2 Bakorinto 12:9 - Indagano Inyaaya mu-Chijita

⁹ Nawe omwene ˆnaambwira ati, “Obhwitiriranya bhwani bhukwiyire, kwa okubha amanaga gaani agabhuurisibhwa mu‑bhujorobhoke.” Kurwa ejo, niribhaga niniikuuya kw‑ikonderwa enene inguru ya obhujorobhoke bhwani, korereki amanaga ga Kirisito gabhe aamwi na anye.

INDAGANO INYA:YA

⁹ Omwene nambwira ati, Ecigongo cani cikumarire, okuba amanaga gani agakumirira mu binu bitana managa. Kwenikora nini:ku:isya mu kuburwa amanaga ninkonderwa muno, korereki amanaga ga Kristo ge:kare kwanye.

2 Bakorinto 12:9 ပူးပေါင်းရင်းမြစ်များ

Matayo 28:18

Mbe, Yeesu ˆnaabhafogera‑ko, ˆnaabhabhwira ati, “Nyamuwanga anaaye obhuturo bhwone bhwa mu‑rwire na obhwa ku‑chaaro.

Matayo 28:20

na okubheeyigisya okugwata joone jinu ꞉naabharagiriiye. Mwichuke ati, anye niri aamwi na emwe siku joone, okukingira ku‑bhuteero bhwa echaaro.”

Ruuka 21:15

Anye omwene, niribhayaana obhwengeeso, na emisango jinu muryayika, abhasoko bheemwe bhataritura okuyaajana najo, noorwo okujirema.

1 Bakorinto 10:13

Amaregeejo ganu gaabhabhona, gari rwa ganu abhaanu abhandi abhabhona bhuri rusuku. Nyamuwanga ni mwiyikanyibhwa, omwene atakuja okubhasiga muregeejibhwe okukira obhuturo bhwemwe. Omwanya gunu emwe omuregeejibhwa, Nyamuwanga kaja okubhayaana obhuturo bhwa okwigumiirisya na okubheeresya injira ya okusooka omwo.

1 Bakorinto 15:10

Nawe obhwitiriranya bhwa Nyamuwanga nibhwo bhukorere anye okubha itumwa. Obhwitiriranya bhwaye kw‑anye bhwariga bhutari bhwa kutyo era, kwa okubha okutura ku‑bhwitiriranya obhwo, nikorere emirimu okukira jitumwa joone. ꞉Nitaakorere ejo ku‑bhuturo bhwani omwene, tari Nyamuwanga ku‑bhwitiriranya bhwaye niwe ꞉aakorere emirimu aamwi na anye.

1 Bakorinto 2:3

Omwanya ogwo naariga nijorobhokere, naariga ninuubhaya, okukingira okuyarara muno.

1 Bakorinto 2:5

꞉Naakorere kutyo, korereki eriikirisya ryemwe ryasiga okwiyikanya obhwengeeso bhwa abhaanu, tari riyikanye amanaga ga Nyamuwanga.

2 Bakorinto 11:30

Araabha neenderwe okwikuuya, enija okwikuuya inguru ya obhujorobhoke bhwani.

2 Bakorinto 12:1

Neenderwe niikuuye, noorwo kutyo kutakusakira choonechoone. Nawe woori eneenda okwikuuya inguru ya ebhiroro na emisango ejindi jinu Raatabhugenyi answeruriiye.

2 Bakorinto 12:10

Enikondererwa obhujorobhoke bhwani, ka wone enikondererwa amafumo, jimbuma, jinyaako, na ebhinyaasyo, bhinu ebhimbona inguru ya Kirisito. Enikondererwa, kwa okubha omwanya gunu enibha niri mujorobhoke, niwo enibha niri na amanaga.

2 Bakorinto 12:15

Anye enikondererwa okusoosya ebhiinu bhyani noorwo okwisoosya anye omwene, korereki nibhasakire. Nawe ejibhonekana ati, omwanya gunu anye enigenderera okubheenda muno, niwo emwe omugerura eryenda ryemwe kw‑anye.

2 Bakorinto 12:5

Woori inguru ya omuunu rwa oyo, enija okwikuuya. Nawe nitariikuuya inguru yaani omwene, tari inguru ya obhujorobhoke bhwani era.

Baefeso 3:16

Enimusabhwa ati, okuruubhana na rikusyo ryaye eryafu abhayaane amanaga ku‑njira ya Mwoyo waaye, murumatanega ndindindi mu‑myoyo jeemwe,

Bafilipi 4:13

Enitura okukora emisango ejo joone, kwa okubha Kirisito niwe kaanaana amanaga.

Bakolosai 1:11

Echisabhwa Nyamuwanga abhasakirega ku‑managa gaaye amaafu, korereki mubhe na obhuturo bhwa okwigumiirisya mu‑joone aamwi na okukondererwa.

1 Timoteo 1:14

Chimari, Raatabhugenyi weeswe Kirisito Yeesu ꞉aanyitiriiye obhwitiriranya bhwafu muno. Ka wone, ꞉aanaaye eriikirisya na eryenda mu‑kubha na obhumwi nage.

Baeburania 11:34

꞉Bhaasimiisye emiriro emiruru kabhukabhu. ꞉Bhaawonere okwitwa kwa imbanda. Bhaariga bhari bhajorobhoke, nawe Nyamuwanga ꞉aabhayaaye amanaga ga okuyiga riremo na okubhirimya abhasirikare bha ebhyaro ebhindi.

Baeburania 4:16

Kurwa ejo chibhe na ribhaasi mu‑kufogera ku‑chitebhe cha ingʼoma cha Nyamuwanga, korereki achiyaane echigongo na obhwitiriranya bhwa okuchisakira omwanya gwa obhukene bhweswe.