1 Yoana 1:3 - Indagano Inyaaya mu-Chijita

³ Echibharaasisya emisango inguru ya Yeesu unu ꞉chaarorere na okumutegeresya, korereki mubhe na obhumwi na eswe mu‑riikirisya. Obhumwi obhwo, chiri nabhwo na Raata Nyamuwanga na Omwana waaye Yeesu Kirisito.

INDAGANO INYA:YA

³ Gunu carorere nicungwa, nigwo ecibabwira, korereki emwe one musangire neswe. No kusangira kweswe ecisangira na Rata no Mwana wae Yesu Kristo.

1 Yoana 1:3 ပူးပေါင်းရင်းမြစ်များ

Yowana 17:11

Anye eniija kw‑awe, mbe nitakuja okubha rindi ku‑chaaro kunu. Nawe abheene abhagenderera okubha ku‑chaaro kunu. Raata Omweru, ubharinde ku‑bhuturo bhwa risiina ryawo rinu unaaye, korereki bhabhe chiinu chimwi rwa kutyo anye na awe chiri chiinu chimwi.

Yowana 17:21

Enisabhwa ati abho bhoone bhabhe chiinu chimwi. Raata, enisabhwa ati bhabhe na obhumwi na eswe, rwa kutyo awe uri na obhumwi na anye, na anye wone niri na obhumwi na awe. Enisabhwa ati bhabhe chiinu chimwi, korereki abhaanu bha ku‑chaaro kunu bheekirisye ati chimari naawe ꞉waantumire.

Yowana 17:25

Raata omurengeresi, abhaanu bha ku‑chaaro kunu bhatakukumenya. Nawe anye nikumenyere, ka wone abheeyigisibhwa bhaani abhamenya ati naawe ꞉waantumire.

Yowana 17:3

Obhuwanga bhwa akajaanende nibhwo bhunu, abhaanu bhakumenye awe, Nyamuwanga eenyere wa chimari, ka wone, bhammenye anye Yeesu Kirisito, unu awe ꞉waantumire.

Yowana 19:35

Emisango jinu ꞉jaakaamirwe na omuunu unu ꞉aarorere jinu jaariga nijikorekana. Obhubhambaasi bhwaye ni bhwa echimari, ka wone amenyere ati kaayika ja echimari, korereki emwe wone mwikirisye.

Ebikorwa 13:32

“Eswe echibharaasisya emwe Emisango ja Ekisi ati, jinu nijo Nyamuwanga ꞉aaragire bhasaaja weeswe,

Ebikorwa 13:41

‘Emwe bhanu omugaya, muringire! Muruguure, rindi musingaarike, kwa okubha enikora omusango mu‑siku jeemwe gunu mutarigwikirisya, noorwo omuunu akabhasomboorera!’”

Ebikorwa 2:42

Abheekirisya bhoone nibheekomeesya okwiyigira ameeyigisyo ga jitumwa ja Yeesu, okusangira aamwi, okurya ebhiryo aamwi na okusabhwa Nyamuwanga aamwi.

Ebikorwa 20:27

Okubha bhuri gunu Nyamuwanga eendaga mugumenye, naabhabhwiraga nitaabha na echiitimaato.

Ebikorwa 4:20

Okubha eswe chitakutura okusiga okwayika inguru ya emisango jinu ꞉chaarorere na okuungwa!”

Barumi 15:27

Abheene abho ꞉bhaaramuuye okukora kutyo. Nawe ni chimari abhatongwa okubhasakira, kwa okubha abheekirisya bhanu bhatari Bhayawudi bhawumbeene aamwi na Abhayawudi mu‑mabhando ga obhuchungusi bhunu bhusokereeye ku‑Bhayawudi. Kurwa ejo, abheekirisya abho abheendwa bhasakire Abhayawudi kwa ebhiinu bhyebhwe.

1 Bakorinto 1:30

Nyamuwanga niwe abhagwatanyiisye emwe na Kirisito Yeesu. Omwene akorere Kirisito okubha obhwengeeso bhweswe. Nikwo okwayika ati okutura ku‑Yeesu chaabha abharengeresi imbere ya Nyamuwanga, chaabha abheeru, ka wone cheeruuywe.

1 Bakorinto 1:9

Nyamuwanga arikora ejo kwa okubha omwene ni mwiyikanyibhwa. Omwene niwe ꞉aabhabhirikiiye, mubhe na obhumwi na Omwana waaye Yeesu Kirisito, Raatabhugenyi weeswe.

1 Bakorinto 15:1

Woori, abhayiri bhaani mu‑riikirisya, enibheechukya Emisango ja Ekisi jinu ꞉naaraasiisye kw‑imwe, na emwe nimujiramira. Ejo nijo ejibhareterera okwimereeguru murumateene.

Baefeso 3:6

Obhutinge bhwa imbisike eyo, ni ati, ku‑njira ya okwikirisya Emisango ja Ekisi, abhaanu bhanu bhatari Bhayawudi na Abhayawudi bhari na omwandu gumwi, bhari mubhiri gumwi na abhasangira aamwi amabhando ganu bharagirwe mu‑Kirisito Yeesu.

Bafilipi 1:7

Ni kisi anye niganirisye kutyo inguru yeemwe bhoone, kwa okubha enibheenda muno. Okubha anye na emwe, chiyaaywe obhwitiriranya bhwa okusangira emirimu aamwi, nibhe niri mw‑ibhoyero amwi nimbagira na okweresya echimari cha Emisango ja Ekisi kutyo jiri.

Bafilipi 2:1

Mbe araabha omusiiriisibhwa mu‑kubha na obhumwi na Kirisito, araabha omufungʼamibhwa na ryenda ryaye, araabha muri na obhumwi na Mwoyo Mweru, araabha omwendwa na okufwirwa echigongo na Kirisito,

Bafilipi 3:10

Enikena nisombookerwe Kirisito muno na okubha na amanaga ganu Kirisito aariga ari nago omwanya gwa okusuuruka kwaye. Enikena obhumwi bhunu obhusooka mu‑kunyaaka rwa kutyo omwene ꞉aanyaakire, korereki nisusane nage mu‑kufwa kwaye.

Bakolosai 1:13

Achichunguuye okusooka mu‑bhutungi bhwa echisuute, achifurusiisye okusooka omwo na okuchiingisya mu‑bhukama bhwa Omwana waaye omwendwa.

1 Batesalonika 1:10

Wone abhatonda kutyo omurindirira Omwana waaye, asubhe rindi okusooka mu‑rwire. Oyo niwe Nyamuwanga ꞉aasuuruuye okusooka mu‑bhafuuwe. Niwe Yeesu unu kaachichungura okusooka mu‑ndamu ya Nyamuwanga inu eyiija.

1 Timoteo 6:2

Araabha abhagaya bhari na abhaami abheekirisya bhasige okubhagaya, kwa okubha abheene wone ni bhayiri. Abhagaya abho, abhakenwa bhabhakorere ja ekisi muno, kwa okubha abhabha nibhasakira abheekirisya abheejaabho, ka wone ni bheendwa bheebhwe. Ejo ujiiyigisye na okujikomeeresya.

Baeburania 2:12

Yeesu ꞉aabhwiriiye Nyamuwanga ati, “Enija okusimura ebhikorwa bhyawo ebhikuru ku‑bhayiri bhaani, enija okwimba jinyimbo ja okukukusya agatigati ya eriikofyanyo ryebhwe.”

Baeburania 3:1

Mbe, abhayiri bhaani mu‑riikirisya, emwe bhanu Nyamuwanga abhirikiiye aamwi na eswe okubha abhaanu bhaaye, mwiganirisye inguru ya Yeesu. Omwene oyo niwe Itumwa ya Nyamuwanga ka wone niwe Omugabhisi Omukuru wa emisango jinu echiikirisya.

Baeburania 3:14

Okubha chiri na obhumwi na Kirisito araabha chikagenderera okwiyikanya Nyamuwanga okukingira ku‑bhuteero, rwa kutyo chamwiyikanyaga ku‑bhwambiro.

1 Petero 5:1

Woori, enaayika na emwe abhakaruka bha rikanisa. Anye niri omukaruka oweejaanyu, unu ꞉neeroreeye omwene kutyo Kirisito ꞉aanyaasiibhwe. Ka wone, anye niri omusangisi oweejaanyu wa rikusyo rinu riri yeeyi okuswerurwa. Kurwa ejo, enibheerembeeresya emwe,

2 Petero 1:16

Omwanya gunu chaariga nichiiyigisya kutyo ariija ku‑bhuturo bhwaye, Raatabhugenyi weeswe Yeesu Kirisito, chaariga chitakwiyikanya jingani ja kara jinu jikaamirwe kwa obhwenge. Tari eswe ꞉chaarorere rikusyo ryaye kwa ameeso geeswe abheene.

1 Yoana 1:1

Echibharaasisya inguru ya Musango wa obhuwanga, unu ꞉aabheeye‑wo chichaari okubha‑wo echiinu choonechoone. Eswe ꞉chaamutegeresiisye, ꞉chaamurore na ameeso geeswe abheene, ꞉chaamuringiiye na okumukuunʼya‑ko na amabhoko geeswe.

1 Yoana 1:5

Mbe, omusango gunu ꞉choonguuwe ku‑Yeesu Kirisito, nigwo echibharaasisya ati, Nyamuwanga ari rwa obhweru, echisuute choonechoone chitari mu‑nda yaaye sirisiri.

1 Yoana 1:7

Tari, araabha chiramire mu‑bhweru rwa kutyo Nyamuwanga ari mu‑bhweru, awo niwo echibha na obhumwi eswe abheene kwa abheene. Ka wone isagama ya Yeesu, Omwana waaye, eyicheesya ebhibhiibhi bhyeswe bhyone.