1 Bakorinto 1:27 - Indagano Inyaaya mu-Chijita

²⁷ Nawe Nyamuwanga ꞉aawuuwe emisango jinu abhaanu abharora ati ni bhumuumu, korereki aswasye abha obhwengeeso. Ka wone Nyamuwanga ꞉aawuuwe emisango jinu abhaanu abharora ati ni bhujorobhoke, korereki aswasye abha amanaga.

INDAGANO INYA:YA

²⁷ Nawe Nyamuanga asorere ebimu:mu bya mu ca:ro, akorereki abaswasye abengeso. Ne birenga bya mu ca:ro Nyamuanga abisorere, akorereki aswasye ebya managa.

1 Bakorinto 1:27 ပူးပေါင်းရင်းမြစ်များ

Matayo 11:25

Omwanya ogwoogwo Yeesu ˆnaayika ati, “Raata, Raatabhugenyi wa orwire na echaaro choone! Enikusiima kwa okubha, emisango jinu ꞉waakorere okubha mbisike ku‑bhaanu abha obhwengeeso na abhamenyi, wajisweruuye abhwerubhweru ku‑bhaanu bhanu bhari na eriikirisya rwa abhaana abharera.

Matayo 21:16

Nibhabhuusya Yeesu ati, “Angu, owungwa kutyo abhaana bhanu abhaayika?” Yeesu ˆnaabhasubhya ati, “Enuungwa. Kasi muchaari kusoma emisango jinu jikaamirwe mu‑Bhikaame Ebhyeru ati, ‘Wibhoneeye jikuma, okutura mu‑minwa ja abhaana abharera na bhanu abhaneena’?”

Matayo 9:9

Yeesu ejire aasooka awo, bhunu aaribhataga ku‑njira, ˆnaarora omutobhesya umwi wa rigooti unu aatogwaga ati, Mataayo. Omutobhesya oyo, aariga eenyanjire mw‑itobhesisyo rya rigooti. Yeesu ˆnaamubhwira ati, “Nuunduubhe.” Awoawo, Mataayo ˆneemuka, ˆnaamuruubha.

Ruuka 21:15

Anye omwene, niribhayaana obhwengeeso, na emisango jinu muryayika, abhasoko bheemwe bhataritura okuyaajana najo, noorwo okujirema.

Ebikorwa 17:18

Niwo abhaanu abharebhe bha obhwengeeso bhanu bhaatogwaga ati Abhayepukiriyo, aamwi na Abhasitoyiko, nibhaamba okubhambasyanya na Pawuro na okurema emisango jaaye. Abhandi mu‑bheene nibhabhuusya ati, “Ni misango ki jinu omuromiromi unu kaayika?” Abhandi nibhaayika ati, “Eyibhonekana ati kaayikira inguru ya amasambwa ga echaaro echindi.” ꞉Bhaayikire kutyo kwa okubha Pawuro aabharaasisyaga inguru ya Yeesu na inguru ya okusuuruka mu‑bhafuuwe.

Ebikorwa 7:35

Tefwano ˆnaagenderera okwayika ati, “Muusa oyo, niwe abhaanu Miisiri eyo ꞉bhaaremere nibhamubhwiraga ati, ‘Niga unu akuteeye‑wo ubhe omutungi weeswe na omuramusi weeswe?’ Niwe Muusa unu Nyamuwanga ꞉aamutumire abhe omutungi weebhwe na omwerusi weebhwe, ku‑njira ya maraayika unu ꞉aamusoromokeeye mu‑chisaka echo!

Ebikorwa 7:54

Abhakuru bha Abhayawudi abho bhejire bhoongwa emisango ja Tefwano ejo, nibhabhiyirwa muno, nibhaguguna ameeno kwa risungu.

1 Bakorinto 1:20

Woori bhari aaki bhanu echaayika ati bhari na obhwengeeso? Bhari aaki bhanu echaayika ati ni bheeyigisya bha ebhiraagiro bhya Muusa, noorwo abhamenyi bha okwayika kisi mu‑siku jinu? Nyamuwanga eeresya abhwerubhweru ati obhwengeeso bhwa echaaro chinu ni bhumuumu.

1 Bakorinto 1:21

Enaayika kutyo, kwa okubha Nyamuwanga, ku‑bhwengeeso bhwaye, ꞉aaramuuye ati abhaanu bhatakutura okumusombookerwa okutura ku‑bhwengeeso bhwebhwe abheene. Tari Nyamuwanga ꞉eendere okuchungura bhanu abhamwikirisya okutura ku‑misango jinu echiraasya. Emisango ejo, abhaanu bhanu bhatakumenya Nyamuwanga, abhaayika ati ni ja echimuumu.

1 Bakorinto 2:12

Nyamuwanga ꞉ataachiyaaye obhwiganirisya bhwa ku‑chaaro kunu, tari ꞉aachiyaaye Mwoyo waaye, korereki chimenye jinu chiyaaywe ku‑bhwitiriranya bhwa Nyamuwanga.

2 Bakorinto 10:10

Enaayika kutyo, kwa okubha abhandi abhaayika ati, “Jinyarubha ja Pawuro, jiri na emisango emikomeeye, ka wone ni misango emiruru. Nawe omwanya gunu kaabha ari aamwi na eswe, kaabha atari na amanaga, ka wone emisango jaaye, ejibha jitari na obhugajuro.”

2 Bakorinto 4:7

Nawe eswe bhanu chiri na echibhiikwa echo, chiri rwa ebhiinu bhya rimoga era, korereki imenyekane abhwerubhweru ati, amanaga amaafu ga okukora emirimu ejo, agasooka ku‑Nyamuwanga, na kutari kw‑iswe.

Yakobo 2:5

Abhayiri bhaani abheendwa, muntegeresye kisi. Mutakumenya ati Nyamuwanga ꞉aawuuwe abhataka bha ku‑chaaro, bhabhe abhaniibhi mu‑riikirisya, bhanjure obhukama bhunu ꞉aaragire bhanu abhamwenda?