SHINGRAN 7:9 - Jinghpaw Hanson Version Bible

⁹ Dai hpang, yu u, masha mungdan shagu hta na mung, baw lakung shagu hta na mung, amyu baw shagu hta na mung, kadai ndang hti lu ai wunawng wuwa kaba ngai mu nngai; dai ni gaw hpraw ai hpan palawng bu hpun nna, tinang a lata hta namhtan hpun lakung lang let, dai tingnyang a man e mung, Sagu Kasha a man e mung tsap nga nna,

Jinghpaw Common Language Bible 2009

⁹ Dai hpang ngai yu dat yang, dai masha ni yawng mayawng hpe kadai mung n dang hti lu ai masha wunawng wuwa kaba langai mi hpe dai yang e ngai mu nngai. Shanhte gaw masha amyu baw shagu hta na mung, amyu shagu hta na mung, amyu mungdan shagu hta na mung, ga amyu shagu hta na mung, sa du ai ni rai nga ma ai. Dai ni gaw hpraw ai hpun palawng bu hpun nna, shanhte a lata ni hta tsanlun lakung ni hpe lang let, dai tingnyang a man e mung, Sagu Kasha a man e mung tsap nga ma ai.

SHINGRAN 7:9 ပူးပေါင်းရင်းမြစ်များ

NINGPAWT NINGHPANG 13:16

Na a kashu kasha ni hpe ga nhpu zawn ngai mayat maya shangun na mawe ai: masha langai ngai ga nhpu hpe dang hti yang gaw, na a kashu kasha ni hpe mung dang hti na mu ai.

NINGPAWT NINGHPANG 49:10

Ngwipyaw Madu du nna, Masha amyu ni shi a ga madat mara nga ai du hkra, Yuda kaw na hkawhkam sumdoi, Shi a lahpyen n daru magam dawhkrawng, kangai mat lu na n rai.

SHAKAWN KUNGDAWN 2:8

Ngai e hpyi nna, masha amyu myu na a sali wunli matu, Nang madu na arung arai, lamu ga htum hkra, ngai nang hpe jaw na de ai.

SHAKAWN KUNGDAWN 22:27

Ga ting na yawng mayawng hte gaw Yehowa hpe dum nna, shi hpang de kayin na mara ai. Masha amyu baw nlang hte gaw, na a man e nawku na mara ai.

SHAKAWN KUNGDAWN 76:4

Nang gaw lanep lu la ai bum ni a ntsa e, Shingkang hte arawng kaba lu nga ndai.

SHAKAWN KUNGDAWN 77:2

Ngai ru tsang ai nhtoi hta e, dai Madu hpe ngai tam nga nngai. Shana e pyi nye a lata hpe ngai a ladawn da nga nngai; Nye a myit masin ngwipyaw ai hpe kau da nu ai.

SHAKAWN KUNGDAWN 98:3

Shi a chyeju hte sadi sahka, Israela a nta a matu shi dum nu ai: Lamu ga makau shagu hkan e mung, Anhte a Karai Kasang a hkye hkrang la ai lam mu lu masai.

YEREMIA 16:19

Nye a n-gun atsam, nye a hpyen dap, ru tsang ai shani e nye a shingbyi shara Yehowa e, lamu ga htum ai de na masha amyu ni nang hpang de du nna, Anhte a ji wa ni gaw, masu ai hte kaman lila, lam n la ai sali wunli hkrai hkam la masai, nga nna tsun na mara ai.

YEREMIA 3:17

Dai aten e shanhte gaw Yerusalem mare hpe, Yehowa a tingnyang, ngu nna shamying na maru ai: amyu baw ni yawng, Yehowa amying hpe hpa let, Yerusalem mare de zuphpawng na mara ai; shanhte gaw htawm hpang de tinang a myit masin a je hpre ai hta hkawm na n rai.

EZEKELA 47:5

Bai dawng hkying mi shadawn yang, ngai n rap lu ai hka nu tai wa sai: hka gaw tung wa nna, lagaw hte n rap lu ai majaw, hpung-yawt rap ai hka nu tai nga ai.

Daniela 4:1

Ngai hkawhkam Nebuhkadneza gaw, ga ntsa ting hta shanu nga ai amyu baw ni hte, ga amyu myu tsun ai masha amyu ni hpe, htet shana dat nngai: Nanhte hta ngwipyaw ai gaw law htam wa u ga law.

Daniela 6:25

Dai hpang Dari hkawhkam gaw, ga ntsa ting hta e shanu nga ai amyu baw ni hte, ga amyu myu tsun ai masha yawng hte hpe laika ka nna, “Nanhte hta ngwipyaw ai gaw, law htam wa u ga law:

JAW JAU 23:40

Nnan shani e tsawm ai hpun hta na namsi si ai lakung lakying, namhtan hpun, lap wum htat ai hpun, hka numri hpun re ai ni a lakung lakying nanhte dan lang nna, nanhte a Karai Kasang Yehowa man e sanit ya tup kabu gara nga na rai myit dai.

ZEHKARIA 10:8

“Ngai shanhte hpe lahpyaw shaga nna, jahpawng na nngai; kaning rai nme law, ngai shanhte hpe hkye hkrang la ni ai: shawng e law htam ai zawn, shanhte law htam na mara ai.

ZEHKARIA 2:11

“Dai shani e, maigan amyu ni law law wa, Yehowa hte matut manoi nna, nye a amyu tai na mara ai: ngai gaw na a ka-ang e shanu nga nna, Zaw nawng zaw wa up ai Yehowa gaw, ngai hpe nang hpang de shangun dat ai, nang chye lu na ndai.

LUKA 12:1

Dai shaloi masha hkying mun wa zuphpawng nga nna, shada da kabye hkra rai nga ma yang, shi a sape ni hpe shi shawng tsun hpang mu ai gaw, “Sawt ai myit ngu ai, Hparishe ni a matsi hpe koi kau mu.

LUKA 21:36

Dai rai nna, dai byin wa na ra ai lam ni yawng hta na nanhte lawt lu nna, Masha Kasha a man e tsap lu ging ai ni tai lu myit ga, akyu hpyi let, ahkying aten shagu hta a maja nga mu,” ngu mu ai.

YAWHAN 12:13

shanhte gaw namhtan hpun lakung ni daw lang nna shi hpe sa tau la let, “Hawsanna: Dai Madu a amying hte du sa ai wa ngu ai, Israela a hkawhkam gaw, a nga u ga law,” nga nna garu ma ai.

ROMA 11:25

Dai rai nna, hpunau ni e, nanhte tinang a hpaji n machyu myit ga, ndai sung htum ai lam hpe nanhte n chye nga na, ngai n ra nngai; dai gaw, maigan amyu ni garai n shang hkum ai du hkra, Israela masha nkau mi myit shanuk kau ai hkrum ma ai, nga ai:

EHPESU 6:13

Dai re ai majaw, n hkru n hkra ai nhtoi hta nanhte ban hkum kau lu nna, lam shagu hte hpe shangut nhtawm, lahpran tsap nga lu myit ga, Karai Kasang a hpyen hking nlang hte hpe lang dagraw nga mu.

HEBRE 11:12

Dai re ai majaw, la chyasi zawn re ai wa langai hta na sha, sumsing lamu a shagan ni hte, nammukdara makau na n dang hti ai zaibru made, law htam wa ai kashu kasha ni pra wa masai.

HEBRE 12:22

Nanhte chyawm gaw, Ziun bum hte hkrung nga ai Karai Kasang a mare ngu ai sumsing lamu na Yerusalem mare de mung, hti n dang lu ai lamu kasa wunawng wuwa ni hpang de mung,

SHINGRAN 11:15

Bai, sanit ngu na lamu kasa gaw pahtau dum dat wu ai: shaloi sumsing lamu hta e nsen kaba ni pru wa ai gaw, “Mungkan ga na mungdan gaw, anhte a madu a mungdan hte shi a Hkristu a mungdan tai wa sai rai nna, shi gaw htani htana prat dingsa hkawhkam aya hta up nga na sai law,” nga nna shakawn nga ma ai.

SHINGRAN 22:3

Dagam dala ngu ai hpa mung htawm hpang n nga na ra ai; Karai Kasang hte Sagu Kasha a tingnyang gaw, dai mare kata e anga nga na ra ai rai nna, shi a shangun ma ni shi hpe daw jau na mara ai:

SHINGRAN 3:18

Dai re ai majaw, nang sut su u ga, wan mang hta jen kau sai ja jet hpe mung, na a singgu krin re ai kaya hpa masha man e n dawng lit ga, nang lawai na matu hpraw ai hpun palawng mung, na a myi mu lu lit ga, chya na matu myi tsi mung, ngai kaw na mari la lu na, ngai nang hpe hpaji daw ya de ai.

SHINGRAN 4:4

Dai tingnyang grup yin e tingnyang hkun mali naw nga nga ai; dai tingnyang ni hta hpraw ai hpun palawng bu hpun nna, baw hta ja janmau gup ai salang hkun mali grup rai dung nga ma ai.

SHINGRAN 5:11

Dai shaloi ngai yu yang, tingnyang grup yin e, lamu kasa ga daga hte, dusat amyu mali hte salang ni a nsen hpe ngai na nngai; dai ni gaw mun mi lang mun mi, hkying mi lang hkying mi law nga ma ai rai nna,

SHINGRAN 5:9

shanhte gaw, Nang sat kau hkrum ndai hte, baw lakung shagu hta na mung, ga amyu shagu hta na mung, amyu baw shagu hta na mung, masha mungdan shagu hta na mung, Karai Kasang a matu na a asai hte masha hpe mari la nit dai rai nna,

SHINGRAN 6:11

Dai ni langai hte langai hpe hpraw ai hpun palawng galu jahpun nna, shanhte zawn sat kau hkrum na mara ai, tinang ni a kanawn manang ni hte kahpu kanau ni hkum tsup wa lu ai nhtoi du hkra, chyahkring mi naw sim sa nga lu na rai myit dai, nga nna shanhte hpe tsun dan mu ai.

SHINGRAN 7:8

Zebulun amyu hta na mun mi hkying lahkawng, Yawsep amyu hta na mun mi hkying lahkawng, Ben-yamin amyu hta na mun mi hkying lahkawng, dazik shakap ai hkam la masai.