SHINGRAN 20:4 - Jinghpaw Hanson Version Bible

⁴ Bai, magam tingnyang ni ngai mu nngai: dai tingnyang ni hta dung nga ai ni gaw tara dara na ahkang lu ma ai: dai hta kaga, Yesu a lam sakse hkam ai majaw mung, Karai Kasang a mungga majaw mung htau sat kau hkrum ai ni hte, dai matse labye hpe mung, shi a hkrang sumla hpe mung n naw n ku ai hte, shi a masat dingsat hpe tinang a lahtan hte lata hta n hkam la ai ni a tsu ni hpe, ngai mu nngai: shanhte gaw hkrung nga let, shaning hkying mi tup Hkristu hte rau up nga ma ai:

Jinghpaw Common Language Bible 2009

⁴ Dai hpang, tingnyang ni hpe ngai mu nngai; dai tingnyang ni hta dung nga ai ni gaw, tara dara na ahkang aya ap ya da hkrum ai ni rai nga ma ai. Dai hta kaga, Madu Yesu shadan dan ai teng man ai lam hpe mung, Karai Kasang a mungga hpe mung hkaw tsun sakse hkam ai majaw, sat kau hkrum ai ni hte, dai matse labye hpe mung, shi a hkrang sumla hpe mung, n naw n ku ai hte, tinang a lahtan hte lata ni hta dai matse labye a masat dingsat ni hpe n hkam la ai ni a tsu ni hpe mung, ngai mu nngai. Shanhte gaw asak bai hkrung wa nna, hkawhkam ni zawn Madu Yesu hte rau shaning hkying mi tup up nga na mara ai.

SHINGRAN 20:4 ပူးပေါင်းရင်းမြစ်များ

Daniela 2:44

Ndai hkawhkam ni a aprat e, sumsing lamu na Karai Kasang gaw, prat dingsa e n hten n mat ai mungdan de da nna, de a ahkang aya gaw maigan amyu a lata hta galoi mung shang lu na, n rai: dai gaw ya tsun ai mungdan ni yawng hpe, agrawp shamyit kau nna, dai nan htani htana agrin nga na ra ai.

Daniela 7:18

Rai timung, Tsaw Htum ai Wa a chyoi pra ai ni gaw, dai prat dingsa e madu nga lu na mara ai,’ nga nna ngai hpe lachyum shapraw dan nngai.

Daniela 7:22

shanhte gaw dai mungdan hpe madu lu ai aten du hkra, dai nrung kaji gaw, chyoi pra ai ni hpe hpyen gasat nna dang kau nga ai, ngai mu nngai.”

Daniela 7:27

Mungdan hte up ai ahkang aya, sumsing lamu ting npu na mungdan ni a daru magam hpe, Tsaw Htum ai Wa a chyoi pra ai masha ni lu la na mara ai: shi a mungdan gaw htani htana mungdan rai nga nna, up ai ahkang aya lu ai ni yawng, shi hpe daw jau let, madat mara na mara ai, nga nna ngai hpe ga lachyum shapraw dan ai.

Daniela 7:9

Shaloi tingnyang ni hpe shadun da nna, moi chyaloi nhkoi na wa langai mi dung nga ai du hkra, ngai mu mada nngai; shi a hpun palawng hkyen zawn hpraw nna, shi a kara seng ai sagu mun hte bung nga ai; shi a tingnyang wan shinglet, de a dingsen ni grung ai wan rai nga ai.

MALAHKI 4:5

Yu mu, galu kaba ai hte, hkrithpa re ai, Yehowa a nhtoi garai n du yang, ngai nanhte hpang de myihtoi Elia hpe shangun dat na nngai.

MAHTE 19:28

Yesu gaw, “Nanhte hpe ngai teng teng tsun made ga, dai Masha Kasha gaw shi a arawng sadang a tingnyang hta e dung nga yang, bai shangai wa ai aten hta e ngai kaw hkan nang nga ai ni, nanhte mung, tingnyang shi lahkawng hta dung lawm na marin dai rai nna, Israela a amyu shi lahkawng hpe tara dara lu na maru ai.

MAHTE 24:10

Dai shaloi e, masha law law myit kataw wa nna, shada da ap kau ai hte, shada da n dawng n wawm na mara ai.

MARKU 6:16

Herod mahtang, dai na wu yang, “Ngai baw htau kau se ai Yawhan gaw bai hkrung rawt wa sai,” nga ai.

MARKU 6:27

Shaloi jang, hkawhkam gaw, mang galang langai mi hpe shangun dat nna, Yawhan a baw hpe sa la na, hkang dat wu ai.

MARKU 9:11

Shaloi shanhte gaw, “Elia shawng du sa na ra ai, nga nna laika ka ai sara ni hpa majaw tsun nga ma ta?” ngu nna shi hpe san mu ai.

LUKA 1:17

Kawa ni a myit masin hpe kasha ni hpang de, je hpre ai ni hpe dinghpring ai ni a hpaji ningli lam de kayin wa shangun na hte, dai Madu a matu mazing da ai amyu hpe lajang shachyip da na, Elia a wenyi hte atsam rawng let, shi a shawng numshawn e sa wa na ra ai,” ngu nna shi hpe tsun wu ai.

LUKA 14:14

shing rai jang gaw, nang a lu na ndai: shanhte nang hpe chyeju htang lu na ma ai n rai: dai re ai majaw, tengman ai ni a bai hkrung rawt wa ai hta, de a akyu chyeju nang hkam la na rin dai,” ngu wu ai.

LUKA 22:30

nye a mungdan e, nye a sha ku hta, nanhte lu sha lu na marin dai: nanhte mung tingnyang hta dung nna, Israela amyu shi lahkawng hte hpe tara dara lu na marin dai.

YAWHAN 14:19

Loi hkring mi rai jang, mungkan ga gaw ngai hpe n mu dat na nu ai: nanhte chyawm gaw naw mu lu na marin dai: kaning rai nme law ngai ahkrung nga nngai majaw, nanhte mung ahkrung nga na marin dai.

ROMA 11:15

Kaning rai nme law, shanhte hpe kau da ai lam, mungdan ga a htinglu htinglai ya ai lam tai wa a yang gaw, shanhte hpe bai hkap la ai lam gaw, si mat ai kaw na hkrung wa ai hte bung nga na n rai ni?

ROMA 8:17

Kashu kasha rai nga ga yang gaw, sali wunli hkam la ai ni mung anhte rai nga ga ai; Hkristu hte rau hpung shingkang hkam la lu hkra, shi hte rau nni nkri hkrum nga ga yang gaw, Karai Kasang a sali wunli hkam la ai ni hte, Hkristu hte rum ai sali wunli hkam la ai ni, anhte rai nga ga ai.

2 TIMOHTI 2:12

anhte shakut sharang ga yang gaw, shi hte rau mung up lu na ra ga ai: shi hpe ndang kau yang gaw, shi mung anhte hpe ndang kau na mi ai:

SHINGRAN 1:2

Yawhan mung, Karai Kasang a mungga hte, Yesu Hkristu hte seng ai sakse a lam mu mamu hte hpe sakse hkam ya wu ai.

SHINGRAN 1:9

Yesu a nni nkri hta mung, mungdan hta mung, hkam sharang ai hta mung nanhte a kanawn manang rai nga ai, nanhte a hpunau wa, ngai Yawhan gaw, Karai Kasang a mungga hte Yesu a sakse majaw, Patmu ngu ai zunlawng hta nga nga nngai.

SHINGRAN 11:11

Ya dai nhtoi masum ya e chyingdaw mi lai jang, Karai Kasang kaw nna jahkrung ai nsoi nsa shan hta shang wa nna, shan gaw jan rai rawt tsap nga ma ai; shan hpe mu mada ai ni gaw, nachying hkrit gari nga ma ai.

SHINGRAN 11:15

Bai, sanit ngu na lamu kasa gaw pahtau dum dat wu ai: shaloi sumsing lamu hta e nsen kaba ni pru wa ai gaw, “Mungkan ga na mungdan gaw, anhte a madu a mungdan hte shi a Hkristu a mungdan tai wa sai rai nna, shi gaw htani htana prat dingsa hkawhkam aya hta up nga na sai law,” nga nna shakawn nga ma ai.

SHINGRAN 11:3

Bai, nye a sakse yan lahkawng hpe ngai ahkang jaw na mawe ai rai nna, shan gaw lachyit nba bu hpun let, nhtoi hkying mi ni tsa e kru shi ya tup, myihtoi htoi na mara ai.”

SHINGRAN 11:7

Shan lahkawng tinang a sakse ga hkam ngut jang, sung htum ai shara de na lung wa ai matse labye gaw, shan hpe gasat nna dang kau na hte, shan hpe sat kau na ra ai.

SHINGRAN 12:11

Shanhte gaw, Sagu Kasha a asai majaw mung, tinang sakse hkam ai mungga a majaw mung, shi hpe dang kau lu mu ai rai nna, si ai du hkra tinang a asak hpe n lahpawt ma ai.

SHINGRAN 14:11

shanhte hpe nni nkri zingri ai hta na wan hkut gaw, htani htana prat dingsa amawng lung nga ai; dai matse labye hte shi a hkrang sumla hpe nawku ai ni hte, shi a amying a masat dingsat hkam la ai wa gaw, shani shana n ban n sa lu ma ai,” nga nna nsen kaba hte tsun nga ai.

SHINGRAN 15:2

Bai, wan hte kayau ai pat nawng zawn re ai, ngai mu nngai: dai matse labye hte shi a hkrang sumla kaw na mung, shi amying a nambat kaw na mung, dang pru wa ai ni gaw, Karai Kasang a tingse lang let, dai pat nawng makau e tsap nga ma ai.

SHINGRAN 17:8

Nang mu ai matse labye gaw, shawng de nga yu sai, ya gaw n nga ai, rai timung sung htum ai shara kaw na lung wa magang ra ai rai nna, hten byak ai de sa wa na ra ai. Ginding aga nnan lat kaw nna tinang a amying asak laika hta n ka lawm ai, ga ntsa e nga ai masha ni gaw, dai matse labye a nga yu sai hte ya n nga ai, bai nga na ra ai lam ni hpe mu lu ai shaloi, mau mahka na mara ai.

SHINGRAN 2:26

Dang lu ai wa hte, prat htum hkra nye a arawn alai hkan nang ai wa hpe, masha mungdan ni a ntsa e up ai ahkang ngai jaw na we ai:

SHINGRAN 20:6

Shawng na ngu ai bai hkrung rawt wa ai lam hta shang lawm lu ai wa gaw, a lu ai wa, chyoi pra ai wa, rai nga ai: lahkawng lang na si ai lam gaw, shanhte a ntsa e ahkang n lu nga ai: shanhte gaw Karai Kasang a hkinjawng ni, Hkristu a hkinjawng ni, rai na mara ai rai nna, dai shaning hkying mi tup Hkristu hte rau up nga lu na mara ai.

SHINGRAN 22:5

Htawm hpang e shana mung n nga na ra ai; pyengdin a ahtoi mung, jan a nhtoi mung shanhte n ra ma ai: kaning rai nme law, dai Madu Karai Kasang gaw shanhte hpe ahtoi jaw na wu ai; dai hta n-ga, shanhte gaw htani htana prat dingsa up nga lu na mara ai.

SHINGRAN 3:21

Ngai dang lu nna, nye Wa a tingnyang e shi hte rau dung nga lu ai zawn, dang lu ai wa gaw, nye a tingnyang e ngai hte rau dung nga lu na ahkang, ngai jaw na we ai.

SHINGRAN 4:4

Dai tingnyang grup yin e tingnyang hkun mali naw nga nga ai; dai tingnyang ni hta hpraw ai hpun palawng bu hpun nna, baw hta ja janmau gup ai salang hkun mali grup rai dung nga ma ai.

SHINGRAN 6:9

Bai, manga ngu na dazik hpe hpaw dat wu yang, Karai Kasang a mungga a majaw mung, tinang hkan nang ai sakse lam a majaw mung, sat kau hkrum ai ni a tsu ni hpe, dai tawn hkungri npu e, ngai mu nngai.

SHINGRAN 7:3

nga nna lamu ga hte nammukdara hpe zingri na ahkang lu ai lamu kasa mali hpe, nsen kaba hte jahtau wu ai.