1 Yoana 4:1 - Indagano Inyaaya mu-Chijita

¹ Abheendwa bhaani mu‑riikirisya, musige okwikirisya bhuri muunu unu kaayika ati, ari na Mwoyo wa Nyamuwanga. Tari mutatirisye kisikisi korereki mumenye chimari araabha omuunu oyo, kaatangasibhwa na Mwoyo wa Nyamuwanga. Mukore kutyo, kwa okubha abharagi abhaafu bha orubheeyi bheebhukire mu‑chaaro munu.

INDAGANO INYA:YA

¹ Abendwa, mute:kirisyaga buri mwoyo gwone, nawe musakega emyoyo, araba jaso:kere ku Nyamuanga. Okuba abaragi ba:fu abo rurimi be:mukire mu ca:ro.

1 Yoana 4:1 ပူးပေါင်းရင်းမြစ်များ

Mariko 13:21

“Ku‑mwanya ogwo, araabha omuunu kaabhabhwira ati, ‘Ringira, Kirisito ari anu!’ amwi ‘Ari erya!’ mwasiga okumwikirisisya.

Ruuka 12:57

“Mbawo emwe abheene, mu‑mutima jeemwe omutaamibhwa okuramura okukora emisango jinu jiri ja rirenga?

Ruuka 21:8

Yeesu ˆnaabhasubhya ati, “Mwangarire, omuunu woonewoone aasiga okubhajiga. Abhaanu bhaafu bhariija nibhakoreraga emirimu risiina ryani, bharyayikaga ati, ‘Anye naanye Kirisito!’ Ka wone bharyayikaga ati, ‘Omwanya gwa obhuteero gwafogeeye!’ Abhaanu abho, mwasiga okubharuubha!

Ebikorwa 17:11

Abhaanu bha Bherooya awo, bhaariga bhari na obhutinge bhwa kisi okukira abha Tesaroonike. Nibhakora Pawuro, abharaasisye omusango gwa Nyamuwanga, nibhaguramira kwa amanaga goone. Bhaaringiraga mu‑Bhikaame Ebhyeru bhuri rusuku, korereki bhamenye ati ejo aayikaga Pawuro ni ja echimari.

Ebikorwa 20:29

“Nimenyere ati omwanya gunu nirisigana na emwe, abhaanu abharuru bhariija okwiyingisya mw‑imwe. Bharikora rwa kutyo emisege ejiingira mu‑naama na bhataribhafwira echigongo wuri.

1 Bakorinto 12:10

owundi echiyaanwa cha okukora ebhiruguusyo, owundi echiyaanwa cha okusoosya obhuragi. Mwoyo oyooyo kaayaana owundi echiyaanwa cha okusombookerwa araabha omusango gusookere ku‑masambwa amwi ku‑Mwoyo Mweru, owundi echiyaanwa cha okwayika jinyaayika jingenyi, owundi echiyaanwa cha okugajura jinyaayika ejo.

1 Bakorinto 14:29

Abhaanu bhanu abhasoosya obhuragi, bhaayikega bhabhiri amwi bhasatu, na abhandi bhatatirisye kisi emisango jeebhwe.

1 Batesalonika 5:20

Ka wone musige okurema obhuragi,

1 Batesalonika 5:21

tari, muregeeje emisango joone ja obhuragi, nawe mugwate‑mo ja ekisi

2 Batesalonika 2:2

musige okusurumbara noorwo okuubhaya mu‑myoyo jeemwe ati, orusuku rwa okusubha Raatabhugenyi Yeesu rwakingire. Amwi mubhe munguuwe kutyo okuruubhana na obhuragi obhurebhe, amwi emisango, amwi musomere inyarubha inu eyitogerwa ati isookere kw‑iswe.

1 Timoteo 4:1

Woori, Mwoyo Mweru kaayika abhwerubhweru ati, mu‑siku ja obhuteero, abhaanu abhandi bharisiga eriikirisya rya echimari, bharitegeresya emyoyo jinu ejiyabhya na bharigayuka ameeyigisyo ga amasyetaani.

2 Timoteo 3:13

Nawe bhanu abhakora ebhibhiibhi na abhajigi, bharigenderera okukora ebhibhiibhi muno, bharibhaga nibhajiga na okujigwa.

2 Petero 2:1

Nawe omwanya gwa abharagi, ꞉bheebhukire abharagi abhabheeyi agati ya Abhayisirayeeri. Nikwo kutyo wone, abheeyigisya bha orubheeyi bhariibhuka agati yeemwe. Abhaanu abho, bhariyigisyaga ku‑bhurigerige ameeyigisyo ga okuyabhya abhaanu, noorwo bhariigaana Raatabhugenyi, unu abhagurire. Ku‑njira eyo, abheene bhariireetera bhwangu okusingaarika kwebhwe abheene.

1 Yoana 2:18

Abhaana abheendwa mu‑riikirisya, jisiku ja obhuteero jaakinga! Mwonguuwe ati omusoko wa Kirisito kaaja, noorwo woori abhasoko abhaafu bha Kirisito bheejire. Kutyo nikwo echimenya ati chiri mu‑siku ja obhuteero.

1 Yoana 2:7

Abheendwa bhaani mu‑riikirisya, echiraagiro chinu enibhakaamira chitari chiyaaya, tari ni chiryachirya cha kara chinu mwariga muri nacho okusookerera omwanya gunu ꞉mwaambire okwikirisya Yeesu Kirisito. Echiraagiro echo, ni musango gurya ꞉mwoonguuwe inguru ya eryenda.

2 Yoana 1:7

Mbe, enaayika kutyo, kwa okubha abhabheeyi bhaafu bheebhukire ku‑chaaro kunu. Abhaayika ati Yeesu Kirisito ꞉eejire atari na omubhiri rwa gwa omuunu. Omuunu woonewoone unu kaayika kutyo ni omubheeyi, ka wone niwe omusoko wa Kirisito.

3 Yoana 1:11

Woori, omwendwa waani Gaayo, waasiga okuruubha echijekekanyo echibhiibhi, tari echijekekanyo cha ekisi. Omuunu woonewoone unu kaakora ja ekisi, oyo ni mwana wa Nyamuwanga. Nawe unu kaakora ebhibhiibhi, atakusombookerwa ati Nyamuwanga niga.

Obhusweruro 2:2

Enimenya ebhikorwa bhyemwe, okwikomeesya kwemwe na obhwigumiirisya bhwemwe. Enimenya wone ati mutakutura okwigumiirisya abhaanu abhabhiibhi. Ka wone, mwaregeejere abhaanu bhanu abheetoga ati ni jitumwa, keenu bhatari jitumwa. Mwabharegeeja, nimusongʼana ati, ni bhabheeyi.