SHINGRAN 18:2 - Jinghpaw Hanson Version Bible

² Dai wa gaw, “Galu kaba ai Babelon gaw kadawng daw mat sai, kadawng daw mat sai; dai shara gaw, nat tsasam ni a de nga ai shara, n san n seng ai wenyi shagu a shingwung shara hte n san n seng ai matsat shabat re ai u amyu myu a shingbyi shara, tai mat sai.

Jinghpaw Common Language Bible 2009

² Dai wa gaw nsen kaba hte, “Galu Kaba ai Babelon mare kadawng mat sai! Kadawng mat sai! Dai shara kaw ya nat tsasam ni de nga ai shara, n san n seng ai wenyi shagu a shingwung shara hte n san n seng matsat shabat re ai u amyu myu a shingbyi shara tai mat sai.

SHINGRAN 18:2 ပူးပေါင်းရင်းမြစ်များ

ESAIA 14:23

Bai ngai gaw dai mare hpe dumsi ni a nga shara hte, hka ing ai shara shatai na we ai. Ngai gaw hten byak ai ding-ye hte dai mare hpe ye kau na we ai,” nga nna Zaw nawng zaw wa up ai Yehowa tsun ai.

YEREMIA 25:30

Dai re ai majaw nang myihtoi htoi let, Yehowa gaw matsaw de na shabam nna, shi a chyoi pra ai shara na nsen sharawt na ra ai; shi gaw shi a udat shara hpe sha-ang nna, aja awa shabam na ra ai; ga ntsa e nga ai ni mahkra a lam, tsabyi si kabye ai ni zawn, jahtau na ra ai.

YEREMIA 51:37

Babelon mare gaw marawng marang hte, nam gwi ni a shanu ai shara, mauhpa shara hte, masha kata ai, shingran katsi ai shara, tai na ra ai.

YEREMIA 51:8

Babelon mare gaw akajawng sha kadawng nna, hten mat sai; shi a matu sharung shayawt mu; shi a hkala nba mai wa lu yang, shamai na matu, balsam naw sa la mu.

YOELA 3:16

Yehowa gaw Ziun bum kaw na shabam nna, Yerusalem mare kaw nna, nsen sharawt na ra ai; sumsing lamu hte ginding aga ashun awam na ra ai: rai timung Yehowa gaw, shi amyu a shingbyi shingwung shara, Israela kashu kasha ni a ngang ai hpyen dap, tai na ra ai.

ZEHPANI 2:14

Yamnga hpung ni hte, matse labye amyu myu ni, de a ka-ang e hpum na mara ai: wunpu u hte dumsi ni, de a shadaw ni a lapran e shanu nga nna, hkuwawt hku e de a nsen ngoi na ra ai: chyinghka hkinbawng ni shingran katsi mat nna, shi gaw arit hpunpyen maka ni hpe shadawng kau nu ai.

SHINGRAN 1:15

shi a lagaw yan gaw, wan htung hta jen kau sai magri jet zawn san nga ai; shi a nsen gaw, hka law law kadu ai nsen zawn wu nga ai.

SHINGRAN 10:3

hkanghkyi shabam ai zawn, nsen kaba hte jahtau dat wu ai; shi jahtau dat wu yang, dai mu ngoi ai mahku sanit tinang a nsen shapraw ma ai.

SHINGRAN 11:8

Ga malai hku Sodom hte Egutu ngu shamying ai, wudang hta shan a Madu jen da hkrum ai mare kaba a nmaw lam hta, shan a moi mang taw nga ai.

SHINGRAN 14:15

Bai, lamu kasa kaga gaw dai nawku Htingnu kaw na pru nna, Ga ntsa e mam myin krawp wa sai; mam dan na aten du ra ai majaw mam dan na matu na a nhkyau hpe dan shangun dat u, nga nna sumwi ntsa e dung ai wa hpe nsen kaba hte jahtau wu ai;

SHINGRAN 14:8

Bai, lahkawng ngu na lamu kasa kaga gaw hkan sa nna, “Masha amyu shagu hpe hpye ai amu ngu ai pawt shabu ai tsabyi jahku lu shangun ai, galu kaba ai Babelon mare gaw, kadawng daw mat sai, kadawng daw mat sai,” nga nna tsun ai.

SHINGRAN 16:13

Shaloi, baren numraw a n-gup hta na mung, matse labye a n-gup hta na mung, masu ai myihtoi a n-gup hta na mung, shu zawn n san n seng ai wenyi masum pru wa ai hpe, ngai mu nngai:

SHINGRAN 16:19

Dai rai nna, dai galu kaba ai mare gaw masum brang ga mat wa ai; masha amyu ni a mare ni mung kadawng daw mat shajang ma ai; Babelon mare kaba hpe mung Karai Kasang a sindawng kahtet ai pawt bu ngu ai tsabyi jahku a gawm lu shangun na, shi a man e dai mare hpe matsing da nga ai.

SHINGRAN 17:18

Nang mu lu ai numsha mung, mungkan hkawhkam ni hpe madu lu ai mare kaba rai nga ai, nga nna ngai hpe tsun ai.

SHINGRAN 17:5

shi a lahtan e, Ga ntsa na shawa num ni hte matsat shabat lam ni a Kanu, galu kaba ai Babelon, nga nna sung htum ai hte seng ai amying ka da nga ai.

SHINGRAN 18:10

“Galu kaba ai mare, atsam rawng ai mare, Babelon e, dingnye lu n hka, dingnye lu n hka! ahkying mi hta sha nang hpe dawdan ai lam du sahka gaw!” nga nna shi a majaw hkrap ngu hkrap ngoi ai hte sharung shayawt let tsun na mara ai.

SHINGRAN 18:21

Dai hpang n-gun ja ai lamu kasa langai mi htumrin lung kaba nsan ai nlung kawaw la nna, nammukdara kata de kabai bang kau dat let, “Ndai hkrat shang wa ai zawn, galu kaba ai Babelon mare mung kabai bang kau ai hkrum na ra ai! htawm hpang galoi mung shi hpe bai mu lu na n rai.

SHINGRAN 5:2

Shaloi n-gun ja ai lamu kasa gaw, Dai laika hpaw na hte de a dazik hpe gaw kau na, kadai ging dan nga a ta? nga nna nsen kaba hte jahtau tsun ai, ngai mu nngai.