KOLOSE 3:22 - Jinghpaw Hanson Version Bible

²² Mayam ni e, nanhte a mungkan Madu ni hpe lam shagu hta madat mara nga mu: myi man pa mayu ai hte masha a myit shapyaw na zawn n re ai sha, myit mang langai sha hte dai Madu hpe hkrit kang nga let madat mara nga mu.

Jinghpaw Common Language Bible 2009

²² Mayam ni e nanhte a shinggyim madu ni hpe lam shagu hta madat mara nga mu: nanhte gaw myi man pa mayu ai hte shanhte a man e ga madat ai hku n re ai sha, Karai Kasang hpe hkrit hkungga let shanhte a ga hpe san seng ai myit hte madat mara nga mu.

KOLOSE 3:22 ပူးပေါင်းရင်းမြစ်များ

NINGPAWT NINGHPANG 42:18

Masum ya du ai shani hta Yawsep gaw shanhte hpe shaga nna, Ngai mung Karai Kasang hpe hkrit ai wa rai nga nngai; dai rai nna nanhte hkrung nga lu na gaw, ning rai mu:

NEHEMIA 5:15

Shawng de na munggyi ni chyawm gaw, mung masha ni a hkaulaw sha ma ai rai nna, muk hte tsabyi jahku mung, gumhpraw shekela mali shi mung, sha ma ai: shanhte a mayam ni pyi mung masha ni a ntsa e up nga ma ai. Ngai chyawm gaw Karai Kasang hpe hkrit kamyin ai majaw, dai zawn n galaw nngai.

NEHEMIA 5:9

Bai ngai gaw, “Nanhte galaw ai lam n mai nga ai: anhte hpe hpyen ai maigan masha ni a man e, anhte a Karai Kasang hpe hkrit hkungga ai myit hte, mai hkawm nga ai, n rai ni?

SHAKAWN KUNGDAWN 123:2

Yu mu, mayam ni a myi, madu a lata hpe, Shingnan num a myi, madu jan a lata hpe, mada nga ma ai hte maren, Anhte a Karai Kasang Yehowa gaw, Anhte hpe matsan dum nga ai du hkra, Anhte a myi shi hpe a mada nga mali ai.

HPAJI NINGLI 12:13

Yawng mayawng ya shapraw ngut sai; ga kanu gaw da ndai rai nga ai: Karai Kasang hpe hkrit hkungga nna, shi hkang da ai ga hpe madat mara nga u; dai gaw shinggyim masha ni a lam madung rai nga ai.

HPAJI NINGLI 5:7

Yup mang law law mu ai mung, ga law law tsun ai mung, kaman lila rai nga ai: nang chyawm gaw Karai Kasang hpe hkrit hkungga nga u.

HPAJI NINGLI 8:12

Yubak galaw ai wa gaw, n hkru ai amu latsa lang galaw nna, shi a asak galu timung, Karai Kasang a man e hkrit kamyin nga ai ni mahtang, mai kaja ai hkrum na mara ai hpe, gaja wa ngai chye nngai:

MALAHKI 1:6

Kasha gaw kawa hpe, mayam gaw madu hpe, hkungga ga ai: ngai kawa rai yang, ngai hpe hkungga ai, kanang? Ngai madu rai yang, ngai hpe hkrit ai, kanang? Nga nna Zaw nawng zaw wa up ai Yehowa gaw, nye a amying hpe nhpu nru di ai hkinjawng ni hpe, san nga ai. Nanhte mahtang, Na a amying hpe anhte kaning rai nhpu nru di ga ta? nga nna bai htan myit dai.

MAHTE 6:22

Dai myi gaw, hkum a pyengdin rai nga lu ai; na a myi asan sha rai nga yang gaw, na a hkum ting a htoi nga ai;

MAHTE 8:9

Kaning rai nme law, ngai mung du lawu na masha rai nga nngai, nye a lawu de mung hpyen masha nga ma ai rai nna, marai mi hpe, ‘Sa u,’ ngu yang, shi sa wa ai; kaga wa hpe, ‘wa rit’ ngu yang, shi wa ai; nye a mayam wa hpe mung, ‘Ndai galaw u,’ ngu yang, shi galaw nga ai,” ngu nna htan wu ai.

LUKA 6:46

Ngai tsun ai hte maren n hkan galaw myit dai mi, hpa rai nanhte ngai hpe, ‘Madu e, Madu e,’ nga myit ta?

LUKA 7:8

Kaning rai nme law, ngai mung du a lawu e dang da ai masha rai nngai: nye a lawu de mung hpyen masha nga ma ai rai nna, langai wa hpe, Sa u, ngu yang, shi sa wa ai; kaga wa hpe, Wa rit, ngu yang, shi wa ai: nye mayam wa hpe mung, Ndai galaw u, ngu yang, shi galaw nga ai, ngu nna tsun shangun dat wu ai.

KASA 2:46

Shani shagu myit langai sha hte nawku Htingnu hta shanhte htep lahti machyu nga nna, tinang a nta e muk ahkyep karan nga yang,

2 KORINHTU 7:1

Tsawra ai ni e, ndai ga sadi yawng hte gaw lu la gaw ai majaw, hkumhkrang hte wenyi hpe awu asin di kau ai matsat shabat hta na tinang hkum hpe jasan jaseng kau nhtawm, Karai Kasang hpe hkrit hkungga let shachyoi shapra ai lam shatup nga ga.

GALATI 1:10

Kaning rai nme law, ning nga tsun ai gaw, masha myi man pa na ngai ra nga nngai kun? shing n rai, Karai Kasang a myi man pa na ngai ra nga nngai kun? Masha ra ai hku hkan nang na ngai tam nga nngai kun? Masha ra ai hku ngai naw hkan nang nga yang gaw, Hkristu a ali ama ngai rai na nngai n rai.

KOLOSE 3:20

Ma ni e, kanu kawa ni hpe lam shagu hta madat mara nga mu: dai gaw dai Madu a man e sharawng awng ai lam rai nga ai.

1 HTESALONI 2:4

dai kabu gara shiga lang ging ai ni ngu ai, Karai Kasang a ahkang hkam ga ai hte maren, masha hpe sharawng awng ai zawn n rai, anhte a kraw lawang hpe manaw yu ai Karai Kasang hpe sharawng awng na zawn, anhte tsun nga ga ai.

HPILEMON 1:16

tutnawng e nang kaw anga nga lu na she, shi nang hte tawng marang mi hka ai, rai dam nhten.