EZEKELA 11:1 - Jinghpaw Hanson Version Bible

¹ Dai hpang wenyi gaw ngai hpe pawn let, sinpraw maga de man yawng ai, Yehowa nta sinpraw chyinghka lam de ngai hpe woi wa nngai: shaloi, yu u, dai chyinghka lam e marai hkun manga rai nga nna, shanhte hta Azura kasha Yazania hte Benaia kasha Pelatia lawm nga ma ai: shan gaw mung du rai nga ma ai.

Jinghpaw Common Language Bible 2009

¹ Karai Kasang a wenyi gaw ngai hpe pawn la nna, Nawku Htingnu a sinpraw chyinghka de ngai hpe woi wa nga ai. Shaloi dai chyinghka lam a makau e marai hkun manga nga nga ai hpe ngai mu nngai; shanhte hta amyu baw a ningbaw rai nga ai Azura a kasha Yazania hte Benaia a kasha Pelatia yan mung lawm nga ma ai hpe ngai mu nngai.

EZEKELA 11:1 ပူးပေါင်းရင်းမြစ်များ

1 HKAWHKAM 18:12

ngai nang kaw nna pru wa yang, Yehowa a Wenyi gaw ngai n chye ai shara de nang hpe woi htawt mat na ra ai: shing rai, ngai Ahab hpe sa tsun yang, shi nang hpe n mu hkrup nna, ngai hpe sat kau na nngai: na mayam, ngai wa chyawm gaw, brang ram prat kaw nna Yehowa hpe hkrit hkungga ni ai.

2 HKAWHKAM 2:16

Bai shanhte gaw, “Yu u, na a mayam ni hta n-gun ja ai masha marai manga shi rai nga ma ai; shanhte gaw na a madu hpe sa tam mu ga: Yehowa a Wenyi gaw shi hpe shapoi la nna, bum langai ngai a ntsa e, shing n rai, kadit langai ngai a kata e, mahkoi wa jahkrat kau da wu ai nhten,” ngu nna hpyi mu yang, shi gaw, “Hkum sa tam myit,” ngu mu ai.

2 HKAWHKAM 25:23

Ya, Babelon hkawhkam wa gaw, Gedalia hpe munggyi shatai ai lam, hpyen du ni hte shanhte a hpyen ma ni na mu yang, Nehtania kasha Ishmaela, Karea kasha Yohanan, Netohpa amyu Tanhumet a kasha Seraia hte Mahka amyu na Yazania gaw, shanhte a masha ni hte rau, Mizpa mare e dung nga ai Gedalia hpang de du ma ai.

ESAIA 1:10

Sodom du ni e, Yehowa a ga madat mara mu; Gomora masha ni e, anhte a Karai Kasang a tara hpe na la mu.

ESAIA 1:23

Na a du ni gumlau let, lagu lagut ni a kanawn manang tai wa masai; shanhte yawng kumhpa ra nna, sake manawn sha nga ma ai; shanhte gaw chyahkrai nmai ni a matu tara ding ai hku n jeyang ai hte, gaida gaina ni a amu hpe hpa n nawn ya ma ai.

EZEKELA 10:19

Dai Hkerubim ni gaw, nye a man e singkaw ni hpe hpyan nhtawm, ga hte hka nna lung wa ma ai; makau de pru yang, dingsen ni hkan nang ma ai: shanhte gaw Yehowa a Nta sinpraw maga chyinghka lam de tsap nga nna, Israela Karai Kasang a hpung shingkang gaw, shanhte a ntsa e dan hkung nga ai.

EZEKELA 10:22

Shanhte a myi man gaw, Hkebara hka kau e ngai mu yu ai myi man hkrang hte bung nga ai; ahpraw nsam mung langai sha rai nga ai; langai hte langai ang ang hkawm wa nga ma ai.

EZEKELA 11:13

Ya ndai myihtoi ga ngai naw tsun nga yang, Benaia kasha Pelatia si wa sai. Dai rai nna ngai gaw myi man gum dagup let, “Aha Madu Yehowa e, naw ngam nga ai Israela amyu masha ni hpe nang atsai awai shagrawm kau na n ni?” ngu nna nsen kaba hte jahtau tsun nngai.

EZEKELA 11:24

Shaloi Wenyi gaw ngai hpe pawn nna, Karai Kasang a Wenyi a shingran hte, Hkalde mung na bawng dung ai ni hpang de, woi wa nngai. Shing rai ngai mu yu ai shingran gaw, ngai hte hka nna lung wa ai.

EZEKELA 22:27

Shi a du ni mung, n tara ai sutgan lu la hkra, shan gyam nna, sai jahkaw kau ai hte, masha hpe kawa sat kau ai chyahkyawn hte bung ma ai.

EZEKELA 3:12

Shaloi Wenyi gaw ngai hpe pawn nna, nye a shingdu de, “Yehowa a hpung shingkang, shi a shara hta e a nga u ga law,” nga nna wu kadu ai nsen kaba, ngai na nngai.

EZEKELA 3:14

Shing rai Wenyi gaw ngai hpe pawn mat wa nna, ngai gaw myit ru ai hte nye a wenyi kahtet let hkan nang nngai; Yehowa a lata gaw nye a ntsa e li nga ai.

EZEKELA 37:1

Yehowa a lata nye a ntsa e rai nga nna, shi a Wenyi hte ngai hpe woi shapraw nhtawm, kadit ka-ang e ngai hpe tawn da ni ai; dai kadit gaw, nrut nra hte hpring chyat nga ai.

EZEKELA 40:6

Dai hpang sinpraw maga chyinghka de shi sa du nna, lakang lung nhtawm, chyinghka hkinbawng hpe shadawn yu ai; de a htat de nren mi; bai de a manang nren mi rai nga ai.

EZEKELA 41:1

Dai hpang shi gaw nawku Htingnu de ngai hpe woi wa nna, chyinghka jut madin yan hpe shadawn yang, de a htat de gaw, nta a htat ai hte maren, dawng kru kru rai nga ai.

EZEKELA 8:16

Bai shi gaw, Yehowa nta kata wang de ngai hpe woi wa nna, “yu u, Yehowa a nawku Htingnu chyinghka lam, ajan hte tawn hkungri lapran e, marai hkun manga daram rai nga nna, shanhte gaw Yehowa a nawku Htingnu hpe shingdu dat kau nna, sinpraw maga de yawng let, jan hpe nawku ma ai.”

EZEKELA 8:3

Shi gaw lata hkrang ladawn nna, nye a kara latsin mi lang nga ai: shaloi Wenyi gaw aga hte lamu lapran e ngai hpe pawn shalun nna, Karai Kasang kaw na shingran hte, Yerusalem mare a dingdung maga ang ai kata wang chyinghka de, ngai hpe woi wa nngai: dai yang e, nsu nnawn shangun ai, nsu nnawn ngu ai sumla tingnyang rai nga ai.

HOSEA 5:10

Yuda du ni gaw, lamu ga jarit hpundung ni hpe sit kau ai ni zawn, rai nga ma ai: ngai gaw shanhte a ntsa de, nye a pawt sindawng ai hpe ntsin zawn, ru dat na nngai.

KASA 8:39

Hka na lung wa ma yang, dai Madu a Wenyi Hpilip hpe woi mat wa nna, Unuk wa mung shi sa wa ai lam de kabu gara let bai wa wu ai rai nna, shi e bai n mu wu ai.

SHINGRAN 1:10

Dai Madu a nhtoi hta e Wenyi hta ngai nawng mat wa ai rai nna, Nang mu ai hte maren laika hta ka la nhtawm, Ehpesu, Samurna, Pergamu, Htuatira, Sardi, Hpiladehpi hte Ladoki mare ni hta nga ai,