SHINGRAN 19:12 - Jinghpaw Hanson Version Bible

¹² shi a myi gaw wan shinglet rai nga ai; shi a baw hta ja lagup law law gup nga ai; shi hta kaga kadai n chye ya lu ai amying ka kap nga lu ai.

Jinghpaw Common Language Bible 2009

¹² Shi a myi ni gaw wan shinglet zawn tu nga ai. Shi a baw hta janmau law law gup da nga ai. Shi hta lai nna kadai mung n chye ya lu ai mying shi a ntsa e ka kap da nga ai.

SHINGRAN 19:12 ပူးပေါင်းရင်းမြစ်များ

NINGPAWT NINGHPANG 32:29

Shaloi dai wa gaw, Na a amying htawm hpang de Yaku ngu lu na n rai: Israela ngu na rai lit dai: kaning rai nme law, nang gaw Karai Kasang hte mung, masha hte mung gasat hkat nna dang kau nit dai ngu wu ai.

SHAKAWN KUNGDAWN 8:5

Nang shi hpe Karai Kasang hte loi mi sha shagrit da nna, Arawng sadang hte hpung shingkang shi hpe ka-up ya nu ai.

PRU MAT 23:21

Shi a man e sadi nga mu, shi a ga madat mu; shi hpe hkum gumlau et; nanhte shut ai mara shi raw dat dau na n rai; kaning rai nme law, nye a amying shi hta nang nga ai.

GA SHAGAWP 30:4

Lamu de lung wa nna, bai yu wa ai gaw, kadai? Tinang a lata hte nbung hpe latup da lu ai gaw, kadai? Tinang a palawng hte hka hpung ni hpe majaw da lu ai gaw, kadai? Lamu ga njut nnaw ni hpe tawn da ai gaw, kadai? Shi a amying hpa rai ta? Kasha a amying mung hpa rai ta? Nang chye n yang gaw tsun u.

Shawlumon A Mahkawn Ga 3:11

Ziun shayi chyinghkawn ni e, pru marit: Hkungran nna, myit masin kabu gara ai nhtoi hta, Kanu shagup ya ai, janmau gup nga ai, Hkawhkam Shawlumon hpe mada yu mu law.

ESAIA 62:3

Nang gaw Yehowa a lata hta, tsawm htap ai shanghkawng, na a Karai Kasang a lata hta, hkawhkam janmau, tai na rin dai.

ESAIA 9:6

Shi a ahkang aya hte, shi tawn da ai ngwipyaw lam gaw law htam wa nna, htum ngu ai n nga na sai; Dawi a tingnyang ntsa e dung let, dai mungdan hpe shi shagrin tawn da nna, tara hte dinghpring ai hku hkan ai majaw, dai gaw htani htana prat dingsa e grin nga na ra ai. Zaw nawng zaw wa up ai Yehowa a nsu nnawn myit dai lam shabyin nu ai.

Daniela 10:6

shi a hkum gaw mek-yoi, shi a myi man gaw myihprap, shi a myi gaw wan shanan, shi a lagaw lata kabrim ai magri zawn rai nga nna, shi shaga ai nsen gaw, wunawng wuwa a nsen hte bung nga ai.

ZEHKARIA 9:16

Shanhte a Karai Kasang Yehowa gaw, dai shani hta, shi a amyu hpe sagu hpung zawn, hkye hkrang la na ra ai: shanhte gaw shi a mungdan ntsa e, janmau lungseng zawn gala na mara ai.

MAHTE 11:27

Nye Wa gaw arai yawng mayawng ngai hpe ap ya ni ai; Wa hta kaga, dai kasha hpe kadai mung n chye lu ai: dai Kasha hte, dai Kasha jahtoi ya mayu ai masha hta kaga, Wa hpe mung, kadai n chye lu ai.

MAHTE 21:5

Shi gaw, “Ziun shayi sha hpe ning ngu mu: ‘Yu u, na a Hkawhkam wa gaw, Sumnung ai myit rawng nna, lawze a ntsa e, Rai sa, lawze kanu a kasha ntsa e jawn let, nang kaw du ra ai,” nga ai.

MAHTE 28:18

Shing rai Yesu shanhte hpang de sit sa wa nna, Sumsing lamu hta e mung, ginding aga hta e mung, up hkang na ahkang nlang hte, ngai hpe ap ya ni ai.

LUKA 10:22

Nye wa gaw arai yawng mayawng ngai hpe ap ya ni ai: Kasha kadai re ai gaw, Wa hta kaga kadai mung n chye ai; Wa kadai re ai mung, Kasha wa hte dai Kasha e jahtoi ya mayu ai wa hta kaga, kadai mung n chye nga ai.

YAWHAN 17:11

Ya kaw nna ngai gaw mungkan ga e n nga nngai, ndai ni chyawm gaw, mungkan ga e nga nga na rai ma ai: ngai gaw nang hpang de wa na rai nga nngai. Chyoi pra ai Wa e, an gaw langai sha rai nga ga ai zawn, ndai ni mung rai nga mu ga, nang ngai e jaw ai ni hpe, na a mying ningsang hta shagrin shangang da u.

YAWHAN 17:12

Ngai shanhte hte rau nga nga ai hte yang, nang ngai e jaw ai ni hpe, na a amying ningsang hta ngai shagrin shangang da nna, shanhte hpe makawp maga mase ai: shanhte hta na hten bya ai a kasha hta kaga gaw, langai mi muk n hten n bya ma ai; dai wa a hten bya ai chyawm gaw, Chyum laika hta rawng ai ga dik wa na matu rai nga ai.

EHPESU 1:21

du magam, hkang ai ahkang, hpung shingkang hte up ai aya lu ai ni nlang hte a ntsa e mung, ndai aprat hte htawm hpang na aprat e mying lu ai shingteng amying nlang hte a ntsa e mung, shi hpe shatsaw nna, sumsing lamu lahta tang hta, shi a hkra maga e dung nga shagun da wu ai.

HEBRE 2:9

Lamu kasa ni hta loi mi sha shagrit kau hkrum ai Yesu chyawm gaw, si hkrung si htan a nni nkri hkam la wu ai majaw, hpung shingkang hte arawng sadang ka-up nga ai hpe, anhte mu lu ga ai; shing rai shi gaw, Karai Kasang a chyeju majaw, masha yawng mayawng a matu, si hkam ai hkrum nga ai.

SHINGRAN 1:14

Shi a baw hte kara gaw, hpraw ai sagu mun hte hkyen zawn hpraw nga ai; shi a myi gaw wan shinglet zawn tu nga ai;

SHINGRAN 12:3

Bai, mauhpa amu kaga sumsing lamu kata e dan pru ai gaw: yu u, hkyeng ai baren numraw kaba dan pru ai; shi gaw baw sanit hte nrung shi tu nna, shi a baw ni hta ja lagup sanit gup nga ai.

SHINGRAN 13:1

Shaloi nammukdara hta na dawng pru ai matse labye langai mi ngai mu nngai; dai gaw nrung shi hte baw sanit tu nga ai; de a nrung ni hta ja lagup shi gup nna, shi a baw ni hta arawng jahpoi ai amying kap nga ai.

SHINGRAN 19:16

Shi a hpun palawng hte magyi hta, Hkawhkam ni a Hkawhkam, Madu ni a Madu, nga ai amying ka kap nga ai.

SHINGRAN 3:12

Dang lu ai wa hpe, nye a Karai Kasang a nawku Htingnu hta daw nu ngai shatai na we ai: shi galoi mung dai kaw na hpang de pru na n rai; nye a Karai Kasang a mying nsang hpe mung, nye a Karai Kasang Kaw na pru nna, sumsing lamu na yu hkrat wa ai Yerusalem mare ningnan ngu ai, nye a Karai Kasang a mare amying hpe mung, ngai hkum nan a amying hpe mung, dai wa a ntsa e ngai ka shakap ya na we ai.

SHINGRAN 6:2

Shaloi yu u, gumra ahpraw langai mi ngai mu nngai, dai hta jawn ai wa gaw ndan lang nga ai; ja janmau mung shi hpe shagup ya wu ai rai nna, dang kau let dang kau na matu nlaw pru sa wa ai.

TARA AGYI 13:18

Shaloi Yehowa a kasa gaw, Nye a mauhpa amying hpa rai san n ta? ngu wu ai.