Barumi 7:4 - Indagano Inyaaya mu-Chijita

⁴ Abhayiri bhaani, emisango ejo nikwo kutyo jiri kw‑imwe wone. Noorwo emwe mutakubhoywa rindi na ebhiraagiro bhya Muusa, kwa okubha mufuuwe aamwi na Kirisito ku‑musarabha. Woori emwe muri bhaanu bha Kirisito unu ꞉aasuuruuywe okusooka mu‑bhafuuwe, korereki obhurame bhweswe bhubhe na amatwasyo ga ekisi inguru ya Nyamuwanga.

INDAGANO INYA:YA

⁴ Nyaburiko, ba:na ba:su, emwe one mwafu:ye ku biragiro kurwo mubiri gwa Kristo, mugwatanyibwe no undi niwe Oyo asu:rukire mu bafu:ye, korereki cimutwasisye Nyamuanga amatwasyo.

Barumi 7:4 ပူးပေါင်းရင်းမြစ်များ

Matayo 26:26

Mbe, omwanya gunu bhaariga nibharya, Yeesu ˆnaagega omukaate, ˆnaasiima Nyamuwanga, ˆnaagubheganya, ˆnaayaana abheeyigisibhwa bhaaye, ˆnaabhabhwira ati, “Mugege murye, gunu nigwo omubhiri gwani.”

Mariko 4:20

Jimbibho jinu ꞉jaaguuwe mu‑mayaru ga ekisi ejisusanyibhwa na abhaanu bhanu abhoongwa omusango gwa Nyamuwanga na okuguramira. Abho nibho abhatwasya amatwasyo, owumwi makumi gasatu, owundi makumi gataanu na rimwi na owundi egana rimwi.”

Yowana 15:8

Araabha mukatwasya amatwasyo maafu na okubha abheeyigisibhwa bhaani bha echimari, omubha nimweresya abhwerubhweru rikusyo rya Raata waani.

Yowana 3:29

Omumura unu ari na omwenga niwe omutwasi. Anye niri rwa omusaani wa omutwasi, niimereeguuyu ku‑mbari yaaye, na enikonderwa okuungwa jinu omutwasi kaayika. Chimari musango gunu gwankondisya muno.

Yowana 6:51

Anye naanye ebhiryo bhinu bhiikire okusooka mu‑rwire, bhinu ebhiyaana abhaanu obhuwanga bhwa akajaanende koone. Omuunu woonewoone unu kaarya ebhiryo ebhyo, kaabha na obhuwanga bhwa akajaanende koone. Ebhiryo ebhyo ni mubhiri gwani gunu nirisoosya inguru ya abhaanu bhoone bha ku‑chaaro kunu, korereki bhabhe na obhuwanga bhwa akajaanende koone.”

Barumi 6:11

Emwe wone, mubhega nimwirora wuti ꞉mwafuuwe aamwi nage, na echibhiibhi chitakutura okubhatunga rindi. Kutyokutyo, mubhega nimwirora wuti woori muri bhaanga, na muramire inguru ya Nyamuwanga, kwa okubha na obhumwi na Kirisito Yeesu.

Barumi 6:14

Echibhiibhi chitaribhatunga rindi, kwa okubha mutakutangasibhwa na obhuturo bhwa ebhiraagiro, tari omutangasibhwa na obhwitiriranya bhwa Nyamuwanga.

Barumi 6:2

Wuri, noorwo na akatyari! Eswe chaabha rwa abhafuuwe ku‑misango ja okukora ebhibhiibhi. Kurwa ejo, chitakutura okugenderera okwikara rindi mu‑bhibhiibhi.

Barumi 6:22

Woori musuruumuuywe na Nyamuwanga okusooka mu‑bhugaya bhwemwe bhwa echibhiibhi. Ka wone, abhakorere okubha abhakosi bhaaye, na okuruubhana na ejo mubhwene omuriiro. Omuriiro ogwo ni kukorera emirimu Nyamuwanga kwa omwoyo gwone na ku‑bhuteero ni kuramira obhuwanga bhwa akajaanende koone.

Barumi 7:3

Kurwa ejo, akatwarwa na omurume owundi omwanya gunu omurume waaye achaari muwanga, kaabha omuromerwa. Nawe araabha omurume waaye ꞉aafuuwe, echiraagiro echo chitakumubhoya rindi, kaatura okutwarwa na omurume owundi, noorwo atakubha omuromerwa.

Barumi 7:6

Chaariga chibhoyerwe na ebhiraagiro, nawe woori chifuuwe aamwi na Kirisito, kutyo, ebhiraagiro ebhyo bhitakuchibhoya rindi. Woori chitakukorera Nyamuwanga ku‑njira ya kara ya okuruubha ebhiraagiro bhinu ꞉bhyakaamirwe, tari ku‑njira inyaaya ya okutangasibhwa na Mwoyo Mweru.

Barumi 8:2

Ku‑njira ya okubha na obhumwi na Kirisito Yeesu, amanaga ga Mwoyo Mweru unu kaareeta obhuwanga bhwa akajaanende koone, gankorere nibhe na obhwitaage, korereki nisige okutungwa na amanaga ga ebhibhiibhi na orufu.

1 Bakorinto 10:16

Omwanya gunu echisiima Nyamuwanga inguru ya omutawo gurya gwa amabhando ga ebhiryo bhya Raatabhugenyi, owubha chitakusangira aamwi isagama ya Yeesu Kirisito? Ka wone, omwanya gunu echibheganya omukaate, owubha chitakusangira aamwi omubhiri gwa Kirisito?

2 Bakorinto 11:2

Anye enibhafuyira, rifuwa rinu erisooka ku‑Nyamuwanga, kwa okubha muri rwa omuyarajuma, unu ꞉naasandiiye obhuko omurume umwi, omurume oyo niwe Kirisito.

Bagalatia 3:13

Kirisito ꞉aacheeruuye okusooka mu‑chiyiimo cha ebhiraagiro kwa okugega echiyiimo echo, inguru yeeswe. Ebhikaame Ebhyeru ebhyayika ati, “Woonewoone unu abhambirwe ku‑musarabha, eeyiimirwe.”

Bagalatia 5:18

Araabha omutangasibhwa na Mwoyo Mweru, mutaritungwa na ebhiraagiro rwa abhagaya.

Baefeso 2:15

Omwanya gunu ꞉aakorere kutyo, ꞉aasoosiisye‑wo obhutinge bhwone bhwa ebhiraagiro bhya Echiyawudi. Obhwira bhwaye bhwariga bhuri okukora ebhise bhibhiri ebhyo, okubha echise chimwi echiyaaya. Nikwo kutyo ꞉aareetere omurembe agatigati ya Abhayawudi na bhanu bhatari Bhayawudi na okubhagwatanya aamwi nage.

Bafilipi 1:11

Obhurame bhwemwe bhuriijura emisango ja rirenga jinu ejibhonekana ku‑njira ya Yeesu Kirisito. Ejo joone jirikumya Nyamuwanga na okumukusya.

Bafilipi 4:17

Nitakwayika kutyo kwa okubha enikena okuramira ebhiinu okusooka kw‑imwe, wuri. Tari eneenda nirore amabhando ganu Nyamuwanga aribhoongesya inguru ya obhufura bhwemwe.

Bakolosai 1:10

Niwo muritura okurama rwa kutyo Raatabhugenyi Yeesu keenda na okumukondisya ku‑misango joone. Obhurame bhwemwe bhurimukondisya inguru ya emirimu jeemwe ja ekisi, ka wone murigenderera okukura mu‑kumenya Nyamuwanga.

Bakolosai 1:22

ku‑njira ya orufu rwa Kirisito. ꞉Aakorere kutyo, korereki abhareete imbere yaaye muri bheeru, bhanyataayikwa kubhiibhi noorwo mutari na esoro.

Bakolosai 1:6

Emisango ja Ekisi jinu ꞉jaakingire kw‑imwe, woori ejiswirana mu‑chaaro choone. Ejigenderera okukora abhaanu bhatwasye amatwasyo na okukura echinyamwoyo, rwa kutyo ꞉jaakorekeene kw‑imwe okusookerera orusuku runu ꞉mwoonguuwe inguru ya obhwitiriranya bhwa Nyamuwanga na okusombookerwa kisi kutyo obhwitiriranya bhwaye bhuri.

Bakolosai 2:14

꞉Aariyire ribhanja rya ebhibhiibhi bhyeswe ku‑njira ya Yeesu okuchifwira ku‑musarabha. ꞉Aasoosiisye‑wo orukaamo rwa ebhiraagiro runu rwariga niruchibhuura, ˆnaarusoosya‑wo chimwi kwa okurubhumiirira ku‑musarabha.

Bakolosai 2:20

Emwe, ꞉mwafuuwe aamwi na Kirisito, kutyo ꞉aabhachunguuye okusooka ku‑bhutinge bhwa akatungiiywe bhwa echaaro chinu. Mbe, ni kurwa ki muchaagayuka ebhiraagiro bhyebhwe, na okwikara rwa abhaanu bha ku‑chaaro kunu? Ebhiraagiro ebhyo nibhyo bhinu,

Baeburania 10:10

Woori, kwa okubha Yeesu aariga ˆnaakora okwenda kwa Nyamuwanga, Nyamuwanga kaacheesya ebhibhiibhi bhyeswe ku‑njira ya Yeesu Kirisito okwisoosya rumwi okubha echoogo.

1 Petero 2:24

Yeesu omwene ꞉aagegere ebhibhiibhi bhyeswe ku‑mubhiri gwaye, ˆnaabhambwa ku‑musarabha. ꞉Aakorere kutyo, korereki chisige okutungwa rindi na ebhibhiibhi, tari chiikare nichikondisya Nyamuwanga. Mu‑kuwutaasibhwa kwa Yeesu, emwe ꞉mwawosiibhwe.

Obhusweruro 19:7

Eswe wone, chikonderwe, chimusandabhire na okumukusya. Okubha obhuregesi bhwa Omwana wa Inaama bhwakinga, na omwenga emariiriiye.

Obhusweruro 21:9

Neeya owumwi wa bhamaraayika bhataanu na bhabhiri bharya, bhanu bhaariga bhari na amabhakuri gataanu na gabhiri ga jitambara etaanu na ebhiri ja obhuteero, ˆnaaja ˆnaambwira ati, “Iija enu, nikweresye omwenga, unu aribha omugasi wa Omwana wa Inaama.”