MAHTE 12:34 - Jinghpaw Hanson Version Bible

³⁴ Pu htum amyu ni e, nanhte n hkru nga myit dai mi, kaja ai ga kaning rai tsun lu na myit ta? kaning rai nme law, kraw hta hpring chyat nga ai kaw na, n-gup de tsun nga ai.

Jinghpaw Common Language Bible 2009

³⁴ Pu htum amyu ni e, nanhte n hkru nga myit dai mi, kaja ai ga kaning rai tsun lu na myit ta? Hpa majaw nga yang, kraw hta hpring chyat nga ai kaw na, n-gup de tsun nga ai.

MAHTE 12:34 ပူးပေါင်းရင်းမြစ်များ

SHAKAWN KUNGDAWN 53:1

Mana ai wa gaw, “Karai Kasang n nga ai,” nga nna shi a kraw e a tsun nga ai. Shanhte tsam mat nga ma ai rai nna, Matsat shabat lailen hkan nang ma ai: Kadai mung kaja ai amu n galaw ma ai.

SHAKAWN KUNGDAWN 64:3

Shanhte gaw tinang a shinglet hpe nhtu zawn karang nga ma ai: Myit malang ai wa hpe mayun de nna gap na,

SHAKAWN KUNGDAWN 64:5

Tinang a n kaja ai amu hpe shanhte shangang da nna, Mayun e mahkam hkam na bawng ma ai: “Anhte hpe kadai wa mi mu lu na rai hka?” nga nna tsun ma ai.

GA SHAGAWP 16:23

Nyan rawng ai wa a myit gaw shi a n-gup hpe sharin nna, shi tsun ai ga hta, chye chyang ai lawm lu ai.

GA SHAGAWP 4:23

Myit masin gaw asak a npawt nhpang rai nga ai majaw, Dai hpe tsam mari bau sin nga u.

ESAIA 32:6

Kaning rai nme law, mana ai wa gaw, matsa mawa ga hte Yehowa hpe ga hku shut kau na matu mung, kawsi hkrum ai ni, grau kawsi kyet na hte, hpang kara hkrum ai ni ntsin n lu lu na matu mung, mana ga tsun nna n kaja ai hpaji daw na ra ai.

ESAIA 59:14

Tengman ai tara gaw, kanut mat wa sai; dinghpring ai gaw, tsan tsan e tsap nga ai; tengman ai gaw mare lam hkan e kadawng mat sai; malang ai myit gaw shang lu ai n rai.

ESAIA 59:4

Dinghpring ai hku hkan nna sa shawk ai gaw, kadai n nga ai; tengman ai hku hkan nna tara dara ai gaw, kadai n nga ai: shanhte kaman lila hta shamyet shanat nna masu ga tsun ma ai; shanhte gumlau gumle hte na-um nasin rai nga nna, masu magaw shangai dat mu ai.

ESAIA 9:17

N hkru n hkra ai gaw wan zawn hkru nga nna, ju hpun hte tsing hpe shamyit kau mu ai; dai gaw maling na singwum ni hta mung kap nna, wan hkut shadaw ntsa de mawng nga ai.

MAHTE 12:35

Kaja ai wa gaw tinang a kaja ai sutdek hta na kaja ai arai shapraw wu ai; n kaja ai wa mahtang gaw, n kaja ai sutdek hta na n kaja ai arai shapraw wu ai.

MAHTE 15:18

N-gup hta na pru wa ai mahtang gaw, myit masin hta na byin pru ai rai nna, dai hte gaw masha hpe awu asin di kau wu ai.

MAHTE 23:33

Lapu ni e pu htum a amyu e, Ngarai mung a ari hta na, nanhte kaning rai lawt lu na myit ta?

MAHTE 3:7

Ya Hparishe hte Saduke masha law law wa baptisma hkam la na nga sa ma ai hpe shi mu mu yang, shanhte hpe shi tsun mu ai gaw, “Pu htum amyu ni e, du magang ra ai yubak ari hta na hprawng wa lu myit ga, nanhte hpe kadai shadum da myit ta?

LUKA 3:7

Dai majaw, Yawhan a lata hte baptisma hkam la na, pru sa ai shawa masha ni hpe shi tsun mu ai gaw: “Pu htum amyu ni e, du magang ra ai yubak ari hta na hprawng wa lu myit ga, nanhte hpe kadai shadum da myit ta?

LUKA 6:45

Kaja ai wa gaw, tinang kraw lawang a kaja ai sutdek hta na, kaja ai rai shapraw dan ai; n kaja ai wa mung n kaja ai sutdek hta na, n kaja ai rai shapraw dan ai: kaning rai nme law, kraw hta hpring chyat nga ai kaw na, shi a n-gup de tsun pru nga ai.

YAWHAN 8:44

Nanhte gaw, nanhte a kawa ngu ai, gumlau Nat hta na prat wa ai ni rai nga myit dai rai nna, nanhte a kawa a kayut ai hku mung, hkan mayu myit dai: shi gaw shawng npawt kaw nna, masha sat ai wa rai nga ai rai nna, shi hta tengman ai lam n rawng lu ai majaw, tengman ai lam hta n nga lu ai: shi masu magaw ga tsun yang, shi a myit hta na hte maren tsun nga ai: shi gaw masu ai wa rai nga ai hte, masu magaw ai a kawa mung, rai nga ai.

EHPESU 4:29

N se ai ga hkaw mi mung nanhte a n-gup na hkum pru u ga; madat mara nga ai ni a matu akyu byin hkra, ra nga ai hte maren shadaw shalan na matu, mai kaja ai ga sha a tsun na mu.

EHPESU 5:4

n sun n ang re ai ga kinsha, nlem ai ga, shatu shakra ai ga mung n tsun ai sha, shakawn kungdawn nga u ga.

YAKU 3:2

Kaning rai nme law, anhte nga manga hte hta, malaw maga gaw kataw ai hkrai rai nga ga ai. Marai langai ngai ga hte n kataw a yang gaw, hkum hkum tsup tsup re ai wa hte, tinang a hkum ting hpe hkang lu ai wa rai nga ai.

1 YAWHAN 3:10

Dai lam hte Karai Kasang a kashu kasha ni hte, Nat a kashu kasha ni gaw dan ginhka pru ai: kadai rai timung, dinghpring ai amu n galaw ai hte, shi a kahpu kanau hpe n tsaw n ra ai wa gaw, Karai Kasang kaw nna, rai nga ai n rai.

1 SAMUELA 24:13

Moi na ni a ga malai gaw, ‘N hkru ai ni kaw na n hkru ai sha pru chye ai,’ nga ai ga wa teng timung, nye a lata gaw nang kaw n shadu n ga.