Ebikorwa 14:22 - Indagano Inyaaya mu-Chijita

²² Bhuri rubhaara, bhaariga nibhasimbiisya abheeyigisibhwa na okubhakomeeresya ati bhagenderere okurumatana mu‑riikirisya ryebhwe. Nibhabhabhwira ati, ni bhusibhusi chiture mu‑nyaako nyafu korereki chiingire mu‑bhukama bhwa Nyamuwanga.

INDAGANO INYA:YA

²² Nibasimbagirisya emyoyo ja be:igisibwa, nibabakomeresya okuruma mu kwikirisya, niba:ika ati, kuci:ire okwingira mu bukama bwa Nyamuanga mu njira ya inya:ko nyafu.

Ebikorwa 14:22 ပူးပေါင်းရင်းမြစ်များ

Matayo 10:38

Omuunu unu atakwenda okugega omusarabha gwaye na okunduubha, oyo ateeyire okubha omwiyigisibhwa waani.

Matayo 16:24

Mbe, Yeesu ˆnaabhwira abheeyigisibhwa bhaaye ati, “Omuunu woonewoone unu keenda okunduubha, keendwa eeyigaane omwene, abhature omusarabha gwaye, anduubhe.

Matayo 19:24

Enibhabhwira rindi ati, ni bhwangu ingamiya okwiyiganya mw‑iwundu rya isinga, okukira omuniibhi okwingira mu‑bhukama bhwa Nyamuwanga!”

Mariko 10:30

Nyamuwanga kaja okumuyaana bhyafu muno okukira bhya okwamba. Noorwo ku‑chaaro chinu ariramira jinju, abhamura bhaabho, abhayara bhaabho, bhanyiramwene, abhaana bhaaye na amabhwi. Aamwi na ebhyo bhyone, aribhona ebhinyaasyo. Ku‑chaaro chinu echiija, ariramira obhuwanga bhwa akajaanende koone.

Mariko 9:47

Ka wone, eriiso ryawo rikakureterera okukora echibhiibhi, nuuriiye‑mo. Ni akiri wingire mu‑bhukama bhwa Nyamuwanga uri na isongo, okukira okubha na ameeso goone gabhiri na okweswa mu‑muriro gwa akajaanende koone.

Ruuka 24:26

Angu, jaariga jiteenderwe Kirisito okubhona ebhinyaasyo ebhyo, niwo eengire mw‑ikusyo ryaye?”

Yowana 15:18

Yeesu ˆnaagenderera okwiyigisya ati, “Araabha abhaanu bha ku‑chaaro kunu bhaakabhasoka, mumenye ati ꞉bhaambire okunsoka anye.

Yowana 15:20

Mwasiga okurabhirwa omusango gunu ꞉naabhabhwiriiye ati, ‘Omugaya atakutura okubha omukuru okukira omwami waaye.’ Mbe, araabha ꞉bhaanyaasiisye anye, emwe wone bharibhanyaasya. Nawe araabha ꞉bheekirisiisye ameeyigisyo gaani, ageemwe wone abhaja okugeekirisya.

Yowana 16:33

Naabhabhwira ejo joone, korereki mubhe na omurembe mu‑myoyo jeemwe, kwa okubha muri na obhumwi na anye. Ku‑chaaro anu muribhona ebhinyaasyo bhyafu, nawe mwasiga okuyaya, kwa okubha anye ꞉naayigire echaaro.”

Yowana 3:5

Yeesu ˆnaamusubhya ati, “Ni chimari enikubhwira ati, atari‑wo omuunu unu kaatura okwingira mu‑bhukama bhwa Nyamuwanga araabha ateebhuuywe mu‑manji na kwa Mwoyo Mweru.

Ebikorwa 11:23

Bharinaabha ejire aakinga eyo, ˆnaarora kutyo Nyamuwanga ꞉aayaaye abhaanu abho obhwitiriranya bhwaye. ˆNaakondererwa muno, ˆnaabhakomeeresya ati bhagenderere okugayuka Raatabhugenyi Yeesu mu‑myoyo jeebhwe.

Ebikorwa 11:26

Ejire aamubhona, ˆnaamureeta Atiyookiya awo. Bharinaabha na Saawuri nibheekara na abheekirisya bharya omuguuga gwone, nibheeyigisyaga abhaanu bhaafu muno. Atiyookiya awo, niwo abheeyigisibhwa bha Yeesu ꞉bhaambire okutogwa ati, Abhakirisito.

Ebikorwa 11:29

Okuruubhana na obhuragi obhwo, abheeyigisibhwa nibharamura ati, bhuri umwi weebhwe, ku‑bhuturo bhwaye, asoosye obhusakisi ku‑bheekirisya abheejaabho bhanu bhaariga bheekaaye Yuudeya.

Ebikorwa 13:43

Omwanya gunu abhaanu abho ꞉bhaanyarambukire, Abhayawudi bhaafu, aamwi na abhaanu abhandi bhanu ꞉bhaagwateene na Abhayawudi bhanu bhaaramyaga Nyamuwanga, nibharuubha Pawuro na Bharinaabha. Abheene wone nibhasimura na abhaanu abho nibhabhakomeeresyaga ati, bhagenderere okwiyikanya obhwitiriranya bhwa Nyamuwanga.

Ebikorwa 14:20

Nawe omwanya gunu abheeyigisibhwa ꞉bheekofyanyiisye na okumusingira, ˆneemuka, ˆnaasubha mu‑musi. Mwejo yende‑ko, ˆnaasooka awo, ˆnaagenda aamwi na Bharinaabha mu‑musi gwa Deeribhe.

Ebikorwa 14:28

Nibheekara Atiyookiya awo, aamwi na abheeyigisibhwa abho kwa omwanya mureera.

Ebikorwa 15:32

Yuuda oyo aamwi na Siira, bhoone bhaariga bhari abharagi. Mbe, nibhabhwira abheekirisya abheejaabho abho, emisango myafu ja okubhasimbiisya na okubhakomeesya.

Ebikorwa 15:41

Nibhaja mu‑mikoowa ja Siiriya na Kiriikiya, nibhakomeesyaga abheekirisya.

Ebikorwa 18:23

Ejire aamara siku nooto, ˆnaasooka‑wo, ˆnaatura mu‑mukoowa gwa Garaatiya na mu‑mukoowa gwa Furiigiya, ˆnaaribhatiraga na okukomeesya abheeyigisibhwa bhoone bha Kirisito.

Ebikorwa 6:7

Omusango gwa Nyamuwanga nigugenderera okuraasibhwa ku‑bhaanu na obhukumi bhwa abheeyigisibhwa bha Yeesu nibhwiyongesya muno mu‑Yerusareemu. Noorwo abhagabhisi bhaafu ꞉bhaagayukire Nyamuwanga, kwa okumwikirisya Yeesu.

Ebikorwa 9:16

Anye omwene enija okumweresya kutyo arinyaasibhwa muno inguru ya risiina ryani.”

Barumi 8:17

Mbe, araabha chiri bhaana bha Nyamuwanga, chaabha abhanjusi bhaaye. Chiriramira omwandu gweswe aamwi na Kirisito. Nawe chinu echikenwa kw‑iswe woori ni ati, chisangire mu‑bhinyaasyo aamwi na Kirisito, korereki eswe wone chisangire aamwi nage mw‑ikusyo ryaye.

1 Bakorinto 1:8

Nyamuwanga aribhakomeesya okukingira ku‑bhuteero korereki mwasiga okubha na esoro, orusuku runu Raatabhugenyi weeswe Yeesu Kirisito ariija okuramura abhaanu.

Bafilipi 1:29

Okubha mutayaaywe echibharo cha okwikirisya Kirisito era, tari muyaaywe wone echibharo cha okunyaasibhwa ku‑songa yaaye.

Bakolosai 1:23

Nawe mwenderwe okugenderera okwikirisya Emisango ja Ekisi murumateene na okubha na amanaga. Mwasiga okwikirisya abhandi bhabhakongye okusiga obhwiyikanyo bhunu ꞉mwabhwene omwanya gunu ꞉mwoonguuwe Emisango ja Ekisi. Emisango ja Ekisi ejo, jiraasiibhwe ku‑bhaanu bhoone ku‑chaaro anu, anye Pawuro nibheeye omukosi waajo.

1 Batesalonika 3:13

Akomeesye emitima jeemwe, korereki mubhe abheeru, bhanyamburwa esoro mu‑meeso ga Nyamuwanga Raata weeswe, omwanya gunu Raatabhugenyi weeswe Yeesu arisubha aamwi na abheeru bhaaye bhoone.

2 Timoteo 1:8

Woori, waasiga okwiswara okwayika inguru ya Raatabhugenyi weeswe, amwi okwiswara kwa okubha niri mw‑ibhoyero ku‑songa yaaye. Nawe, igumiirisya mu‑bhinyaasyo aamwi na anye, inguru ya okubhwira abhaanu Emisango ja Ekisi, okwingana na amanaga ganu Nyamuwanga kaakuyaana.

2 Timoteo 3:12

Nyabhuriko, bhoone bhanu abheekirisya Kirisito Yeesu na abhakena okurama na okuramya Nyamuwanga, bharinyaasibhwa.

1 Petero 2:21

Omukenwa mwigumiirisye kutyo, kwa okubha noorwo Kirisito omwene ꞉aanyaasiibhwe inguru yeemwe. Ejire aakora kutyo, ꞉aabhasigiiye echijekekanyo, korereki muruubhe orugere rwaye.

1 Petero 5:10

Nyamuwanga wa obhwitiriranya bhwone, ꞉aabhabhirikiiye korereki musangire aamwi nage mw‑ikusyo ryaye rya akajaanende koone, aamwi na Kirisito. Omunyaaka kwa omwanya mutooto era, nawe Nyamuwanga omwene aribhakomeesya, aribhayaana amanaga na okubhakuumisya.

1 Petero 5:9

Mbe, mureme Syetaani, murumatane mu‑kwikirisya Nyamuwanga. Mumenye ati, abheekirisya abheejaanyu ku‑chaaro choone, wone abhanyaaka rwa emwe.

2 Petero 1:11

Kutyo, murikumibhwa kisi mu‑bhukama bhwa akajaanende bhwa Raatabhugenyi na Omuchungusi weeswe Yeesu Kirisito.

Yuuda 1:3

Abheendwa bhaani, neegombaga muno okubhakaamira inguru ya obhuchungusi bhunu echisangira aamwi bhoone. Nawe, woori enirora ati, ni bhusibhusi nibhakaamire inyarubha inu, korereki nibheerembeeresye ati, murwanirire echimari cha eriikirisya rinu Nyamuwanga ꞉aayaaye abheeru bhaaye rumwi era.

Obhusweruro 1:9

Anye Yowana niri omuyiri waanyu mu‑riikirisya. Echisangira aamwi mu‑bhwigumiirisya ebhinyaasyo inguru ya Yeesu na obhukama bhwaye. Naariga nisirirwe kw‑isinga rinu eritogwa ati Paatimo. ꞉Naasirirwe kw‑isinga eryo rwa omubhoywa ku‑songa ya okuraasya omusango gwa Nyamuwanga na okusoosya obhubhambaasi inguru ya Yeesu.

Obhusweruro 2:10

Musige okuubhaya ebhinyaasyo bhinu bhiribhaaja‑ko. Muringire! Syetaani aribharegeeja kwa okutuura abhandi agati yeemwe mw‑ibhoyero. Emwe murinyaaka siku ekumi. Nawe mubhe abheeyikanyibhwa kw‑anye noorwo okukingira mufwe, anye niribhayaana orutengya rwa obhuwanga bhwa akajaanende koone.

Obhusweruro 7:14

Niimusubhya ati, “Mwami waani, awe naawe umenyere.” ˆNaambwira ati, “Abhaanu abho nibho ꞉bhaayigire ebhinyaasyo bhinene bhirya. ꞉Bhaafurire emingiro jeebhwe mu‑sagama ya Omwana wa Inaama, nijeera pee.