Bagalatia 2:4 - Indagano Inyaaya mu-Chijita

⁴ Omusango gwa okutenda ogwo ꞉gwabhusiibhwe na abhaanu bhanu bhaariga nibheekora wuti ni bhayiri bheeswe. Abhaanu abho, ꞉bheeyingisiisye mu‑bhumbise okutatirisya obhwitaage bhweswe bhunu ꞉chaayaaywe na Kirisito Yeesu. Obhukarariiye bhwebhwe bhwariga bhuri kuchikora chibhe abhagaya bha ebhiraagiro bhya Muusa.

INDAGANO INYA:YA

⁴ Okuba bariga bario abairi bo rurimi banu bengiye mu bumbise korereki batatirisye ec:bure ceswe cinu cinaco mu Kristo Yesu, korereki bacisubye mu bugaya.

Bagalatia 2:4 ပူးပေါင်းရင်းမြစ်များ

Ruuka 5:38

Nawe echifuufu echiyaaya, cheenderwe chituurwe mu‑sagwa ja jinjayi jinyaaya!

Ebikorwa 15:1

Abhaanu abharebhe nibhasooka Yuudeya, nibhooromokera mu‑musi gwa Atiyookiya. Nibheeyigisya abheekirisya nibhaayikaga ati, “Araabha mukarema okutendwa okuruubhana na jitungwa jinu ꞉chaasigiiywe na Muusa, mutakutura okuchunguka.”

Ebikorwa 15:24

Choongwa ati abhaanu abhandi okusooka mw‑iswe ꞉bhaabhabhwiriiye emisango ja okubhayabhya, ka wone ja okunyaasya emyoyo jeemwe, eswe ꞉chitaabhatumire.

Ebikorwa 20:30

Noorwo agati yeemwe abheene, bhariibhuka‑mo abhaanu bhanu bharyayika emisango jinu jitari ja echimari, korereki bhakurure abheeyigisibhwa, bhabharuubhirire abheene.

Barumi 8:15

Nyamuwanga ꞉ataabhayaaye Mwoyo Mweru, korereki mubhe rindi abhagaya bhanu abhamuubhaya, tari ꞉aabhayaaye Mwoyo Mweru, korereki mubhe abhaana bhaaye. Mwoyo oyo, niwe kaachiyaana obhuturo bhwa okubhirikira Nyamuwanga ati, “Abha,” obhugajuro bhwaryo “Raata!”

2 Bakorinto 11:13

Enaayika kutyo, kwa okubha abhaanu rwa abho, nibho jitumwa ja orubheeyi, abhakora emirimu mu‑bhurigerige, abheekora wuti, nibho jitumwa ja Kirisito.

2 Bakorinto 11:17

Emisango ja okwikuuya jinu enaayika woori, jitakusooka ku‑Raatabhugenyi, tari enaayika rwa omuunu omumuumu.

2 Bakorinto 11:20

Omwigumiirisya noorwo omuunu unu kaabhatuura mu‑bhugaya, unu kaabheebhira na okubhasaakura ebhiinu bhyemwe, ka wone unu keekora okubha omukuru inguru yeemwe na unu kaabhabhuma mu‑bhusu.

2 Bakorinto 11:26

Kwiya kaafu mu‑ngʼendo jaani, naariga niri mu‑ngʼanga ya okugegwa na emisima, mu‑ngʼanga ya okugwatwa na abhasaakusi, mu‑ngʼanga ya okusooka ku‑Bhayawudi bheejaasu na okusooka ku‑bhaanu bhanu bhatari Bhayawudi. Naariga niri mu‑ngʼanga mu‑misi, mu‑ngʼanga mw‑ibhara, na mu‑nyanja. Naariga niri mu‑ngʼanga ya okunyaasibhwa na bhanu abheekora wuti ni bheekirisya abheejaasu.

2 Bakorinto 3:17

Woori, Raatabhugenyi ni Mwoyo, na anu Mwoyo wa Raatabhugenyi ari, awo niwo bhuri bhwitaage.

Bagalatia 1:7

Chimari ni ati jitari‑wo Emisango ja Ekisi ejindi. Nawe bhari‑wo abhaanu bhanu abhabhajiga na abhakena okuyindura Emisango ja Ekisi inguru ya Kirisito.

Bagalatia 4:25

Abhaanu bha Yerusareemu ya woori ni bhagaya bhanu abharuubha ebhiraagiro bhya Muusa. Abho ni bhagaya rwa abhaana bha Ajiri, kwa okubha omwene ari rwa echiima cha Sinaayi mu‑chaaro cha Ebhwarabhu.

Bagalatia 4:3

Nyabhuriko eswe wone, ni kutyokutyo, omwanya gunu Kirisito aariga achaari okuuja, chaariga chiri rwa abhaana abharera, chaariga chiri bhagaya bha obhutinge bhwa akatungiiywe bhwa echaaro chinu.

Bagalatia 5:1

Kirisito achiyaaye obhwitaage, korereki chiikare mu‑bhwitaage obhwo. Kurwa ejo, mwimereeguru murumateene, mwasiga okwikirisya okusubha rindi mu‑bhugaya bhwa ebhiraagiro.

Bagalatia 5:10

Enimenya kisi ati emwe muri na obhumwi na Raatabhugenyi Yeesu, kurwa ejo, mutariikirisya okujigwa. Nawe omuunu woonewoone unu aribhajiga, noorwo abhega, ariyaanwa ebhitiibha.

2 Timoteo 3:6

Mu‑bheene abho bhari‑mo bhanu abheengira kwa obhwira bhwa ebhibhiibhi mu‑misi ja abhaanu na okujiga abhagasi abhamuumu. Abhagasi abho bhatungirwe na ebhibhiibhi, ka wone abhakururwa na obhurigire bhwa ebhibhiibhi bhya bhuri mbaga.

Yakobo 1:25

Nawe omuunu unu kaarora etegeresiisye echiraagiro chinu chikuumiiye na okureeta obhwitaage, ˆnaagenderera okukora ejo okurabhirwa wuri jinu ꞉oonguuwe na okujiruubhirira, oyo niwe aribhona amabhando mu‑kukora kutyo.

1 Petero 2:16

Mwikare rwa abhaanu bhanu bhari na obhwitaage, nawe mu‑bhwitaage obhwo, mwasiga okukora ebhibhiibhi. Mwikare rwa kutyo Nyamuwanga kaakena abhakosi bhaaye bheekare.

2 Petero 2:19

Abheeyigisya bha orubheeyi abho abharaga abhaanu ati bhakabheekirisya bharibha na obhwitaage, kasi abheene abho nibho abhagaya bha obhunyamuke. Jiri kutyo kwa okubha bhuri muunu kaabha omugaya wa choonechoone chinu chimutamire.

1 Yoana 4:1

Abheendwa bhaani mu‑riikirisya, musige okwikirisya bhuri muunu unu kaayika ati, ari na Mwoyo wa Nyamuwanga. Tari mutatirisye kisikisi korereki mumenye chimari araabha omuunu oyo, kaatangasibhwa na Mwoyo wa Nyamuwanga. Mukore kutyo, kwa okubha abharagi abhaafu bha orubheeyi bheebhukire mu‑chaaro munu.

Yuuda 1:4

Enibhakaamira inyarubha inu, kwa okubha bhari‑wo abheeyigisya abharebhe bha orubheeyi bhanu bheeyingisiisye mw‑imwe bhumbise. Abhaanu abho, bhatakugayuka Nyamuwanga. Mu‑meeyigisyo gwebhwe, abhayindura obhwitiriranya bhwa Nyamuwanga weeswe, abhakora bhubhe rwa isonga ya okukora emisango ja orukubho. Ka wone, abheegaana Raatabhugenyi weeswe Yeesu Kirisito, omutangasya weeswe omukuru. Nawe okwambira kara jikaamirwe mu‑Bhikaame Ebhyeru ati, abhaanu abho, bhariramurwa rwa kutyo abhandi ꞉bhaaramuuywe.