SHAKAWN KUNGDAWN 100:3 - Jinghpaw Hanson Version Bible

³ Yehowa gaw Karai Kasang rai nga ai, chye mu: Shi anhte hpe hpan da mi ai rai nna, Anhte shi a masha ni rai nga ga ai; Shi a amyu hte shi a udat na sagu hpung, anhte rai nga ga ai.

Jinghpaw Common Language Bible 2009

³ Dai Madu gaw Karai Kasang rai nga ai hpe yin la mu. Shi anhte hpe hpan da mi ai rai nna, anhte mung shi hte seng ai ni rai nga ga ai; anhte gaw shi a amyu masha ni rai nna, shi a sagu hpung ni rai nga ga ai.

SHAKAWN KUNGDAWN 100:3 ပူးပေါင်းရင်းမြစ်များ

2 HKAWHKAM 19:19

Ya chyawm gaw, anhte a Karai Kasang Yehowa e, nang Yehowa hkrai Karai Kasang rai nga ai gaw, ga ntsa mungdan ni nlang chye na lu mu ga, anhte hpe shi a lata na hkye hkrang la mi law,” ngu nna hpyi nem wu ai.

1 HKAWHKAM LABAU 16:14

Shi Yehowa gaw anhte a Karai Kasang rai nga ai: Ga ting hta e shi a tara dara ai ga, pru nga ai.

YOBA 10:3

nang ngai hpe zingri ai gaw, na matu htuk nga a ni? Nang nan hpan da ai rai hpe, nang matsat kau nna, tara n lang ai ni a bawng ai lam hta awlaw na, htuk nga a ni?

SHAKAWN KUNGDAWN 119:73

Na a lata ngai hpe hpan da nna hkrang shabyin nu ai; Nang htet da ai ga hpe, ngai sharin la lu hkra, Ngai hpe chye chyang ai myit jaw ya e.

SHAKAWN KUNGDAWN 12:4

Nga nna, bawk ai nten nlang hte hte, Ga kaba tsun ai shinglet hpe, gadoi kau u.

SHAKAWN KUNGDAWN 149:2

Israela gaw shi a Hpan Wa Ningsang hta kabu nga nna, Ziun a kashu kasha ni shanhte a Hkawhkam hta, sharawng awng nga mu ga.

SHAKAWN KUNGDAWN 46:10

Amu sha nga mu, ngai Karai Kasang rai nga nngai, chye mu. Amyu baw ni hta ngai galu kaba wa nna, Ga ntsa e dan hkung nga na nngai.

SHAKAWN KUNGDAWN 78:52

Shi a amyu hpe chyawm gaw, sagu hpung zawn shi woi wa nna, Sagu hpung kaba hpe zawn, nam mali e, lakawn wa mu ai;

SHAKAWN KUNGDAWN 79:13

Anhte chyawm gaw, na a amyu hte Nang rem nga ai sagu ni, Nang hpe tutnawng e, chyeju dum na ga ai: Prat mi hte prat mi, na a shakawn ga, anhte gawn dan na ga ai.

SHAKAWN KUNGDAWN 95:3

Kaning rai nme law, Yehowa gaw Karai Wa kaba hte, Hpara ni mahkra a ntsa e, Hkawhkam kaba, rai nga ai.

PRU MAT 6:7

nye a amyu shatai na matu ngai nanhte hpe shinggyin la nna ngai mung nanhte a Karai Kasang tai na nngai: ngai nanhte hpe Egutu masha ni a mayam lit hta na raw la ai nanhte a Karai Kasang Yehowa rai nga nngai gaw, shaloi nanhte chye na marin dai.

HPAJI NINGLI 12:1

Na a brang ram prat e, na a Hpan Wa Ningsang hpe mung adum nga u: “Dai nhtoi ni hpe ngai n ra ni ai,” nga nna myit ru myit ra ai nhtoi ni garai n du ai hte, shaning ni garai n ni wa yang;

ESAIA 63:11

Shaloi Yehowa gaw moi na nhtoi ni hpe mung, Mawshe hte shi a amyu masha ni hpe mung dum nna, Tinang a masha ni hpe sagu rem ni hte hpawn, nammukdara na woi shapraw ai wa gaw, kanang rai nga a ta? shanhte a ka-ang e shi a Chyoi pra ai Wenyi bang da ai wa gaw, kanang rai nga a ta?

ESAIA 63:19

Anhte gaw, nang n up yu ai ni zawn mung, na a amying hpe n hkam la yu ai ni zawn mung, tai wa saga ai.

ESAIA 64:7

Nang gaw na a myi man hpe makoi kau nna, anhte a shut hpyit ai hte anhte hpe shamyit kau mani ai majaw, na a amying nsang hpe shaga ai wa mung, nang hta manoi manat na nga, tinang hkum hpe shadut ai wa mung, n nga ai.

YEREMIA 10:10

Yehowa chyawm gaw tengman ai Karai Kasang rai nga ai; shi gaw ahkrung nga ai Karai Kasang hte, htani htana hkawhkam rai nga ai; shi pawt sindawng yang, lamu ga gari kawa nga ai; shi myit kahtet ai hpe, amyu baw ni n hkam lu ma ai.

EZEKELA 34:11

“Kaning rai nme law, ‘Madu Yehowa ning nga ai: Yu u, Ngai hkum nan, nye a sagu ni hpe sawk yu nna, hkan tam na nngai.

YAWHAN 17:3

Htani htana asak ngu ai chyawm gaw, langai sha rai nga ai hte tengman re ai nang Karai Kasang hpe mung, nang shangun dat ai wa Yesu Hkristu hpe mung, shanhte chye chyang lu ai hpe, ngu ai, rai nga ai.

2 KORINHTU 4:6

Nsin hta na nhtoi htoi na ra ai, nga nna tsun ai Karai Kasang gaw, Hkristu a myi man kaw na Karai kasang a hpung shingkang a chye chyang ai nhtoi hpe shapraw ya lu u ga she, anhte a kraw lawang e jahtoi ya ma ni ai.

EHPESU 2:10

Kaning rai nme law, anhte shi a magam bungli rai nga ga ai; mai kaja ai bungli shachyen na, Hkristu Yesu hta e hpan da ai ni gaw, anhte rai nga ga ai: dai mai kaja ai bungli hta anhte hkawm nga u ga, Karai Kasang gaw dai ni hpe shawng nnan e lajang tawn da mu ai.

TARA JAHPRANG 32:15

Yeshurun chyawm ga hpum sau nna lahkat wu ai: Hpum sau ai hte shing-yan bawng nna di di tawng tawng nang rai nga ndai; Dai rai ti, hpan wa Karai hpe shi kau da nna, Shi e hkrang la ai Lunghkrung hpe n sawn wu ai.

TARA JAHPRANG 32:6

Angawk ai hte myit n su ai amyu e, Yehowa hpe dai hku htang na mu ni? Shi nang hpe hkrang la ai kawa n rai lit ni? Shi nang hpe hpan da nna shagrin da nit dai.

TARA JAHPRANG 4:35

Yehowa chyu sha Karai Kasang rai nga ai hte shi hta kaga Karai Kasang shaje n nga ai gaw nanhte chye lu myit ga she, nanhte hpe dai hte madun ai rai nga ai.

TARA JAHPRANG 4:39

Dai rai nna, Yehowa gaw sumsing lamu lahta tang hte ginding dinghta ga ntsa e Karai Kasang rai nga ai mung, Karai shaje mi n nga sai mung, dai ni dum hprang nna kraw lawang kata e matsing gun nga mu law.

TARA JAHPRANG 7:9

Dai rai nna, na a Karai Kasang Yehowa gaw Karai Kasang rai nga ai chye nga u: shi gaw kangka re ai Karai Wa, shi hpe tsawra ai hte shi a hkang da ai ga hkan nang ai ni hpe prat hkying mun du hkra ga shaka shagrin nga nna matsan dum ai myit madun ai Karai Wa;

1 PETRU 2:25

Kaning rai nme law, nanhte nlang sagu zawn lam dam mat myit timung, ya gaw, dai Sagu rem wa hte nanhte a myit masin a Hpung up wa hpang de, nhtang wa manit dai.

1 PETRU 2:9

Nanhte chyawm gaw, nsin kata de nna shi a mauhpa nhtoi de nanhte hpe shaga bang ai wa a dan hkung ai magam hpe shabrawng dat ya myit ga, lata la ai amyu, hkawhkam hkinjawng ni, chyoi pra ai amyu baw hte, Karai Kasang lahku la ang ai masha ni, rai nga myit dai.

1 PETRU 4:19

Dai rai nna, Karai Kasang a myit da ai hku hte maren nni nkri hkrum ai ni gaw, kaja ai amu bungli galaw nga let, sadi sahka nga ai Hpan wa Ningsang a lata e, tinang a myit masin hpe ap bang ya mu ga.

1 YAWHAN 5:20

Dai hta kaga, Karai Kasang a Kasha du wa sai rai nna, dai tengman ai wa hpe chye chyang lu na myit, shi anhte hpe jaw da mi ai gaw, anhte chye nga ga ai: dai tengman ai wa hta e, ngu ai, shi a Kasha Yesu Hkristu hta e, anhte anga nga ga ai. Dai wa gaw, tengman ai Karai Kasang hte, n htum n wai asak mung, rai nga ai.