ebhibhiibhi bhyemwe, nikwo kutyo emwe bhoone murisingaarika.”

Ruuka 15:10

“Enibhabhwira ati, nikwo kutyo Nyamuwanga kaakonderwa imbere ya bhamaraayika, araabha omuunu umwi owa ebhibhiibhi akata ebhibhiibhi bhyaye na okubhisiga.”

Ruuka 15:7

“Enibhabhwira ati, nikwo kutyo riribha‑wo risandabha enene mu‑rwire, araabha omuunu umwi akata ebhibhiibhi bhyaye. Risandabha eryo, erikira rya abhaanu makumi gataanu na gana na bhataanu na bhana abharengeresi, bhanu bhatakukena okuta ebhibhiibhi.”

Ruuka 16:28

akengye abhamura bhaasu bhataanu, bheekenge na ebhibhiibhi. Akore kutyo, korereki abheene wone aribha bhaafwa bhaasiga okureetwa enu mu‑bhinyaasyo ebhiruru bhinu.’

Ruuka 24:47

Abhaanu bha amaanga goone okwambira Yerusareemu, bhariraasibhwa okuta na okufwirwa echigongo ebhibhiibhi bhyebhwe kwa risiina ryaye.

Yowana 20:31

Nawe ebhibharikisyo bhinu bhiri mu‑chitabho chinu, bhikaamirwe korereki mwikirisye ati Yeesu niwe Kirisito, Omwana wa Nyamuwanga, mu‑kwikirisya okwo, mubhone obhuwanga bhwa akajaanende koone kw‑isiina ryaye.

Yowana 3:36

Omuunu woonewoone unu keekirisya Omwana wa Nyamuwanga, oyo ari na obhuwanga bhwa akajaanende koone. Nawe woonewoone unu kaarema okumwikirisya, atari na obhuwanga obhwo, ka wone risungu rya Nyamuwanga erigenderera okubha inguru yaaye.

Ebikorwa 10:43

Yeesu oyo, abharagi bhoone ꞉bhaayikire inguru yaaye ati, omuunu woonewoone unu arimwikirisya arifwirwa echigongo ebhibhiibhi bhyaye ku‑njira ya risiina ryaye.”

Ebikorwa 11:18

Omwanya gunu Abhayawudi abho ꞉bhoonguuwe ejo, nibhasiga okubhambasyanya nage. Nibhakusya Nyamuwanga nibhaayika ati, “Mbe, Nyamuwanga aayaana abhaanu bhanu bhatari Bhayawudi wone obhuwanga bhwa akajaanende mu‑kuta ebhibhiibhi bhyebhwe!”

Ebikorwa 16:31

Nibhamusubhya ati, “Ikirisya Raatabhugenyi Yeesu, niwo owuja okuchunguka. Abhaanu bhoone bha iika ewaawo wone, bheekirisye Yeesu, niwo abhaja okuchunguka.”

Ebikorwa 17:30

Kara awo, abhaanu bhaariga nibhakora ejo mu‑bhumuumu, Nyamuwanga aariga atakuringira obhumuumu obhwo. Nawe woori, kaabhwira abhaanu bhoone bha bhuri rubhaara ati bhasige ebhibhiibhi bhyebhwe.

Ebikorwa 19:17

Emisango ejo nijiswirana muno mu‑Bhayawudi na mu‑Bhayunaani bha Yefeeso bhanu bhaaramyaga Nyamuwanga. Abho bhoone nibhayaya, nibhakuuya risiina rya Raatabhugenyi Yeesu.

Ebikorwa 2:38

Peetero ˆnaabhabhwira ati, “Bhuri umwi weemwe ate ebhibhiibhi bhyaye, na abhatiijibhwe kw‑isiina rya Yeesu Kirisito, korereki afwirwe echigongo ebhibhiibhi bhyaye, emwe omuja okuyaanwa echiyaanwa cha Mwoyo Mweru.

Ebikorwa 2:40

Peetero ꞉aagendereeye kwa omwanya mureera okubhwira abhaanu abho emisango myafu ja okubhakengya. ꞉Aabheerembeeresiisye ˆnaayikaga ati, “Muchungurwe na Nyamuwanga, mwasiga okuyaanwa indamu aamwi na abhaanu bha riyimbo rinu, bhanu bhari abhabhiibhi muno!”

Ebikorwa 20:23

Enimenya ati, bhuri musi gunu enitura, Mwoyo Mweru kaanyeeresya ati, enija okweswa mw‑ibhoyero na enija okubhona jinyaako.

Ebikorwa 20:24

Nawe, nitakubhara obhurame bhwani ati ni chiinu cha omuriiro kw‑anye, korereki nikuumisye emirimu jinu Raatabhugenyi Yeesu ꞉aanaaye nikore. Emirimu ejo ni kuraasisya abhaanu Emisango ja Ekisi ja obhwitiriranya bhwa Nyamuwanga ku‑bhaanu.

Ebikorwa 24:24

Jejire jaatura siku nooto, Feeriki ˆnaaja na omugasi waaye Durusiira unu aariga ari Omuyawudigasi. Mbe, Feeriki ˆnaatuma abhaanu bhabhirikire Pawuro. Omwanya gunu Pawuro ꞉eejire, Feeriki ˆnaamba okumutegeresya, ˆnaayikiraga inguru ya okwikirisya Kirisito Yeesu.

Ebikorwa 26:18

Ubheegure ameeso, bhasooke mu‑chisuute bheengire mu‑bhweru. Ka wone bhasooke mu‑mabhoko ga Syetaani, bhayindukire Nyamuwanga, korereki kwa okwikirisya, bhafwirwe echigongo ebhibhiibhi bhyebhwe, bhabhe aamwi na abheeru abhandi bhoone.’

Ebikorwa 26:20

꞉Naaraasisiisye okwamba abhaanu bha Damaasiko eyo na Yerusareemu na echaaro choone cha Yuudeya, ka wone ꞉naakingiiye abhaanu bhanu bhatari Bhayawudi. Naabhakomeeresyaga ati, bhate ebhibhiibhi bhyebhwe, bhayindukire Nyamuwanga. Ka wone okuta kwebhwe kweresibhwe na ebhikorwa bhyebhwe.

Ebikorwa 28:23

Mbe, nibhaayikana na Pawuro orusuku rwa okubhugana rindi. Orusuku orwo rwejire rwakinga, Abhayawudi ꞉bheekumanyiisye bhaafu muno mu‑nju yaaye. Pawuro ˆnaabhamenyesya bhwa kisikisi inguru ya obhukama bhwa Nyamuwanga, okwambira katondo okukingira keegoro. Aariga ˆnaaregeeja okubhakora bheekirisye emisango ja Yeesu, kwa okukorera Ebhikaame Ebhyeru, ebhiraagiro bhya Muusa na ebhitabho bhya abharagi abhandi.

Ebikorwa 3:19

Kurwa ejo, mute chimwi ebhibhiibhi bhyemwe na muyindukire Nyamuwanga, korereki abhafwire echigongo. Nikwo kutyo Nyamuwanga aribhasimbiisya emwe, ku‑njira ya okubha ayeeyi na emwe,

Ebikorwa 8:25

Omwanya gunu Peetero na Yowana ꞉bhaamarire okuraasya na okubheeyigisya abhaanu bha mu‑musi ogwo, Emisango ja Ekisi inguru ya Raatabhugenyi Yeesu, nibhaamba orugendo rwebhwe okusubha Yerusareemu. Bhunu bhaagendaga, nibhatura mu‑nguuyo nyafu ja Abhasamaariya nibharaasisyaga abhaanu Emisango ja Ekisi ejo.

Barumi 1:14

Nyamuwanga andagirira nibhe nindaasya Emisango ja Ekisi ku‑bhaanu bhoone, ku‑Bhayunaani na ku‑bhanu bhatari Bhayunaani, ku‑bha obhwengeeso na ku‑bhanu bhatari bha obhwengeeso.

Barumi 1:16

Anye nitakwiswara okuraasya Emisango ja Ekisi ejo, kwa okubha nijo obhuturo bhwa Nyamuwanga bhwa okuchungura abhaanu bhoone bhanu abheekirisya Yeesu, okwambira Abhayawudi okukingira abhaanu bhanu bhatari Bhayawudi.

Barumi 10:9

Omusango ogwo ni ati, ukatogora mu‑kanwa kaawo omwene ati, “Yeesu ni Raatabhugenyi,” na okwikirisya mu‑mwoyo gwawo ati Nyamuwanga ꞉aamusuuruuye okusooka mu‑bhafuuwe, urichungurwa na Nyamuwanga.

Barumi 2:4

Nyamuwanga ni wa kisi muno, kaakufwira echigongo chaafu, na kaakwigumiirisya muno. Nawe awe woori, oweenda okugaya ejo joone? Utakumenya ati kaakweresya bhwa ekisi bhwaye, korereki uture okuta ebhibhiibhi bhyawo?

Barumi 4:24

tari ꞉jaakaamirwe noorwo inguru ya eswe bhoone. Emisango ejo, ejichibhwira ati chikeekirisya Nyamuwanga unu ꞉aasuuruuye Yeesu Raatabhugenyi weeswe okusooka mu‑bhafuuwe, niwo eswe wone echibharwa okubha abharengeresi imbere ya Nyamuwanga.

Barumi 5:1

Mbe, Nyamuwanga achibharire okubha abharengeresi imbere yaaye, okuruubhana na eriikirisya ryeswe. Kurwa ejo, chiri na omurembe na Nyamuwanga okutura ku‑Raatabhugenyi weeswe Yeesu Kirisito.

1 Bakorinto 1:22

Abhayawudi abheenda ebhibharikisyo korereki bheekirisye, Abhayunaani abhayenja obhwengeeso.

2 Bakorinto 7:10

Obhusurumbaaye bhunu obhusookana na obhukarariiye bhwa Nyamuwanga, obhukora abhaanu bhate ebhibhiibhi bhyebhwe. Okuta okwo, kutari musango gwa okuruguusya, kwa okubha okureeta obhuchungusi. Nawe obhusurumbaaye bhunu obhusookana na emisango ja echaaro, obhureeta orufu.

Bagalatia 2:16

Nawe eswe echimenya ati, omuunu atakutura okubharwa ati ni murengeresi imbere ya Nyamuwanga kwa okuruubha ebhiraagiro bhya Muusa, tari ni kwa okwikirisya Yeesu Kirisito omwene era. Nikwo kutyo eswe wone chiikirisiisye Kirisito Yeesu korereki chibharwe ati chiri abharengeresi imbere ya Nyamuwanga kwa okwikirisya Kirisito, kutari kwa okuruubha ebhiraagiro bhya Muusa. Chimari atari‑wo omuunu unu kaatura okubharwa ati ni murengeresi imbere ya Nyamuwanga kwa okuruubha ebhiraagiro bhya Muusa.

Bagalatia 2:20

Bhumuunu bhwani bhwa kara bhwa ebhibhiibhi, ꞉bhwabhambirwe aamwi na Kirisito ku‑musarabha. Woori niri muwanga, nawe nitari anye unu niri muwanga, tari Kirisito niwe ari muwanga mu‑mwoyo gwani. Obhuwanga bhunu niri nabhwo omwanya gunu, niri nabhwo mu‑kwikirisya Omwana wa Nyamuwanga. Omwene ꞉aanyendere na okusoosya obhurame bhwaye inguru yaani, korereki nichunguke.

Bagalatia 3:22

Nawe jitari kutyo. Ebhikaame Ebhyeru ebhyayika ati abhaanu bhoone bhari mw‑ibhoyero rya obhutungi bhwa ebhibhiibhi. Kurwa ejo, Nyamuwanga ꞉aaragire okusoosya echiinu chinu ꞉aaragire ku‑bhoone bhanu abheekirisya Yeesu Kirisito.

Baefeso 1:15

Nikwo kutyo anye wone, okusookerera omwanya gunu ꞉noonguuwe eriikirisya rinu muri naryo ku‑Raatabhugenyi Yeesu na eryenda rinu muri naryo ku‑bheeru bhoone,

Bakolosai 2:5

Enaayika ejo noorwo kutyo nitari aamwi na emwe echinyamubhiri, nawe niri aamwi na emwe echinyamwoyo. Enikonderwa, kwa okubha enuungwa inguru ya obhumwi bhwemwe na okurumatana kwa eriikirisya ryemwe ku‑Kirisito.

Filemoni 1:5

kwa okubha enuungwa ati owugenderera okwikirisya Raatabhugenyi Yeesu na okwenda abheekirisya abheejaanyu bhoone.

1 Yoana 5:1

Woori, omuunu woonewoone unu keekirisya ati Yeesu ni Kirisito, omuunu oyo niwe omwana wa Nyamuwanga. Ka wone, woonewoone unu keenda omwibhusi wa omwana, keenda na abhaana bha omwibhusi oyo.

1 Yoana 5:5

Atari‑wo omuunu unu kaatura okuyiga ebhibhiibhi tari unu keekirisya era ati, Yeesu ni Mwana wa Nyamuwanga.