1 Yoana 5:20 - Indagano Inyaaya mu-Chijita

²⁰ Ka wone, echimenya ati Omwana wa Nyamuwanga eejire mu‑chaaro munu, achiyaanire obhwenge, korereki chisombookerwe Nyamuwanga wa echimari. Chiri na obhumwi na Nyamuwanga wa echimari, kwa okubha chiri na obhumwi na Omwana waaye Yeesu Kirisito. Omwene niwe Nyamuwanga wa echimari, unu ari bhuwanga bhwa akajaanende koone.

INDAGANO INYA:YA

²⁰ Na ka cimenyere ati, Omwana wa Nyamuanga e:jire, naciyana obwenge korereki cimenye Unu ari we cimari. Neswe ciri mu:yo ari we cimari, niwe Omwana wae Yesu Kristo. Oyo niwe Nyamuanga we cimari no buanga bwa kajanende.

1 Yoana 5:20 ပူးပေါင်းရင်းမြစ်များ

Matayo 13:11

ˆNaabhasubhya ati, “Emwe, Nyamuwanga abhayaaye obhuturo bhwa okusombookerwa emisango jinu jichaari mbisike inguru ya obhukama bhwaye. Nawe abheene bhatayaaywe obhuturo bhwa okujisombookerwa.

Ruuka 21:15

Anye omwene, niribhayaana obhwengeeso, na emisango jinu muryayika, abhasoko bheemwe bhataritura okuyaajana najo, noorwo okujirema.

Ruuka 24:45

Niwo, ˆneegura obhwenge bhwebhwe korereki bhasombookerwe jinu jaariga jikaamirwe mu‑Bhikaame Ebhyeru.

Yowana 1:18

Atari‑wo omuunu woonewoone unu ararorere Nyamuwanga noorwo na akatyari. Tari Mwana waaye eenyere, unu wone ari Nyamuwanga, ka wone ari yeeyi na Raata Nyamuwanga, oyo niwe asweruuye Nyamuwanga kw‑iswe.

Yowana 10:30

Anye na Raata chiri chiinu chimwi.”

Yowana 14:20

Ku‑rusuku orwo murimenya ati, anye niri na obhumwi na Raata waani, na emwe muri na obhumwi na anye, na anye niri na obhumwi na emwe.

Yowana 14:23

Yeesu ˆnaamusubhya ati, “Omuunu woonewoone unu aanyendere, arigwata emisango jaani na Raata waani arimwenda. Ka wone anye na Raata chiriija ku‑mwene na okwikara aamwi nage.

Yowana 14:6

Yeesu ˆnaamusubhya ati, “Anye naanye injira, echimari, na obhuwanga. Atari‑wo omuunu woonewoone unu kaatura okuuja ku‑Raata araabha ataturire kw‑anye.

Yowana 14:9

Yeesu ˆnaamusubhya ati, “Firipo, niikaaye aamwi na emwe omwanya omureera gunu, uchaari kummenya? Omuunu woonewoone unu andorere, ararorere Raata. Mbe, kurwa ki owumbwira ati, ‘Cheeresye Raata’?

Yowana 15:4

Mubhega na obhumwi na anye, anye wone enija okubha na obhumwi na emwe. Rwa kutyo ritabhi ritakutura okutwasya amatwasyo eryene era rikabha ritari kw‑iti rya rijabhiibhu, nikwo kutyo emwe wone mutakutura okukora okwenda kwa Nyamuwanga mukabha mutari kw‑anye.

Yowana 17:14

Naabhabhwira emisango jinu unaaye. Nawe abhaanu bha ku‑chaaro kunu abhabhasoka, kwa okubha abheeyigisibhwa bhaani bhatari bha ku‑chaaro kunu, rwa kutyo anye nitari wa ku‑chaaro kunu.

Yowana 17:25

Raata omurengeresi, abhaanu bha ku‑chaaro kunu bhatakukumenya. Nawe anye nikumenyere, ka wone abheeyigisibhwa bhaani abhamenya ati naawe ꞉waantumire.

Yowana 17:3

Obhuwanga bhwa akajaanende nibhwo bhunu, abhaanu bhakumenye awe, Nyamuwanga eenyere wa chimari, ka wone, bhammenye anye Yeesu Kirisito, unu awe ꞉waantumire.

Yowana 20:28

Tomaasi ˆnaamusubhya ati, “Raatabhugenyi waani na Nyamuwanga waani!”

Yowana 8:42

Yeesu ˆnaabhasubhya ati, “Araabha Nyamuwanga akabheeye ari Somwana, mwakanyendere, kwa okubha nisookere ku‑mwene, ka woori niri anu. Anye ꞉niteejire ku‑bhuturo bhwani, tari Nyamuwanga niwe ꞉aantumire.

Ebikorwa 20:28

Woori, mubhega mwiyangariiye na murinde ebhise bhyone bhya abheekirisya, kwa okubha Mwoyo Mweru, abhateeye‑wo mubhe abhaangarisi. Mwangarire abheekirisya abho, kwa okubha Nyamuwanga ꞉aabhagurire kwa isagama ya omwana waaye.

Barumi 9:5

Abhayisirayeeri abho nibho orwibhuro rwa bhasaaja Bhurayimu, Isaaka na Yakobho. Echinyamuunu, noorwo Kirisito ni Muyisirayeeri. Kirisito, niwe Nyamuwanga, Omukuru wa bhyone, akusibhwe akajaanende koone! Jibhe kutyo.

1 Bakorinto 1:30

Nyamuwanga niwe abhagwatanyiisye emwe na Kirisito Yeesu. Omwene akorere Kirisito okubha obhwengeeso bhweswe. Nikwo okwayika ati okutura ku‑Yeesu chaabha abharengeresi imbere ya Nyamuwanga, chaabha abheeru, ka wone cheeruuywe.

2 Bakorinto 4:6

Okubha Nyamuwanga ꞉aayikire ati, “Obhweru bhumirike mu‑chisuute.” Omwene niwe kaamirika emyoyo jeeswe, na okuchiyaana obhweru bhwa okusombookerwa rikusyo ryaye, rinu eringʼarabhya mu‑bhusu bhwa Yeesu Kirisito.

2 Bakorinto 5:17

Omuunu woonewoone unu ari na obhumwi na Kirisito, aabha echibhumbwa echiyaaya, emisango ja kara jaayitingʼeene, woori ni miyaaya!

Baefeso 3:18

korereki emwe aamwi na abheeru abhandi bhoone, mubhe na obhuturo bhwa okusombookerwa obhugari, obhureera, obhwima na echitaanda cha eryenda rya Kirisito kutyo riri.

Bafilipi 3:9

ka wone nibhe na obhumwi nage. Nitakwiyikanya rindi obhurengeresi bhunu obhusooka mu‑kugayuka ebhiraagiro, tari obhurengeresi bhunu obhusooka mu‑kwikirisya Kirisito. Obhwo nibhwo obhurengeresi bhunu Nyamuwanga kaayaana bhanu abheekirisya Kirisito.

1 Timoteo 3:16

Echimari chinu Nyamuwanga asweruuye ni cha okuruguusya na nicho chinu, Kirisito ꞉eesweruuye mu‑mubhiri, ˆnaayikwa na Mwoyo Mweru ati ni murengeresi, ˆnaabhonekana ku‑bhamaraayika, ˆnaaraasibhwa mu‑maanga goone, ˆneekirisibhwa na abhaanu bha mu‑chaaro, ˆnaagegwa okuja inguru mw‑ikusyo.

Tiito 2:13

Eswe, echirindirira chiiyikanyisye inguru ya orusuku rwa okuruguusya runu Yeesu Kirisito arisubha ari mw‑ikusyo ryaye. Omwene niwe Nyamuwanga omukuru na Omuchungusi weeswe.

Baeburania 1:8

Nawe inguru ya Omwana waaye ꞉aayikire ati, “Awe Nyamuwanga uritunga akajaanende na akajaanende, na obhutungi bhwawo bhuribha bhwa obhurengeresi.

1 Yoana 2:23

Omuunu woonewoone unu kaarema Omwana wa Nyamuwanga, atari na obhumwi na Raata Nyamuwanga. Nawe, unu keekirisya Omwana, imbere ya abhaanu, kaabha na obhumwi na Raata Nyamuwanga wone.

1 Yoana 2:24

Kurwa ejo, mu‑myoyo jeemwe, mugenderere okuruubha emeeyigisyo garya ꞉mweeyigisiibhwe okusookerera omwanya gunu ꞉mwaambire okwikirisya Yeesu Kirisito. Okubha, araabha mukagenderera okuruubha ameeyigisyo ago, niwo omugenderera okubha na obhumwi na Omwana, aamwi na Raata Nyamuwanga.

1 Yoana 2:6

Omuunu unu kaayika ati ari na obhumwi na Nyamuwanga, kaakenwa akore rwa kutyo Yeesu aariga ˆnaakora.

1 Yoana 4:14

Eswe chibhuganganyiisye ameeso na Omwana wa Nyamuwanga. Woori, echibhwira abhaanu abhandi echimari ati, oyo niwe Raata Nyamuwanga ꞉aatumire mu‑chaaro okubha Omuchungusi wa abhaanu bhoone.

1 Yoana 4:16

Woori, eswe echimenya na echiikirisya ati Nyamuwanga kaacheenda. Nyamuwanga ni ryenda. Omuunu woonewoone unu ari na eryenda, niwe ari na obhumwi na Nyamuwanga, Nyamuwanga wone ari na obhumwi nage.

1 Yoana 4:2

Injira ya okumenya ati omuunu kaatangasibhwa na Mwoyo wa Nyamuwanga niyo inu, omuunu woonewoone unu keekirisya na okutogora ati Yeesu Kirisito ꞉eejire ˆnaabha na omubhiri rwa omuunu, oyo niwe kaatangasibhwa na Mwoyo wa Nyamuwanga.

1 Yoana 5:1

Woori, omuunu woonewoone unu keekirisya ati Yeesu ni Kirisito, omuunu oyo niwe omwana wa Nyamuwanga. Ka wone, woonewoone unu keenda omwibhusi wa omwana, keenda na abhaana bha omwibhusi oyo.

1 Yoana 5:15

Mbe, eswe echimenya ati Nyamuwanga kaategeresya risabhwa ryeswe, nikwo okukora, echimenya wone ati, kaachiyaana ebhiinu bhinu echimusabhwa.

1 Yoana 5:18

Echimenya ati omwana woonewoone wa Nyamuwanga, atakugenderera okukora ebhibhiibhi, kwa okubha Omwana wa Nyamuwanga kaamurinda, Omubhiibhi urya atakutura okumukuunʼya‑ko.

1 Yoana 5:5

Atari‑wo omuunu unu kaatura okuyiga ebhibhiibhi tari unu keekirisya era ati, Yeesu ni Mwana wa Nyamuwanga.

Obhusweruro 15:3

Abhaanu abho bhaariga nibheemba orwimbo rwa Muusa, omukosi wa Nyamuwanga. Orwimbo orwoorwo nirwo rwa Omwana wa Inaama. Bheembaga ati, “Raatabhugenyi awe Nyamuwanga owa obhuturo bhwone, ebhikorwa bhyawo ni bhikuru na ebhya okuruguusya. Awe, niwe Omukama wa amaanga goone, na jinjira jaawo ni ja obhurengeresi na ja echimari.

Obhusweruro 19:11

Nejire neeya, nindora orwire rwigukire. Ringira, ifwaraasi iinyeru na unu aariga ayiriinyire‑ko kaatogwa ati, “Mwiyikanyibhwa” na “Owa Echimari.” Niwe kaaramura na okurwana riremo kwa obhurengeresi.

Obhusweruro 3:14

“Ukaamire maraayika wa mw‑ikanisa rya Rawodeekiya kutya, Anye, naanye Jibhe kutyo, omubhambaasi omwiyikanyibhwa wa echimari inguru ya Nyamuwanga. Anye, naanye obhusimukwa bhwa ebhibhumbwa bhyone bhinu Nyamuwanga ꞉aabhumbire. Mutegeresye jinu enibhabhwira!

Obhusweruro 3:7

“Ukaamire maraayika wa mw‑ikanisa rya Firadeefiya kutya, Anye niwe omweru na owa echimari. Ka wone, niri na orwiguriro rwa omukama Dawudi. Nikeegara orwigi, atari‑wo owundi unu kaatura okurwigura. Nikarwigura, atari‑wo owundi unu kaatura okurwigara. Mutegeresye jinu enibhabhwira!

Obhusweruro 6:10

Niwo, nibhaamura obhuraka nibharira, nibhaayika ati, “Raatabhugenyi awe, Nyamuwanga owa obhuturo bhwone, unu uri mweru na owa echimari, mbawo owukoora! Uriramura ri abhaanu bha ku‑chaaro na okuchisubhisya orusiima ku‑bhanu ꞉bhaachiitire?”