MARKU 5:22 - Jinghpaw Hanson Version Bible

²² Shaloi, tara jawng agyi ni hta na, Ya-iru mying ai masha langai mi sa du nna shi hpe mu hkrup yang, shi a lagaw nhpang e dingnyawm nna,

Jinghpaw Common Language Bible 2009

²² Dai nawng makau e shi naw nga nga yang, Yairu mying ai tara jawng agyi langai mi sa du nna Yesu hpe mu hkrup jang, shi a lagaw nhpang e dingnyawm nna,

MARKU 5:22 ပူးပေါင်းရင်းမြစ်များ

MAHTE 2:11

Dai nta hta e shang bang wa ma yang, dai ma kaji hte shi a kanu Mari hpe, shanhte mu mu ai rai nna, lahput hput di let shi hpe nawku mu ai: tinang a sut sumpu hpaw nhtawm, shi hpe aja, lawban hte mura ngu ai kumhpa hpe sak mu ai.

MARKU 5:33

Dai numsha chyawm gaw, shi hta byin ai amu hpe chye chyang ai majaw, hkrit gari let sit sa nna, shi a man e dingnyawm nhtawm, shi a lam yawng mayawng hte hpe teng ai hku sha tsun dan wu ai.

MARKU 5:38

Ya, dai tara agyi a nta de du ma yang, kaming kamawng re ai, hkrap ngu hkrap ngoi ai hte sharung shayawt kaba hpe shi mada mu wu ai:

LUKA 13:14

Shing rai Yesu gaw laban nhtoi e shamai ya ai majaw, tara jawng agyi wa gaw masin kahtet nna shawa masha ni hpe, “Amu bungli galaw mai ai nhtoi kru ya nga ai; dai nhtoi ni hta shamai la na sa mu: laban nhtoi hta gaw hkum sa myit,” ngu nna tsun mu ai.

LUKA 5:8

Simun Petru gaw dai mu jang, Yesu a lahput nhpang e dingnyawm nna, “Madu e, ngai kaw na wa mat u; ngai gaw yubak kap ai masha rai nga nngai,” ngu wu ai.

LUKA 8:28

Dai wa gaw Yesu hpe mu jang, jahtau nna shi a man e dingnyawm dagup let, Tsaw htum ai Karai Kasang a Kasha Yesu e, ngai nang hte hpa daw nga ga ta? nang ngai hpe n zingri n ga, ngai nang hpe hpyi nga nngai, ngu nna nsen kaba hte tsun wu ai.

KASA 13:15

Shaloi tara laika hte myihtoi laika hti ngut jang, jawng agyi ni gaw shanhte hpang de masha shangun nna, “Hpunau ni e, shawa hpawng hpe shadum jahprang na ga lu myit yang gaw, shadum jahprang mu,” ngu mu ai.

KASA 18:17

Shaloi shanhte nlang tara jawng agyi wa Sosteni hpe rim la nna, tara tingnyang man e anu kau mu ai: Galio chyawm gaw, dai lam hpe hpa mung n nawn wu ai.

KASA 18:8

Krispu mying ai tara jawng agyi wa mung, shi a nta masha nlang hte hte hpawn, Madu hpe kamsham ma ai: Korinhtu masha ni law law mung, na la nna kamsham ai hte baptisma hkam la ma ai.

SHINGRAN 22:8

Ngai, Yawhan gaw, ndai lam ni hpe na lu ai hte mu lu ai wa, rai nga nngai. Ndai hte hpe na lu ai hte mu lu ngut jang, ndai lam ni ngai hpe madun dan ai lamu Kasa a lagaw nhpang e nawku na, ngai dingyawm dagup nngai.